[1] O waati la Jeroboam denkɛ Abija banana.
[2] Jeroboam y'a fɔ a muso ye ko: «Ne b'i deli, i ka wuli ka i cogo yɛlɛma walisa mɔgɔ kana a dɔn ko i ye Jeroboam muso ye. I ka taa kira Akija sɛgɛrɛ Silo, o min y'a to ne kɛra nin mɔgɔw ka masakɛ ye.
[3] I ka taa ni buurukun tan ye i bolo ani buuru misɛn dɔw ni di daga kelen. I ka taa a ka so. Fɛn min na kɛ den ko la, a na o fɔ i ye.»
[4] Jeroboam muso y'o kɛ. A wulila ka taa Akija sɛgɛrɛ Silo. O y'a sɔrɔ Akija tun tɛ se ka yeli kɛ, sabu kɔrɔya tun y'a ɲɛ lafin.
[5] Nka Matigi y'a fɔ kira Akija ye ko: «Jeroboam muso natɔ filɛ ka i ɲininka a denkɛ banalen ko la. I k'a jaabi tan ni tan. Ni a sera yan, a n'a cogo yɛlɛma.»
[6] Muso selen da la, Akija y'a senkan mɛn k'a fɔ a ye ko: «I ka don, Jeroboam muso. Mun kosɔn i ye i yɛrɛ cogo yɛlɛma? Ci gɛlɛnma dira ne ma k'a fɔ i ye.
[7] I ka taa fɔ Jeroboam ye ko Matigi, Israɛl ka Ala ko: ‹Ne de ye i sigi ka kɛ ne ka mɔgɔw Israɛl bɔnsɔn ka masakɛ ye.
[8] Ne ye masaya bɔsi Dawuda ka so la k'a di e ma, nka i ma ne ka baaraden Dawuda ladege, o min ye ne ka ci fɔlenw mara ka tugu ne la ni a dusukun bɛɛ ye. A ma ko jugu kɛ ne ɲɛ kɔrɔ.
[9] I ye ko jugu kɛ ka tɛmɛn i ɲɛ fɛ mɔgɔw bɛɛ kan. I taaraɲɛ fo ka bato fɛn wɛrɛw dila ka nɛgɛ yeele ka ja dɛsɛnen dila ka ne dusu dimin. I ye ne fili i kɔ fɛ.
[10] O de kosɔn ne na bɔnɛ lase Jeroboam ka so ma. Ne na Jeroboam ka so halaki ka bɔ Israɛl bɔnsɔn cɛma, jɔn fara hɔrɔn kan, fo ka taa se a la mɔgɔ fitinin ma. Ne na Jeroboam ka so fura pewu k'a bɔ yen i ko mɔgɔ bɛ nɔgɔ cɛ k'a bɔ yen cogo min na. Hali a tɔ si tɛna to.
[11] A ka so kɔnɔ mɔgɔ minw bɛ sa dugu kɔnɔ, wuluw na olu sogo dun, minw bɛ sa kungo kɔnɔ, sanfɛ kɔnɔw na olu sogo dun. Matigi ye o de fɔ.›
[12] «Ayiwa i ka wuli sisan ka taa so. Ni i sen donna i ka so, o yɔrɔ nin bɛɛ, i den na sa.
[13] Israɛl bɔnsɔn bɛɛ n'a su kasi k'a su don. Ale kelenpe su na don Jeroboam ka so mɔgɔw la, sabu ale kelen ye mɔgɔ ye Jeroboam ka du kɔnɔ, Matigi, Israɛl ka Ala ye ko ɲuman ye min na.
[14] Matigi na masakɛ dɔ sigi Israɛl bɔnsɔn kun na, o na Jeroboam ka du halaki k'a ban. Ɔwɔ, o kow bɛɛ sera ka ban.
[15] Matigi na Israɛl bɔnsɔn gosi i ko buruku kala bɛ lamaga baji la cogo min na. Matigi na Israɛl bɔnsɔn sama ka bɔ nin jamanaɲuman la, a ye o min di u bɛnbaw ma. A na u jɛnsɛn Ufrate ba kɔ fɛ, k'a masɔrɔ u ye boliw dila ka Matigi dusu dimin.
[16] Ala na Israɛl fili katuguni Jeroboam ye jurumu kɛ ka Israɛl bɔnsɔn bila jurumu la.»
[17] Jeroboam muso wulila ka taa se Tirza. A ye a sen don a ka so kɔnɔ tuma min na, den sara.
[18] U y'a su don. Israɛl bɔnsɔn bɛɛ y'a su kasi ka kɛɲɛ ni Matigi ka kuma fɔlen ye a ka baaraden kira Akija da la.
[19] Jeroboam ka ko kɛlen tɔw, a ye kɛlɛ kɛ cogo min na ani a ka masaya cogo, olu bɛɛ sɛbɛnnen bɛ Israɛl bɔnsɔn ka masakɛw ka Tilew Kibaru Kitabu kɔnɔ.
[20] Jeroboam ye san mugan ni fila kɛ masaya la. O kɔ, a kafora a bɛnbaw kan. A denkɛ Nadab kɛra masakɛ ye a nɔ na.
[21] Solomani denkɛ Roboam sigira masaya la Juda bɔnsɔn kun na. A si san binaani ni kelennan la a sigira masaya la. A ye san tan ni wolonwula kɛ masaya la Jerusalɛm, Matigi tun ye o duguɲɛnatɔmɔ Israɛl bɔnsɔn bɛɛ cɛma k'a tɔgɔ da o la. Roboam ba tɔgɔ ko Nama, Amɔn bɔnsɔn dɔ don.
[22] Juda bɔnsɔn ye ko jugu kɛ Matigi ɲɛ kɔrɔ ka keleya don a la u ta fan fɛ ka tɛmɛn u bɛnbaw kan.
[23] Juda cɛw ye batoli kɛ yɔrɔw jɔ u yɛrɛw ye ka jaw dila u yɛrɛw ye kulu janw kan ani jirisunbaw kɔrɔ.
[24] Jamana kɔnɔ cɛw ni musow kɛra jatɔw ye. Matigi ye siya minw gɛn ka bɔ Israɛl bɔnsɔnɲɛ ko haramulen minw kosɔn, u ye olu ɲɔgɔn kɛ.
[25] Roboam ka masaya san duurunan la, Misira masakɛ Sisak taara Jerusalɛm kama
[26] ka Matigi ka so kɔnɔ nafolo ni masakɛ ka so kɔnɔ nafolo bɛɛ minɛ. A ye olu bɛɛ minɛ ka Solomani ka nɛgɛ bɛnnan sanumaw bɛɛ fana minɛ.
[27] Roboam ye nsiranɛgɛ nɛgɛ bɛnnanw dila ka bila olu nɔ na, ka olu di so dakɔlɔsibaaw kuntigiw ma. Olu tun bɛ masakɛ ka so da kɔlɔsi.
[28] Ni masakɛ tun bɛ taa don Matigi ka so kɔnɔ tuma o tuma, kɔlɔsibaaw tun bɛ o nɛgɛ bɛnnanw ta, o kɔ, ka u bila u ka kɔlɔsili kɛ so kɔnɔ.
[29] Roboam ka kɛwale tɔw ni a ka ko kɛlenw sɛbɛnnen bɛ Juda ka masakɛw ka Tilew Kibaru Kitabu kɔnɔ.
[30] Kɛlɛ tun bɛ Roboam ni Jeroboam cɛ tuma bɛɛ.
[31] Roboam sunɔgɔra a bɛnbaw fɛ. U y'a su don a bɛnbaw suw kɛrɛ fɛ Dawuda ka dugu kɔnɔ. Ale ba tɔgɔ ko Nama, Amɔn bɔnsɔn tun don. A denkɛ Abijam sigira masaya la a nɔ na.