[1] Tile caman tɛmɛnnen kɔ, ja san sabanan la, Matigi ka kuma sera Eli ma ko: «I ka taa i jɔ masakɛ Akab ɲɛ kɔrɔ, ne na sanji lana dugukolo kan.»
[2] O tuma la Eli taara i jɔ Akab ɲɛ kɔrɔ. O y'a sɔrɔ kɔngɔba juguyara Samari.
[3] Akab ye a ka so kɔlɔsibaa Abdiasi wele ka taa a yɔrɔ la. O Abdiasi tun ye Matigi batobaa ye.
[4] Jezabɛl ye Matigi ka kiraw faga tuma min na, Abdiasi taara ni kira kɛmɛ ye ka u biduuru-duuru dogo kuluwo kɔnɔ ka u balo ni buuru ni ji ye.
[5] Akab y'a fɔ Abdiasi ye ko: «An ka yaala jamana kɔnɔ ka ji boyi yɔrɔw ni ji sigi yɔrɔw bɛɛ lajɛ, a dɔrɔ an na bin sɔrɔ an ka baganw ye walisa an ka sow ni faliw kisi walisa an kana bagan dɔw faga.»
[6] U ye jamana tilatila u cɛ. Akab taara a kelenna sira dɔ fɛ, Abdiasi fana taara a kelenna sira wɛrɛ fɛ.
[7] Ka Abdiasi to sira kan ka taa, Eli nalen filɛ a kunbɛn. Abdiasi y'a dɔn. A ye i biri duguma k'a fɔ Eli ye ko: «E don wa, ne matigi Eli?»
[8] O ko: «Ne don.» A y'a fɔ Abdiasi ye ko: «Taa a fɔ i matigi ye ko, a filɛ, Eli bɛ yan.»
[9] Abdiasi ko: «Ne ye mun ko jugu kɛ fo i b'a fɛ ka i ka baaraden don Akab bolo walisa a ka ne faga?
[10] A bɛ ne ni Matigi, i ka Ala ɲɛnama cɛ. Siya si ni masaya si tɛ yen ni ne matigi, Akab ma mɔgɔ ci yen ka taa i ɲini. Ni olu ko Eli tɛ yen, a bɛ o masakɛ ni a ka mɔgɔw wajibiya ko u ka u kali ko mɔgɔ si ma i ye.
[11] Ayiwa sisan i b'a fɛ ne ka taa a fɔ ne matigi ye ko: ‹A filɛ, Eli bɛ yan.›
[12] Nka ni ne bɔra i kɔrɔ, ne matigi, a dɔrɔ Matigi Ni na i ta ka taa yɔrɔ dɔ la, ne tɛ yɔrɔ min dɔn, k'a sɔrɔ ne y'a fɔ Akab ye. Ni i ma ye, a na ne faga. O bɛɛ n'a ta, ne, i ka baaraden bɛ siran Matigi ɲɛ k'a bonya kabini ne denmisɛnma.
[13] Jezabɛl ye Matigi ka kiraw faga tuma min na, ne ye min kɛ, ne matigi, o ma fɔ i ye wa? Ne ye u la cɛ kɛmɛ dogo. Ne ye u biduuru-duuru dogo kuluwo kɔnɔ ka u balo ni buuru ni ji ye yen.
[14] Ayiwa sisan i ko ne ka taa a fɔ ne matigi ye ko, Eli bɛ yan, nka a na ne faga.»
[15] Eli y'a jaabi ko: «Kɛlɛbolow Matigi ɲɛnama tɔgɔ kosɔn, ne bɛ o min ka baara la, ne bɛ jɔ Akab ɲɛ kɔrɔ bi, siga t'a la.»
[16] O tuma la Abdiasi taara masakɛ Akab kunbɛn ka o kibaru fɔ a ye. Akab nana Eli kunbɛn.
[17] U ye ɲɔgɔn bɛn. Akab y'a fɔ Eli ye ko: «E de ye nin ye wa, Israɛl tɔɔrɔbaa?»
[18] Eli y'a jaabi ko: «Ne tɛ Israɛl tɔɔrɔbaa ye dɛ. Nka e ni i fa ka so de ye Israɛl tɔɔrɔ, k'a masɔrɔ aw banna Matigi ka ci fɔlenw ma ka tugu bato fɛn Baal nɔ fɛ.
[19] Ayiwa sisan i ka ci fɔ Israɛl bɔnsɔn bɛɛ ye ko u kaɲɔgɔn lajɛ Karmɛl kulu kan ani Baal ka kira kɛmɛ naani ni biduuru ani Astarte boli ka kira kɛmɛ naani minw bɛ dumuni kɛ Jezabɛl fɛ.»
[20] O tuma la Akab ye ci bila Israɛl bɔnsɔn bɛɛ ma ka kiraw lajɛ Karmɛl kulu kan.
[21] Eli gɛrɛla mɔgɔw bɛɛ la k'a fɔ u ye ko: «Aw segelentɔ bɛ taama fan fila fɛ fo tuma jumɛn? Ni Matigi ye Ala ye, a' ye tugu Matigi la, nka ni Baal ye Ala ye, aw ka tugu Baal la.» Mɔgɔ ma a jaabi hali kuma kelen na.
[22] O tuma la Eli y'a fɔ mɔgɔw ye ko: «Ne kelenpe ye Matigi ka kira ye yan k'a sɔrɔ Baal ka kiraw ye cɛ kɛmɛ naani ni biduuru ye.
[23] A' ye na ntura fila di an ma. Baal ka kiraw ka kelen ɲɛnatɔmɔ u yɛrɛw ye k'a tigɛtigɛ ka a da saraka bɔlan kan dɔgɔ kan, nka u kana tasuma don a la. Ne na ntura dɔ fana labɛn ka a da saraka bɔlan kan dɔgɔ kan, ne fana tɛna tasuma don ne ta la.
[24] O kɔ, aw ka aw ka bato fɛn deli, ne fana na Matigi deli. Ni min ye jaabili kɛ ni tasuma ye, o na kɛ Ala sɛbɛ ye.» Mɔgɔw bɛɛ ko: «O ka ɲi.»
[25] O tuma la Eli y'a fɔ Baal ka kiraw ye ko: «A' ye ntura kelen ɲɛnatɔmɔ ka o labɛn fɔlɔ, sabu aw ka ca. A' ye aw ka bato fɛn deli nka aw kana tasuma don a la.»
[26] O tuma la, ntura min dira u ma, u ye o minɛ ka o waraka ka Baal deli ka pɛrɛn kabini sɔgɔma fo ka taa se tile gwan ma. U ko: «Baal, an jaabi.» Nka kumakan si ma mɛn, jaabili si ma kɛ. U tun bɛ u panpan ka u ka saraka bɔlan jɔlen lamini.
[27] Ka tile to kuncɛ, Eli ye yɛlɛ bɔ u la ko: «A' ye pɛrɛn kosɛbɛ sabu ala dɔ don. A dɔrɔ a bɛ miiri fɛn wɛrɛ la wala a bolo degunnen don wala a taara yɔrɔ dɔ la wala a bɛ sunɔgɔ la, aw ka a lakunun.»
[28] O tuma la, u y'a deli ni pɛrɛnkanba ye ka kɛɲɛ ni u ka batoli cogo ye. U ye u yɛrɛw tigɛ ni u ka npanw ni tamaw ye fo ka u joli woyo.
[29] Tile jɛngɛnen, u ye kiraya kɛ fo ka taa se saraka lase waati ma, nka u ma mankan si mɛn, u ma jaabili si ye, fɛn si m'a janto u la.
[30] O tuma la Eli y'a fɔ mɔgɔw bɛɛ ye ko: «A' ye gɛrɛ ne la yan.» Mɔgɔw bɛɛ gɛrɛla a la. O kɔ, Eli ye Matigi ka saraka bɔlan kɔrɔlen cilen dila kulu san fɛ.
[31] A ye kabakurun tan ni fila ta ka kɛɲɛ ni Yakuba denkɛw dama ye, Matigi y'a fɔ o Yakuba ye ko: «I tɔgɔ na da ko Israɛl.»
[32] A ye saraka bɔlan jɔ ni olu ye Matigi tɔgɔ la. A ye dingɛ sen ka saraka bɔlan lamini. Ji litiri bisabaɲɔgɔn kɛra o dingɛ kɔnɔ.
[33] A ye dɔgɔ da saraka bɔlan kan ka ntura waraka ka o da dɔgɔ kan.
[34] O kɔ, a ko: «A' ye daga naani fa ji la ka o bɔn saraka jenita kan dɔgɔ kan.» A ko u ka o kɛ tun. U y'o kɛ. A ko u ka o kɛ siɲɛ kelen tun. U ye o kɛ ko kura.
[35] Ayiwa ji woyora ka saraka bɔlan lamini fo ka dingɛ bɛɛ fa.
[36] Saraka lase waati selen, kira Eli gɛrɛla k'a fɔ ko: «Matigi, Ibrahima ka Ala ni Isaka ka Ala ani Yakuba ka Ala, i k'a jira bi ko i ye Israɛl bɔnsɔn ka Ala ye, ko ne ye i ka jɔnkɛ ye, ko ne ye nin kow bɛɛ kɛ walisa ka i ka kuma bonya.
[37] I ka ne jaabi, Matigi, i ka ne jaabi walisa nin mɔgɔw k'a dɔn ko e Matigi de ye Ala ye, ko e bɛ mɔgɔw dusukun sama ka na i ma.»
[38] O tuma la Matigi ka tasuma jiginna. A ye saraka ni dɔgɔ ni kabakurunw bɛɛ ni buguri jeni ka dingɛ kɔnɔ ji ja.
[39] Mɔgɔw y'o ye tuma min na, u bɛɛ y'u bi k'u ɲɛ biri duguma ka pɛrɛn k'a fɔ ko: «Matigi ye Ala ye! Matigi ye Ala ye!»
[40] Eli y'a fɔ u ye ko: «A' ye Baal ka kiraw bɛɛ minɛ, u si kana dan kɛ.» U ye olu minɛ. Eli jiginna ka taa ni olu ye Kison kɔ da la ka u bɛɛ kan tigɛ yen.
[41] O kɔ, Eli y'a fɔ Akab ye ko: «I ka wuli ka taa dumuni kɛ ka minni kɛ sabu ne tulo bɛ sankulukan na.»
[42] Akab wulila ka taa dumuni kɛ ka minni kɛ, nka Eli yɛlɛnna Karmɛl kulu kan k'i ɲɔgiri k'a ɲɛ biri a kunberew niɲɔgɔn cɛ.
[43] O kɔ, a y'a fɔ a ka baaraden ye ko: «I ka yɛlɛn ka taa kɔgɔji fan filɛ.» O yɛlɛnna ka taa yen filɛ, nka a ko: «Neɲɛ tɛ foyi la.» Eli ko: «I ka taa k'a filɛ,» siɲɛ wolonwula.
[44] A siɲɛ wolonwulanan la baaraden y'a jaabi ko: «Neɲɛ bɛ sankaba fitinin dɔ wulitɔ la ka bɔ kɔgɔji fan fɛ i ko tɛgɛfura.» O tuma la Eli y'a fɔ ko: «I ka taa a fɔ masakɛ Akab ye ko a ka wotoro siri ka taa walisa sanji kana a bali.»
[45] Waati dɔɔnin tɛmɛnnen kɔ, san finna, fiɲɛ cira, sanjiba nana. Akab donna a ka wotoro kɔnɔ ka taa Jizreɛl.
[46] Matigi bolo tun bɛ Eli kan. A y'a cɛ siri ka bila Akab ka wotoroɲɛ ka boli ka taa se fo Jizrɛɛl donda la.