[1] O kow bɛɛ tɛmɛnnen kɔ, ko min kɛra, o filɛ nin ye. Nabot min bɔra Jizreɛl, o ka rezɛn nakɔ dɔ tun bɛ masakɛ Akab ka so da fɛ Samari.
[2] Akab y'a fɔ Nabot ye ko: «I ka i ka rezɛn nakɔ di ne ma walisa ne k'a kɛɲugu nakɔ sɛnɛ yɔrɔ ye katuguni a bɛ ne ka so da la. Ne na a falen rezɛn nakɔɲuman wɛrɛ la wala n'i b'a fɛ, ne na a wari di i ma.»
[3] Nka Nabot ye Akab jaabi ko: «Ala ka ne kisi ne bɛnbaw ciyɛn dili ma i ma.»
[4] Akab dusu kasilen donna a ka so kɔnɔ Nabot ka kuma kosɔn ko: «Ne tɛ ne fa ciyɛn di i ma.» A y'i da a ka dalan kan k'a ɲɛ sin kogo ma, a ma sɔn ka dumuni kɛ.
[5] A muso Jezabɛl nana a kɔrɔ k'a fɔ a ye ko: «Mun kosɔn i ɲɛda cogo yɛlɛmana fo i tɛ sɔn ka dumuni kɛ?»
[6] A y'a muso jaabi ko: «Nabot min bɔra Jizreɛl, ne kumana o fɛ ko a k'a ka rezɛn nakɔ di ne ma, ko ne n'a wari di a ma wala ni a b'a fɛ ne na rezɛn nakɔ wɛrɛ di a ma a nɔ na, nka a ye ne jaabi ko: ‹Ne tɛna ne ka rezɛn nakɔ di i ma.›»
[7] O tuma la a muso Jezabɛl y'a fɔ a ye ko: «E tɛ Israɛl bɔnsɔn ka masakɛ ye wa? Wuli ka dumuni kɛ ka nisɔndiya. Nabot min bɔra Jizreɛl, ne yɛrɛ na o ka rezɛn nakɔ di i ma.»
[8] Jezabɛl ye lɛtɛrɛw sɛbɛn Akab tɔgɔ la ka Akab ka taamashyɛn kɛ u la ka u ci ka taa di Nabot ka dugu cɛkɔrɔbaw ni dugu koɲɛnabɔlaw ma.
[9] Muso ye min fɔ a ka sɛbɛn kɔnɔ, o filɛ nin ye ko: «Aw ka don kelen sigi ka sun don ka Nabot kɛ o ɲɛ mɔgɔ ye.
[10] O kɔ, aw ka mɔgɔ jogo jugu fila sigi a ɲɛ fɛ. Olu ka seereya jugu kɛ a kama ko: ‹I ye Ala ni masakɛ neni.› O kɔ, aw ka bɔ n'a ye kɛnɛma dugu kɔ fɛ k'a bon ni kabakurunw ye k'a faga.»
[11] Nabot ka dugu cɛkɔrɔbaw ni a koɲɛnabɔlaw ye Jezabɛl ka o sɛbɛn cilen kalan. A ye min fɔ u ye, u ye o kɛ ka kɛɲɛ ni a ka sɛbɛn cilen ye u ma.
[12] U ye sun don don sigi ka Nabot kɛ u ɲɛ mɔgɔ ye.
[13] O tuma la, o mɔgɔ jogo jugu fila nana sigi a ɲɛ fɛ. Olu ye seereya jugu kɛ Nabot kama mɔgɔw bɛɛ ɲɛ na ko: «Nabot ye Ala neni ka masakɛ fana neni.» O kɔ, u bɔra ka taa n'a ye dugu kɔ fɛ k'a bon ni kabakurunw ye k'a faga.
[14] A fɔra Jezabɛl ye ko: «Nabot bonna ni kabakurunw ye k'a faga.»
[15] Jezabɛl y'a mɛn ko Nabot bonna ni kabakurunw ye k'a faga tuma min na, a y'a fɔ Akab ye ko: «Jizreɛl Nabot ma sɔn ka a ka rezɛn nakɔtu min di i ma wari la, wuli ka taa ka o minɛ k'a kɛ i ta ye, katuguni a ɲɛnama tɛ tun, a sara.»
[16] Akab y'a mɛn tuma min na ko Nabot sara, a wulila ka taa Jizreɛl Nabot ka nakɔ minɛ k'a kɛ a ta ye.
[17] O tuma la Matigi ka kuma sera Tisibite Eli ma ko:
[18] «I ka wuli ka Israɛl bɔnsɔn ka masakɛ Akab kunbɛn Samari. A bɔtɔ don Nabot ka rezɛn nakɔtu minɛ yɔrɔ la k'o kɛ a yɛrɛ ta ye.
[19] I k'a fɔ a ye ko: ‹Matigi ko: «I tɛ mɔgɔ fagala ni sonyalikɛla ye wa?» › I k'a fɔ a ye fana ko: ‹Matigi ko: «Wuluw ye Nabot joli lanɔn yɔrɔ min na, u na e ta fana lanɔn yen.» ›»
[20] Akab kulola ko: «E ne jugu, i ye ne sɔrɔ.» Eli y'a jaabi ko: «Ɔwɔ, ne ye i sɔrɔ k'a masɔrɔ i y'i yɛrɛ feere ka ko jugu kɛ Matigi ɲɛ kɔrɔ.
[21] O de kosɔn Matigi ko: ‹Ne na bɔnɛ lase i ma. Ne na Akab bɔnsɔn cɛmaw fura k'u halaki ka u ban pewu ka bɔ Israɛl bɔnsɔn cɛma, jɔn fara hɔrɔn kan.
[22] Ne na i ka so kɛ i ko Nebat denkɛ Jeroboam ka so ni Akija denkɛ Baesa ka so, sabu i ye ne dusu dimin ka jurumu kɛ ka Israɛl bila jurumu la.›
[23] Matigi kumana Jezabɛl fana ko la ko: ‹Wuluw na Jezabɛl sogo dun Jizreɛl dugu lamini kogo kɛrɛ fɛ.
[24] Akab ka du kɔnɔ mɔgɔ minw bɛ sa dugu kɔnɔ, wuluw na olu sogo dun. Minw bɛ sa kungo kɔnɔ, sanfɛ kɔnɔw na olu sogo dun.›»
[25] Tiɲɛ la, mɔgɔ si ma a yɛrɛ feere ka ko jugu kɛ Matigi ɲɛ kɔrɔ i ko Akab muso Jezabɛl y'a nɛgɛn k'a kɛ cogo min na.
[26] A ye ko jugu kɛ ka bato fɛnw bato i ko Amɔr siya tun b'a kɛ cogo min na, Matigi ye olu minw gɛn ka bɔ Israɛl bɔnsɔnɲɛ.
[27] Akab ye Eli ka kuma mɛn tuma min na, a y'a ka finiw fara ka cafu fini don a fari la ka sun don, a tun bɛ i da ni o cafu finiw ye, a ɲɛnasisilen tun bɛ taama.
[28] O tuma la Matigi ka kuma sera Tisibite Eli ma ko:
[29] «Akab y'a yɛrɛ majigin ne ɲɛ kɔrɔ cogo min na, i ye o ye wa? A y'a yɛrɛ majigin ne ɲɛ kɔrɔ, o de kosɔn ne tɛna bɔnɛ lase a ma k'a ɲɛnama to. Ne na bɔnɛ lase a ka so ma a denkɛ tilew la.»