[1] Siri masakɛ Ben-Hadad ye a ka kɛlɛbolow bɛɛ lajɛ. Masakɛ bisaba ni fila ni wotorow ni sow tun bɛ a fɛ. A taara daga sigi Samari da la k'a kɛlɛ.
[2] A ye cidenw bila ka taa Israɛl bɔnsɔn ka masakɛ Akab ma k'a fɔ o ye ko Ben-Hadad ko:
[3] «I ka sanu ni i ka warijɛ ye ne ta ye. I musow ni i denw bɛɛ laɲumanw fana ye ne ta ye.»
[4] Israɛl bɔnsɔn ka masakɛ y'a jaabi ko: «Ne matigi masakɛ, o ye tiɲɛ ye. Ne ni ne bolo fɛnw bɛɛ ye i ta ye.»
[5] O kɔ, cidenw kɔseginna ka o kuma fɔ a ye. O tuma la Ben-Hadad ko: «Ne ye ci bila ka taa fɔ i ye ko, i ka i ka sanu ni i ka warijɛ di ne ma, ani i musow ni i denw.
[6] Ayiwa siniɲan tuma, ne na ne ka baaradenw ci ka taa i fɛ yen, olu na i ka so kɔnɔna ni i ka baaradenw ka so kɔnɔnaw bɛɛ narawuli. Fɛn o fɛn ye i ta ye, u na olu ta ka na ni u ye ne fɛ yan.»
[7] O tuma la Israɛl bɔnsɔn ka masakɛ ye a ka cɛkɔrɔbaw bɛɛ wele k'a fɔ olu ye ko: «Aw k'a dɔn k'a jɛya ko nin cɛ b'a fɛ ka ko jugu kɛ an na, katuguni a ye ci bila k'a fɔ ne ye ko ne musow ni ne denw ni ne ka warijɛ ani ne ka sanu bɛɛ ye ale ta ye. Ne sɔnna o ma.»
[8] Cɛkɔrɔbaw ni mɔgɔw bɛɛ ko: «I kana a lamɛn, i kana sɔn foyi ma.»
[9] O tuma la Akab ye Ben-Hadad ka cidenw jaabi ko: «A' ye taa a fɔ ne matigi masakɛ ye ko, a ye fɛn min deli fɔlɔ, ne sɔnna o ma, nka a bɛ min fɛ sisan, ne tɛ sɔn o ma.» Cidenw kɔseginna ka o lakali Ben-Hadad ye.
[10] Ben-Hadad y'a fɔ ko: «Ni Samari cilen buguri sera ka ne nɔfɛ mɔgɔw tɛgɛ fa, ne ka bato fɛnw ka ne faga.»
[11] Nka Israɛl bɔnsɔn ka masakɛ ko: «Min bɛ taa kɛlɛ yɔrɔ la, o man kan ka a yɛrɛ bonya i ko min bɛ na ka bɔ kɛlɛ yɔrɔ la.»
[12] Ben-Hadad ye o kuma mɛn k'a ni masakɛw to minni la finiso kɔnɔ tuma min na, a y'a fɔ a ka baaradenw ye ko: «A' ye aw labɛn ka taa a kɛlɛ.» Olu y'u labɛn ka taa dugu kɛlɛ.
[13] O tuma la kira dɔ taara Israɛl bɔnsɔn ka masakɛ Akab sɛgɛrɛ k'a fɔ a ye ko: «Matigi ko: ‹Iɲɛ tɛ nin jamaba la wa? Ne na olu don i bolo bi yɛrɛ. I n'a dɔn ko ne ye Matigi de ye.›»
[14] Akab y'a ɲininka ko: «Jɔn na kɛ an tilabaa ye?» Kira ko: «Matigi ko: ‹Jamana kɛlɛbolow kuntigiw ka baaradenw na o kɛ.›» Akab ko: «Jɔn fɔlɔ na kɛlɛ daminɛ?» Kira ko: «E yɛrɛ.»
[15] Akab ye jamana kɛlɛbolow kuntigiw ka baaradenw lajɛ yɔrɔ kelen na. Olu bɛɛ lajɛlen tun ye cɛ kɛmɛ fila ni bisaba ni fila ye. O kɔ, a ye Israɛl bɔnsɔn ka kɛlɛbolow bɛɛ lajɛ. Olu bɛɛ lajɛlen kɛra kɛlɛkɛ cɛ waa wolonwula ye.
[16] U bɔra kɛlɛ kama tile gwan fɛ ka Ben-Hadad ni a tɔɲɔgɔn masakɛ cɛ bisaba ni fila to dumuni ni minni la finiso kɔnɔ.
[17] Jamana ka kɛlɛbolow kuntigiw ka baaradenw fɔlɔ gɛrɛla. Ben-Hadad ye kunnafoni ɲini, u y'a jaabi ko: «Samari cɛw bɔra ka na.»
[18] Masakɛ ko: «Ni u nana hɛrɛ kama, aw ka u ɲɛnama minɛ. Ni u nana kɛlɛ kama, aw ka u ɲɛnama minɛ.»
[19] O tuma la jamana kɛlɛbolow kuntigiw ka baaradenw bɔra dugu kɔnɔ, kɛlɛkɛ cɛw tugura u nɔ fɛ.
[20] Mɔgɔw bɛɛ kelen-kelen ye mɔgɔ kelen faga. Israɛl bɔnsɔn ye u nɔgɛn. Siri masakɛ Ben-Hadad yɛlɛnna yɛlɛnkan so kan ka boli, a ni a ka sotigi dɔw.
[21] O cogo la Israɛl bɔnsɔn ka masakɛ bɔra ka sow ni wotorow tiɲɛn. U ye Sirikaw caman faga.
[22] O tuma la kira gɛrɛla Israɛl bɔnsɔn ka masakɛ la k'a fɔ a ye ko: «Taa k'i yɛrɛ barika bonya ka i labɛn sabu san wɛrɛɲan tuma Siri masakɛ bɛ na i kɛlɛ tun.»
[23] Siri masakɛ ka baaradenw y'a fɔ a ye ko: «O mɔgɔw ka bato fɛn ye kulu la bato fɛn ye, o de kosɔn u barika tun ka bon an ta ye. Nka an ka taa u kɛlɛ jɛkɛnɛ la, o cogo la an na se sɔrɔ u kan, siga t'a la.
[24] I ka nin fana kɛ, i ka masakɛw gɛn ka kɛlɛ kuntigiw sigi u nɔ na.
[25] O kɔ, i ka kɛlɛbolo minw fagara, i ka o ɲɔgɔn labɛn tun ani u ka sow ni wotorow ɲɔgɔn fana. An na Israɛl bɔnsɔn kɛlɛ jɛkɛnɛ la ka se sɔrɔ u kan, siga t'a la.» Ben-Hadad ye u ka laadiliw minɛ ka u kɛ.
[26] O san na yɛlɛma, a tɛmɛnna Sirikaw ɲɛ ka taa Afɛk ka Israɛl bɔnsɔn kɛlɛ.
[27] Israɛl bɔnsɔn fana ye kɛlɛ labɛn. Dumuni dira u ma, o kɔ, u taara Sirikaw kunbɛn. Israɛl bɔnsɔn ye ɲɔgɔn lajɛ ka kulu fila sigi Sirikaw ka daga kuntilenna la. Olu kɛra i ko bakulu fitinin fila Sirikaw ɲɛ na, k'a sɔrɔ Sirikaw tun ye jamana fan bɛɛ fa.
[28] O tuma la, Ala ka cɛ gɛrɛla Israɛl bɔnsɔn ka masakɛ la k'a fɔ a ye ko: «Matigi ko: ‹Sirikaw y'a fɔ ko ne, Matigi ye kulu kan bato fɛn ye, ko jɛkɛnɛ bato fɛn tɛ. O de kosɔn ne na nin jamaba don i bolo. Aw n'a dɔn ko ne ye Matigi de ye.›»
[29] O daga fila toraɲɔgɔn kuntilenna la tile wolonwula kɔnɔ. A tile wolonwulanan don, kɛlɛ daminɛna. Israɛl bɔnsɔn ye Sirikaw tiɲɛn kosɛbɛ haali. U ye Sirikaw la cɛ waa kɛmɛ faga don kelen na.
[30] Mɔgɔ tɔ tolenw bolila ka taa Afɛk, nka dugu lamini kogo bira mɔgɔ waa mugan ni wolonwula kan, olu minw tun bolila. Ben-Hadad fana bolila ka taa dugu kɔnɔ ka don a ka bon dogodogo la.
[31] A ka baaradenw y'a fɔ a ye ko: «A filɛ, an y'a mɛn ko Israɛl bɔnsɔn ka masakɛw ye mɔgɔ hinɛmaw ye. I k'a to an ka cafu fini don an kan na ka jurukisɛ siri an kan na ka taa Israɛl bɔnsɔn ka masakɛ sɛgɛrɛ. A dɔrɔ a na i ɲɛnama to.»
[32] O tuma la, u ye cafu fini don u kan na ka jurukisɛ siri u kan na ka taa Israɛl bɔnsɔn ka masakɛ sɛgɛrɛ k'a fɔ a ye ko: «I ka jɔnkɛ Ben-Hadad bɛ i deli ko i ka sɔn ka a ɲɛnama to.» Akab y'a jaabi ko: «Aɲɛnama don halibi wa? Ne balimakɛ don.»
[33] O kuma kɛra taamashyɛnɲuman ye o mɔgɔw ɲɛ na. U tɛliyara k'a fɔ ko: «Ben-Hadad ye i balimakɛ ye.» Akab ko: «A' ye taa ka na n'a ye ne fɛ yan.» Ben-Hadad taara Akab ɲɛ kɔrɔ. O y'a don a ka wotoro kɔnɔ.
[34] Ben-Hadad y'a fɔ Akab ye ko: «Ne fa ye dugu minw minɛ i fa la, ne bɛ olu segin i ma. I na sira dila i yɛrɛ ye Damasi dugu kɔnɔ i ko ne fa ye sira dila Samari cogo min na.» Akab ko: «Ne na i bila ka taa kun min na, o filɛ nin ye, an ka layidu taɲɔgɔn ye.» U ye layidu taɲɔgɔn ye. Akab ye Ben-Hadad bila ka taa.
[35] Kiraw denkɛw la kelen y'a fɔ a tɔɲɔgɔn ye ka kɛɲɛ ni Matigi ka ci fɔlen ye ko: «Ne b'i deli, i ka ne gosi.» Nka a ma sɔn.
[36] O fɔbaa ko: «Sɔɔni, ni an faralaɲɔgɔn na, waraba na i faga katuguni i ma Matigi kan minɛ.» U mabɔlenɲɔgɔn na, a ni waraba bɛnna. O y'a faga.
[37] Kira ye cɛ wɛrɛ ye k'a fɔ o ye ko: «Ne b'i deli, i ka ne gosi.» O cɛ y'a gosi k'a bana.
[38] O kɔ, kira taara i jɔ masakɛ ka sira la. A y'a yɛrɛ cogo yɛlɛma ka fini siri a ɲɛda la.
[39] Masakɛ tɛmɛntɔ o sira fɛ, a pɛrɛnna k'a fɔ masakɛ ye ko: «I ka baaraden tun bɛ kɛlɛ cɛmancɛ la. Mɔgɔ dɔ nana ni cɛ dɔ ye ne ma k'a fɔ ko ne ka o kɔlɔsi, ko ni a tununna, ne ni na bila a ni nɔ na, wala ne na warijɛ waa saba bɔ.
[40] Ayiwa, ka i ka jɔnkɛ bolo degunnen to ko wɛrɛ la, o kasola mɔgɔ bolila.» Israɛl bɔnsɔn ka masakɛ ko: «E ye kiri tigɛ i yɛrɛ kan o kuma fɛ, i na o sara.»
[41] A y'i tɛliya ka fini bɔ a ɲɛda la. Israɛl bɔnsɔn ka masakɛ y'a dɔn ko kiraw la kelen don.
[42] O tuma la kira y'a fɔ a ye ko: «Matigi ko: ‹Ne tun ye mɔgɔ min don i bolo, i ye o bila ka taa. O de kosɔn, i ni na bila o ni nɔ na. I ka mɔgɔw ni na bila a ka mɔgow ni nɔ na.›»
[43] Israɛl bɔnsɔn ka masakɛ ɲɛnasisilen ni a dusu kasilen kɔseginna ka taa a ka so Samari.