[1] Ne denkɛw, a' ye aw fa ka kalan lamɛn, ka aw tulo majɔ ka hakilitigiya faamu,
[2] k'a masɔrɔ ne bɛ kalan sɛbɛ di aw ma, aw kana ban ne ka laadili ma.
[3] Ka ne denmisɛnma to ne fa kɛrɛ fɛ, ne ko tun ka di ne ba ye i ko denkɛ kelenpe.
[4] Ne fa tun bɛ ne kalan k'a fɔ ne ye ko: «I dusukun ka ne ka kalan minɛ, i ka ne ka ci fɔlenw mara, i ɲɛnama na to.
[5] I ka hakilitigiya ni dɔnniya ɲini, i kana ɲinɛ ne dala kumaw kɔ ka u bila.
[6] I kana hakilitigiya fili, a na i kɔlɔsi. I k'a kanu, a na i mara.
[7] Hakilitigiya daminɛ filɛ nin ye. I ka hakilitigiya ɲini. Ɔwɔ, i ka dɔnniya ɲini ka tɛmɛn fɛn bɛɛ kan.
[8] I ka a bonya, a na i kɔrɔta, ni i y'a poron, a na kɛ i nɔɔrɔ ye.
[9] A na kɛ nɛɛma masafugula ye i kun na ka masafugula nɔɔrɔma di i ma.»
[10] Ne denkɛ, i tulo majɔ ka ne ka kumaw minɛ, i si sanw na caya.
[11] Ne na i kalan hakilitigiya sira la, ka i ɲɛ minɛ tilennenya siraw fɛ.
[12] Ni i bɛ taama, foyi tɛna i sen bali, ni i bɛ boli, i sen tɛna talon.
[13] I jija kalan na, i kana a bila, i ka a mara, o ye i ka ɲɛnamaya ye.
[14] I kana taama mɔgɔ juguw ka sira fɛ, i kana taa kojugukɛlaw ka sira fɛ.
[15] I ka o sira bila, i kana taa a fɛ, i ka jɛngɛ ka mabɔ a la ka taa i ka sira fɛ,
[16] k'a masɔrɔ u tɛna sunɔgɔ ni u ma ko jugu kɛ, sunɔgɔ tɛna don u ɲɛ la ni u ma mɔgɔ faga.
[17] U na juguya dumuni kɛ, ka fariya minni fɛn min.
[18] Nka mɔgɔ tilennen ka sira bɛ i ko kɛnɛbɔda, o bɛ kɛnɛ bɔ ka taa ɲɛ fo ka tile se kuncɛ.
[19] Mɔgɔ jugu ka sira bɛ i ko dibi, u sen bɛ talon fɛn min na, u tɛ o dɔn.
[20] Ne denkɛ, i tulo majɔ ne ka kumaw la, ka i tulo majɔ ne ka ko fɔlenw na.
[21] U kana bɔ i ɲɛ kɔrɔ, i ka u mara i dusukun na,
[22] k'a masɔrɔ u ye u sɔrɔbaaw ka ɲɛnamaya de ye, ani u farikolo bɛɛ kɛnɛyali.
[23] I dusukun kɔlɔsi ka tɛmɛn fɛn bɛɛ kan, k'a masɔrɔ mɔgɔ ka koɲɛw bɛ bɔ a dusukun na.
[24] I da kɔlɔsi kuma juguw fɔli ma, i da kana nkalon tigɛ.
[25] I ɲɛ sin a kuntilenna ma, i ɲɛ ka sin i ɲɛfɛla ma.
[26] I ka miiri i taa sira la, i ka siraw bɛɛ ka tilen.
[27] I kana jɛngɛ ka taa kinin wala numan fɛ, i ka i sen mabɔ ko jugu la.