[1] Ne denkɛ, i kana ɲinɛ ne ka kalan kɔ, i ka ne ka ci fɔlenw mara i dusukun na,
[2] k'a masɔrɔ u na si tile jan di i ma, i ɲɛnama na san caman kɛ hɛrɛ la.
[3] I kana ɲumaya ni tiɲɛ bila, i ka u siri i kan na, ka u sɛbɛn i dusukun walaha kan.
[4] Ni o kɛra, i na nɛɛma ni hakilitigiya sɛbɛ sɔrɔ Ala ni mɔgɔw fɛ.
[5] I ka i dusukun bɛɛ kalifa Matigi ma, i kana i sinsin i yɛrɛ ka hakilitigiya kan.
[6] I ka miiri Matigi ko la i ka ko kɛtaw bɛɛ la, a na i ka siraw labɛn.
[7] I kana i yɛrɛ jate hakilitigi ye, i ka siran Matigi ɲɛ ka fara ko jugu la.
[8] O na kɛ i farikolo kɛnɛyali ye ka sɛmɛ don i kolow la.
[9] I ka Matigi bonya ni i bolo fɛnw ye, k'a bonya ni i ka fɛn sɔrɔtaw kun fɔlɔw ye.
[10] Ni o kɛra, i ka jiginɛw na fa fo ka bɔn, i ka diwɛn mara yɔrɔw na fa diwɛn kɛnɛ la fo ka bɔn.
[11] Ne denkɛ, i kana Matigi ka kololi mafiɲɛya, a ka kɔrɔfɔli kana digi i la,
[12] k'a masɔrɔ Matigi bɛ minw kanu, a bɛ olu kolo, i ko fa bɛ a diyaɲe den kolo cogo min na.
[13] Mɔgɔ min ye hakilitigiya sɔrɔ ka faamuli kɛ, o ye dubaden ye,
[14] k'a masɔrɔ a sɔrɔli ka fisa ni warijɛ sɔrɔli ye, a tɔnɔ ka fisa ni sanu yɛrɛwolo ye.
[15] A sɔngɔ ka bon kabakurun sɔngɔ gɛlɛn ye. I ɲɛ bɛ bɔ fɛn o fɛn fɛ, o si tɛ a bɔ.
[16] Si tile jan bɛ a kininbolo la, nafolo ni bonyali bɛ a numanbolo la.
[17] A ka siraw ka ɲi, lafiya bɛ a ka sira misɛnw bɛɛ la.
[18] A na kɛ ɲɛnamaya jiri ye a minɛbaaw ye, mɔgɔ o mɔgɔ bɛ a mara, o ye dubaden ye.
[19] Matigi ye dugukolo ju sigi hakilitigiya kan, a ye sankolo sabati dɔnniya barika la.
[20] A ka dɔnniya de y'a to dingɛ dunbaw dayɛlɛla, ani ngomi bɛ toni ka bɔ sankabaw la.
[21] Ne denkɛ, i ka hakilitigiya ni dɔnniya mara, olu kana mabɔ i la.
[22] U na kɛ i ni ka ɲɛnamaya ye ani i kan na masiri.
[23] O tuma la i lakanalen na taama i ka siraw kan, i sen tɛna talon.
[24] Ni i bɛ i da, i tɛna siran, ni i dara tuma min na, i ka sunɔgɔ na diya.
[25] Ni siran ko cunna i kan, wala ni mɔgɔ juguw bira i kan, i ja kana tigɛ,
[26] k'a masɔrɔ Matigi na kɛ i jigi da yɔrɔ ye, a na i sen mara jan ka minɛli bɛɛ ma.
[27] Mɔgɔ min ka kan ni dɛmɛni ye, ni a dɛmɛni se bɛ i ye, i kana ban ka ko ɲuman kɛ o ye.
[28] I kana a fɔ i sigiɲɔgɔn ye ko: «Taa ka na, ne na a di i ma sini,» k'a sɔrɔ fɛn bɛ i bolo ka di a ma.
[29] I sigiɲɔgɔn min sigilen bɛ hɛrɛ la i kɛrɛ fɛ, i kana dabali jugu ɲini o kama.
[30] I kana mɔgɔ si kɛlɛ, k'a sɔrɔ a ma foyi kɛ i la.
[31] Mɔgɔ jugu farinma keleya kana i minɛ, a ka sira si nege kana kɛ i la,
[32] k'a masɔrɔ Matigi bɛ ɲigin mɔgɔ tilenbaliw la, nka mɔgɔ tilennenw teri don.
[33] Matigi ka danga bɛ mɔgɔ jugu ka so kan, nka a na dubaw kɛ mɔgɔ tilennenw ka so ye.
[34] A bɛ yɛlɛ bɔ nparabɔlaw la, a bɛ nɛɛma di mɔgɔ majiginlenw ma.
[35] Hakilitigiw ciyɛn na kɛ nɔɔrɔ ye, nka maloya na kɛ hakilintanw niyɔrɔ ye.