[1] Masakɛ Solomani ye Israɛl bɔnsɔn bɛɛ mara.
[2] A ka faamaw filɛ ninw ye: sarakalasebaa Zadɔk denkɛ Azaria
[3] ani Sisa denkɛw Elihorɛf ni Akija tun ye sɛbɛnnikɛlaw ye. Akilud denkɛ Josafat tun ye tilew kibaru sɛbɛnnikɛla ye.
[4] Jehojada denkɛ Benaja tun ye kɛlɛbolo kuntigi ye. Zadɔk ni Abiatar tun ye sarakalasebaaw ye.
[5] Natan denkɛ Azaria tun ye koɲɛnabɔlaw kuntigi ye. Natan denkɛ sarakalasebaa Zabud tun ye masakɛ terikɛ ni a ka laadibaa ye.
[6] Akisar tun bɛ so kɔnɔ baarakɛlaw kun na. Abida denkɛ Adoniram tun ye nisɔngɔ minɛla ye.
[7] Kuntigi tan ni fila tun bɛ masakɛ Solomani fɛ Israɛl bɔnsɔn kun na. Olu tun bɛ masakɛ ni a ka mɔgɔw ka dumuni koɲɛnabɔ. U bɛɛ kelen-kelen tun bɛ u niyɔrɔ kalo kelen koɲɛnabɔ san o san.
[8] O kuntigi tɔgɔw filɛ ninw ye: Hur denkɛ tun bɛ Efrayim kulu jamana kun na.
[9] Dekɛr denkɛ tun bɛ Makaz ni Salbim ni Bɛt-Semɛs ni Elɔn-Bɛt-Hanan kun na.
[10] Hesɛd denkɛ tun bɛ Arubɔt. Ale tun bɛ Soko ni Hefɛr jamana bɛɛ kun na.
[11] Abinadab denkɛ tun bɛ Dor mara kun na. Solomani denmuso Tafat tun ye ale muso ye.
[12] Akilud denkɛ Bana tun bɛ Tanak ni Megido ani Bɛt-Sean jamana bɛɛ kun na. Bɛt-Sean mara tun bɛ tɛmɛn Zartan kɛrɛ fɛ Jizreɛl duguma fo ka taa se Abɛl-Mehola fo ka tɛmɛn Jokmeam kan.
[13] Gebɛr denkɛ tun bɛ Ramɔt, Galad jamana la. Manase bɔnsɔn Jair ka duguw tun bɛ a bolo Galad jamana la. Argɔb mara fana tun bɛ a bolo Basan jamana la. Duguba biwɔɔrɔ tun bɛ a ka mara la. Lamini kogow ni nsiranɛgɛ konw tun bɛ o duguw la.
[14] Ido denkɛ Akinadab tun bɛ Mahanayim.
[15] Akimaz tun bɛ Nefitali jamana la. Ale fana ye Solomani denmuso dɔ furu, o tɔgɔ ko Basimat.
[16] Husayi denkɛ Bana tun bɛ Asɛr bɔnsɔn ka mara la Bealɔt.
[17] Paruak denkɛ Josafat tun bɛ Isakar ka mara kun na.
[18] Ela denkɛ Simei tun bɛ Benjamɛn bɔnsɔn cɛma.
[19] Uri denkɛ Gebɛr tun bɛ Galad jamana la. O tun ye Amɔr bɔnsɔn ka masakɛ Sihon ni Basan ka masakɛ Og ka mara ye ka kɔrɔ. Kuntigi kelen tun bɛ o mara bɛɛ kun na.
[20] Juda mɔgɔw ni Israɛl mɔgɔw tun ka ca ka tɛmɛn kɔgɔji dala cɛncɛn kan. U tun bɛ dumuni kɛ ka minni kɛ ka u fa ka ɲagali.
[21] Ka bɔ Ufrate ba dala ka taa bila Filisitikaw ka jamana ni Misirakaw ka jamana dancɛ la, Solomani ye o masayaw bɛɛ mara. O masayaw bɛɛ tun bɛ nisɔngɔ sara ale ye. A ye olu ka kow bɛɛ ɲɛnabɔ a si tile bɛɛ la.
[22] Solomani ka so balo tun bɛ farinimugu barikoɲɛ biduuru bɔ don kelen kɔnɔ aniɲɔmugu barikoɲɛ kɛmɛ
[23] ani misi sirita tɔlɔlen tan ni misi gɛnta mugan ani saga kɛmɛ. Kungo sogow mankalaninw ni minanw ni dajɛw ni kɔnɔ tɔlɔlen minw bɛ so kɔnɔ, olu sen tun tɛ o la.
[24] Solomani ye Ufrate ba yanfan fɛ jamana bɛɛ ni u ka masakɛw mara ka bɔ Tifisak fo ka taa se Gaza. Olu ni u laminiw bɛɛ tun bɛ hɛrɛ la ani o lamini mɔgɔw bɛɛ.
[25] Juda bɔnsɔn ni Israɛl bɔnsɔn lakanalen tun don ka bɔ Dan fo ka taa se Beɛr-Seba. Olu sigilen tun bɛ hɛrɛ la u ka rezɛn sunw ni u ka toro sunw kɔrɔ Solomani si tile bɛɛ la.
[26] Wotoro so mara yɔrɔ waa binaani ani sotigi waa tan ni fila tun bɛ Solomani fɛ.
[27] O kuntigi bɛɛ kelen-kelen tun bɛ masakɛ Solomani ni a kɔrɔsigilaw ka dumuni koɲɛnabɔ. Kuntigi bɛɛ kelen-kelen ye u ka kalo kelen kɛ. Foyi ma dɛsɛ u si la.
[28] U bɛɛ kelen-kelen tun bɛ na u ka waati la ni orjekisɛ ni bin ye masakɛ ka yɔrɔ la so wotorotigiw ni so kɛrɛkɛtigiw kosɔn.
[29] Ala ye hakilitigiyaba ni dɔnniyaba ani faamuli di Solomani ma i ko kɔgɔji dala cɛncɛn.
[30] Solomani ka hakilitigiya bɔɲɔgɔnko si tun tɛ kɔrɔn fɛ mɔgɔw ni Misirakaw si la.
[31] A hakili tun ka bon ka tɛmɛn o waati mɔgɔw bɛɛ ta kan, a tun ka bon ni Zerak bɔnsɔn Etan ta ye ani Makɔl denkɛw Heman ni Kalkɔl ani Darida hakili ye. Solomani tɔgɔ bɔra a lamini siyaw bɛɛ cɛma.
[32] A ye ntalen waa saba da ani dɔnkili waa kelen ni duuru.
[33] A kumana jiriw ko la, k'a daminɛ Liban sedere sunw na fo ka taa a laban hisope sun na min bɛ falen ka bɔ kogo la. A kumana baganw ni kɔnɔw ni fɛn fofotaw ni jɛgɛw ko la.
[34] Mɔgɔw tun bɛ na ka bɔ yɔrɔ bɛɛ la ka Solomani ka hakilitigiya lamɛn. Dugukolo kan masakɛ minw y'a ko mɛn, olu ka mɔgɔw bɛɛ tun bɛ na ka a ka hakilitigiya lamɛn.