[1] Ka Jeroboam jɔlen to saraka bɔlan kɔrɔ wusulan suma duman wusuli kama Bɛtɛl, Ala ka cɛ dɔ bɔra Juda ni Matigi ka ci ye ka se yen.
[2] A pɛrɛnna saraka bɔlan kama Matigi ka kuma barika la, a ko: «Saraka bɔlan, saraka bɔlan. Matigi ko: ‹Denkɛ dɔ na bange Dawuda ka so kɔnɔ, o tɔgɔ na da ko Josiasi. Sarakalasebaa minw bɛ wusulan wusu i kan batoli kɛ yɔrɔ la, a na olu jeni i kan ka mɔgɔw kolow jeni i kan.›»
[3] Kira y'a fɔ o don na ko: «Matigi ka kuma taamashyɛn filɛ nin ye, saraka bɔlan na ci fila ye ka a bugurijɛ seri duguma.»
[4] Masakɛ Jeroboam ye Ala ka cɛ ka o kuma mɛn saraka bɔlan kama Bɛtɛl minkɛ, a y'a bolo mɔɔnɔbɔ saraka bɔlan kun na k'a fɔ ko: «A' y'a minɛ.» Nka a bolo min tun bɛ saraka bɔlan kun na, o jara. A ma se k'a bolo kɔsegin tun.
[5] Saraka bɔlan cira ka a bugurijɛ bɔn duguma. O tun ye Ala ka cɛ ka taamashyɛn fɔlen ye ka bɔ Matigi fɛ.
[6] O tuma la masakɛ y'a fɔ Ala ka cɛ ye ko: «I ka Matigi, i ka Ala deli ne ye walisa ne bolo ka segin a nɔ na.» Ala ka cɛ ye Matigi deli. A bolo seginna a nɔ na k'a kɛ a cogo kɔrɔ la.
[7] Masakɛ y'a fɔ Ala ka cɛ ye ko: «I ka taa ne fɛ ne ka so walisa i ka dumuni kɛ. Ne na nili fɛn di i ma.»
[8] Nka Ala ka cɛ ye masakɛ jaabi ko: «Hali ni i ye i ka so tilancɛ di ne ma, ne tɛna don i ka so kɔnɔ. Ne tɛna dumuni kɛ i ka so, ne tɛna minni kɛ yen,
[9] katuguni Matigi ka ci min fɔra ne ye, o filɛ nin ye ko: ‹I kana dumuni kɛ yen, i kana ji min yen, i kana kɔsegin i taa sira fɛ.›»
[10] O tuma la a taara sira wɛrɛ fɛ. A taara sira min fɛ Bɛtɛl, a ma kɔsegin o fɛ.
[11] O y'a sɔrɔ kira cɛkɔrɔba dɔ sigilen tun bɛ Bɛtɛl. Ala ka cɛ ye fɛn o fɛn kɛ o don na, o cɛkɔrɔba denkɛw nana olu bɛɛ fɔ u fa ye. A ye kuma minw fɔ masakɛ ye, u fa ye olu mɛn a denkɛw fɛ.
[12] Cɛkɔrɔba ko: «Ala ka cɛ min nana ka bɔ Juda, o taara sira jumɛn fɛ?»
[13] O tuma la a y'a fɔ a denkɛw ye ko: «A' ye tɛrɛfɛ da ne ka fali la.» U ye tɛrɛfɛ da fali la.
[14] Cɛkɔrɔba yɛlɛnna a kan. A ye sira minɛ ka taa ka kun Ala ka cɛ la. A y'a sigilen sɔrɔ terebente sun dili kan, k'a fɔ a ye ko: «Ala ka cɛ min nana ka bɔ Juda, e don wa?» O ko: «Ɔwɔ, ne don.»
[15] Cɛkɔrɔba ko: «Ayiwa, i ka segin ne fɛ ka taa ne ka so ka dumuni dɔɔnin kɛ.»
[16] Nka Ala ka cɛ ko: «Ne tɛ se ka kɔsegin ka taa i fɛ wala ka don i ka so kɔnɔ. Ne tɛna dumuni kɛ, ne tɛna ji min i ka so nin yɔrɔ la
[17] sabu ne ye ci sɔrɔ Matigi fɛ ko ne kana dumuni kɛ, ne kana ji min, ne kana kosɛgin ne taa sira fɛ.»
[18] O cɛkɔrɔba ko: «Ne fana ye kira ye i ko e. Mɛlɛkɛ dɔ ye Ala ka ci fɔ ne ye ko: ‹I ka kɔsegin ni o cɛ ye i ka so. A ka dumuni kɛ ka ji min.›» Nka o tun ye nkalon ye.
[19] Ala ka cɛ taara a fɛ ka dumuni kɛ ka ji min a ka so kɔnɔ.
[20] Ka u sigilen to dumuni la, Matigi ka kuma sera a welebaa kira ma.
[21] Ala ka cɛ min bɔra Juda, a pɛrɛnna k'a fɔ o ye ko: «Matigi ko: ‹I ye Matigi kan bila, i ma Matigi i ka Ala ka ci fɔlenw kɛ,
[22] sabu Matigi i ka Ala tun y'a fɔ i ye yɔrɔ min ko la ko i kana dumuni kɛ, i kana minni kɛ yen, i kɔseginna ka dumini kɛ ka minni kɛ yen. O de kosɔn i su tɛna don i bɛnbaw su don yɔrɔ la.›»
[23] Ala ka cɛ tilara dumuni ni minni la tuma min na, kira cɛkɔrɔba min taara n'a ye, o ye tɛrɛfɛ da a ka fali la.
[24] Ala ka cɛ taara. A ni waraba dɔ bɛnna sira la. O y'a faga. A su dalen tun bɛ sira da la. Fali jɔlen tun bɛ su da fɛ. Waraba fana tun bɛ su kɛrɛ fɛ.
[25] Sira fɛ tɛmɛnbaaw ye su dalen ye sira da la ka waraba jɔlen ye a kɔrɔ. U taara dugu kɔnɔ o kira cɛkɔrɔba ka so ka u ka ko yelen lakali o ye.
[26] O kira cɛkɔrɔba min tun nana ni Ala ka cɛ ye a ka so, o ko: «Ala ka cɛ min ye Matigi kan bila, o don. Matigi y'a don waraba bolo, o y'a farafara k'a faga ka kɛɲɛ ni Matigi ka kuma fɔlen ye.»
[27] O kɔ, a y'a fɔ a denkɛw ye ko: «A' ye tɛrɛfɛ da ne ka fali la.» U ye tɛrɛfɛ da a la.
[28] O tuma la a taara ka su dalen sɔrɔ sira da la. Fali ni waraba bɛ a kɛrɛ fɛ. Waraba ma su farafara, a ma fali faga.
[29] Kira cɛkɔrɔba ye Ala ka cɛ su ta ka o da fali kan ka taa n'a ye. O cɛkɔrɔba taara n'a ye ka a su kasi k'a su don.
[30] A ye Ala ka cɛ su don a yɛrɛ ka kaburu kɔnɔ. A ye a su kasi ko: «E, ne balimakɛ.»
[31] A su donnen kɔ, cɛkɔrɔba y'a fɔ a denkɛw ye ko: «Ni ne sara, Ala ka cɛ su donna kaburu min kɔnɔ, aw ka ne fana su don o kɔnɔ. Aw ka ne kolow da ale kolow kɛrɛ fɛ,
[32] katuguni a pɛrɛnna ka kuma min fɔ Matigi barika la Bɛtɛl saraka bɔlan kama ani Samari duguw kɔnɔ ka sow bɛɛ kama, o na kɛ, siga t'a la.»
[33] O kow tɛmɛnnen kɔ, Jeroboam ma a ka sira juguw to yen. Sarakalasebaaya tun ka di mɔgɔ o mɔgɔ ye, a ye olu sigi ka kɛ batoli kɛ yɔrɔw sarakalasebaaw ye, hali ni u tun tɛ Levi bɔnsɔn ye. A ye a ka sarakalasebaaw sigi batoli kɛ yɔrɔw la.
[34] O ko kɛra jurumu ye Jeroboam ka so la. O de kosɔn a ka so halakira ka ban ka bɔ dugukolo kan.