[1] Ne denkɛ, i ka ne ka kumaw mara ka ne ka ci fɔlenw mara i dusukun na.
[2] I ka ne ka ci fɔlenw sira taama, i ɲɛnama na to, ka ne ka laadili mara i ko i ɲɛkisɛ.
[3] I ka u siri i bolonkɔniw la ka u sɛbɛn i dusukun walaha kan.
[4] I k'a fɔ hakilitigiya ye ko: «I ye ne balimamuso de ye,» ka faamuli wele ka kɛ i terimuso ye,
[5] walisa u ka i mara jatɔmuso ma ani dunanmuso ka kuma nugulenw.
[6] Ne tun bɛ filɛli kɛ ne ka so finɛtiri fɛ, ne ka nɛgɛ banabililenw furancɛ fɛ.
[7] Ne ye kɔlɔsili kɛ nalonmaw cɛma, ne ye kamalen hakilintan dɔ kɔlɔsi kamalen tɔw cɛma.
[8] O tɛmɛntɔ dugu bɔlɔn fɛ ka surunya o muso ka so yɔrɔ la, a taara o ka so sira fɛ.
[9] A kɛra tile bilen kɔ wo, fitiri da don wo, wala dugu tila tuma don dibi la wo,
[10] a filɛ, o muso taara o kamalen kunbɛn. Jatɔya fini bɛ a kan na, a tun ka kegun kosɛbɛ.
[11] O muso ye malobali tulo gɛlɛn ye, a senna ka misɛn kosɛbɛ,
[12] tuma dɔ a bɛ bɔlɔnw na, tuma dɔ a bɛ fɛrɛkɛnɛw la. A tun bɛ makɔnɔli kɛ dugu bɔlɔnw kunbɛn yɔrɔw bɛɛ la.
[13] O muso ye o kamalen poron ka i meleke a la, a ma maloya k'a fɔ kamalen ye ko:
[14] «Barika dali saraka bɔ juru tun bɛ ne la, ne ye ne ka dafalew bɔ bi,
[15] o de kosɔn ne bɔra ka na i kunbɛn, ne tun b'a fɛ kosɛbɛ ka i ɲɛda ye, ne ye i ye.
[16] Ne ye kosonkalan fɛnsɛ ne ka dalan kan, ka Misira jamana lenfu fini sɔgɔlen da o kan.
[17] Ne ye suma diyalan bɔn ne da yɔrɔ la, ani mirɛ ni aloɛ ani sinamome suma duman.
[18] Na, an ka taa an da ka kanuya kɛ ka an wasa fo ka dugu jɛ. An ka ɲagali kanuya la,
[19] k'a masɔrɔ ne cɛ tɛ so, a taara taama jan na.
[20] A ye a ka wari bilalan fa wari la ka taa, a tɛ na fo kalo kura.»
[21] Muso y'a nɛgɛn ni a ka kuma ye, ka to ka kuma nugulenw fɔ a ye.
[22] O yɔrɔ nin bɛɛ, o kamalen wulila ka tugu a kɔ, i ko misi min bɛ taa faga yɔrɔ la, i ko fatɔ min sirilen bɛ nɛgɛ jɔlɔkɔ la ɲɛgwan kama,
[23] fo biɲɛden bonnen ka a kɔnɔ sɔgɔ, i ko kɔnɔ min donna kɔnɔ minɛ ja la, k'a sɔrɔ a m'a dɔn ko a ni na to o la.
[24] Ayiwa ne ka denmisɛnw, a' ye ne lamɛn sisan, ka aw tulo majɔ ne dala kumaw la.
[25] I dusukun kana sama o ɲɔgɔn muso nɔ fɛ, i kana i yɛrɛ lafili a ka siraw la,
[26] k'a masɔrɔ a ye mɔgɔ caman jogin ka u labi. A ka mɔgɔ fagalenw ye jamaba ye.
[27] A ka so ye lahara sira de ye, a bɛ jigin ka taa saya ka sow la.