[1] Tir masakɛ Hiram y'a mɛn ko Solomani munna ka kɛ masakɛ ye a fa Dawuda nɔ na tuma min na, a y'a ka baaradenw ci Solomani ma, sabu Dawuda ko tun ka di Hiram ye tuma bɛɛ.
[2] Solomani ye ci bila ka taa fɔ Hiram ye ko:
[3] «I y'a dɔn ko ne fa Dawuda ma se ka so jɔ ka Matigi, a ka Ala tɔgɔ da o kan a lamini kɛlɛw kosɔn sani Matigi ka a juguw cɔngɔ a sen kɔrɔ.
[4] Nka sisan Matigi, ne ka Ala ye lafiya di ne ma ne fan bɛɛ la. Ne kɛlɛɲɔgɔn ni ne tɔɔrɔbaa tɛ yen tun.
[5] Ayiwa ne b'a fɛ ka so jɔ Matigi, ne ka Ala ye. Matigi tun kumana ne fa Dawuda fɛ ko: ‹Ne na i denkɛ min sigi masasigilan kan i nɔ na, o de na so jɔ ka ne tɔgɔ da o kan.›
[6] Ayiwa i ka wuli sisan ka ci fɔ mɔgɔw ye ko u ka Liban sedere jiriw tigɛ ne ye. Ne ka baaradenw ni e yɛrɛ ka baaradenw na baara kɛɲɔgɔn fɛ. Ne na olu sara di e ma ka kɛɲɛ ni i ka sara fɔlen ye, sabu e yɛrɛ b'a dɔn ko mɔgɔ si tɛ se ka o jiriw tigɛ i ko Sidɔnkaw.»
[7] Hiram ye Solomani ka kumaw mɛn minkɛ, o diyara a ye kosɛbɛ. A ko: «Ala ka tanu, o min ye denkɛ hakiliman di Dawuda ma ka o siyaba mara.»
[8] O kɔ, a ye Solomani jaabi ko: «Ne ye i ka ci sɔrɔ. I bɛ fɛn o fɛn fɔ sedere jiriw ni sipere jiriw ko la, ne na o bɛɛ kɛ.
[9] Ne ka baaradenw na taa ni o jiriw ye kɔgɔji dala ka bɔ Liban. Ne na u siriɲɔgɔn na walisa u ka taa kɔgɔji kan fo i ka yɔrɔ fɔlen na ka u foni ka bɔɲɔgɔn na yen, walisa i ka u ta. I na min kɛ, o ye ne ka mɔgɔw ka balo dili ye.»
[10] O tuma la Hiram ye sedere jiriw ni sipere jiriw di Solomani ma ka kɛɲɛ ni a mago ye.
[11] O tuma la Solomani ye alikama barikoɲɛ waa saba ni duuru di Hiram ma ani olive tulu litiri waa segin ka a ka so balo. Solomani tun bɛ min di Hiram ma k'a ka so balo san o san, o filɛ o ye.
[12] Ayiwa Matigi ye hakilitigiya di Solomani ma ka kɛɲɛ ni a ka layidu ye. Hɛrɛ tun bɛ Hiram ni Solomani cɛ. U ye layidu taɲɔgɔn ye.
[13] Masakɛ Solomani ye diyagoya baarakɛlaw minɛ ka bɔ Israɛl bɛɛ cɛma. U tun bɛ mɔgɔ waa bisaba bɔ.
[14] A tun bɛ u ci ka taa Liban ka bɔɲɔgɔn kɔrɔ, mɔgɔ waa tan tun bɛ taa kalo o kalo ka kalo kelen kɛ Liban, ka kalo fila kɛ u yɛrɛ ka so. Adoniram tun bɛ diyagoya baara kun na.
[15] Donitalaw cɛ waa biwolonwula tun bɛ Solomani fɛ. Cɛ waa bisegin tun ye kaba dɛsɛlaw ye kuluw kan.
[16] Solomani tun ye cɛ waa saba ni kɛmɛ saba minw ɲɛnatɔmɔ ka bila diyagoya baarakɛlaw kun na, olu sen tun tɛ o la.
[17] Masakɛ ye ci di ko u ka farakurun kunbaɲumanw dɛsɛ ka olu kɛ Alabatosoba jusigilan ye.
[18] Solomani ka bolo la baarakɛlaw ni Hiram ka bolo la baarakɛlaw ani Gebal cɛw, olu ye o farakurunw dɛsɛ ka jiriw tigɛ ani ka so jɔ kabakurunw labɛn.