[1] Eli ye ko minw kɛ ani a ye Baal ka kiraw bɛɛ faga ni npan ye cogo min na, Akab taara o bɛɛ lakali Jezabɛl ye.
[2] Jezabɛl ye ciden bila ka taa a fɔ Eli ye ko: «Ni ne ma i faga sani siniɲan tuma cɛ i ko i ye o mɔgɔw faga cogo min na, bato fɛnw ka tɔɔrɔ bɛɛ la belebeleba lase ne ma.»
[3] Eli siranna kosɛbɛ. A wulila ka boli walisa k'a ni kisi. A selen Beɛr-Seba Juda jamana la, a ye a ka baaraden to yen.
[4] A yɛrɛ ye kungokolon sira minɛ ka tile kelen taama kɛ ka taa i sigi jirinin dɔ kɔrɔ. A ye saya deli a yɛrɛ ye. A y'a fɔ ko: «Nin ko sera a dan ma, Matigi, i ka ne ni minɛ, k'a masɔrɔ ne man fisa ni ne bɛnbaw ye.»
[5] O kɔ, a y'i da ka sunɔgɔ jirinin kɔrɔ. A filɛ, mɛlɛkɛ dɔ nana maga a la k'a fɔ a ye ko: «Wuli ka dumuni kɛ.»
[6] A ye filɛli kɛ. A ye buuru misɛn jeninen ye takami kan a kun kɔrɔ ani dun jiman. A ye dumuni kɛ ka minni kɛ. O kɔ, a y'i da tun.
[7] Matigi ka mɛlɛkɛ nana a siɲɛ filanan la k'a fɔ a ye ko: «Wuli ka dumuni kɛ, k'a masɔrɔ i ka sira ka jan.»
[8] Eli wulila ka dumuni kɛ ka i min. O dumuni kɛlen kɔ, a ye barika sɔrɔ. A ye tile binaani ni su binaani kɛ taama la fo ka taa se Ala ka kulu Hɔrɛb ma.
[9] A donna kuluwo kɔnɔ ka si yen. Matigi ka kuma sera Eli ma ko: «I bɛ mun kɛ yan, Eli?»
[10] Eli ko: «Keleyaba donna ne la Kɛlɛbolow Matigi kosɔn, katuguni Israɛl bɔnsɔn murutira i ka layidu ma. U ye i ka saraka bɔlanw ci ka i ka kiraw bɛɛ faga ni npan ye. Ne kelenpe de tora, nka u bɛ ne ɲini ka ne faga.»
[11] Matigi y'a fɔ a ye ko «I ka bɔ kɛnɛma ka i jɔ kulu kan Matigi ɲɛ kɔrɔ.» A filɛ, Matigi tɛmɛnna. Matigi ye fiɲɛba ci a ɲɛ fɛ. O fiɲɛ barika bonyara fo ka kulu ci ka faraw karikari, nka Matigi tun tɛ o fiɲɛ la. O fiɲɛba tɛmɛnnen kɔ, dugu kolo yɛrɛyɛrɛla, nka Matigi tun tɛ o dugukolo yɛrɛyɛrɛ la.
[12] Dugukolo yɛrɛyɛrɛ tɛmɛnnen kɔ, tasuma kɛra, nka Matigi tun tɛ o tasuma la. O tasuma tɛmɛnnen kɔ, kumakan ncinin bɔra.
[13] Eli ye o mɛn tuma min na, a y'a ɲɛda datugu ni a ka dulɔkiba ye ka bɔ k'i jɔ kuluwo da la. Kan dɔ y'a fɔ a ye ko: «Eli, i bɛ mun kɛ yan?»
[14] Eli ko: «Keleya bɛ ne la Kɛlɛbolow Matigi Ala kosɔn katuguni Israɛl bɔnsɔn ye i ka layidu tiɲɛn. U ye i ka saraka bɔlanw ci ka i ka kiraw bɛɛ faga ni npan ye. Ne kelenpe tora, nka u bɛ ɲini ka ne faga.»
[15] Nka Matigi y'a fɔ a ye ko: «I ka kungokolon sira minɛ ka taa se fo Damasi. Ni i sera yen tuma min na, i ka Hazaɛl mun k'a kɛ Siri masakɛ ye,
[16] ka Nimsi denkɛ Jehu mun k'a kɛ Israɛl bɔnsɔn ka masakɛ ye. I ka Safat denkɛ Elise fana mun k'a kɛ kira ye i nɔ na. O bɛ Abɛl-Mehola.
[17] Ni mɔgɔ o mɔgɔ kisira Hazaɛl ka npan ma, Jehu na o faga, ni min kisira Jehu ka npan ma, Elise na o faga,
[18] nka ne ye cɛ waa wolonwula mara ne yɛrɛ ye Israɛl la minw ma u ɲɔngiri Baal kɔrɔ, u si ma a da susu.»
[19] Ayiwa Eli bɔra yen ka taa. A ye Safat denkɛ Elise ye. O tun bɛ sɛnɛ kɛ ni misidaba ye, misi fila-fila sigiyɔrɔma tan ni fila tun bɛ a ɲɛ. Elise tun bɛ u tan ni filanan kɔ. Eli gɛrɛla a la ka a ka dulɔkiba fili a kan.
[20] O tuma la Elise y'a ka misiw bila ka boli Eli nɔ fɛ k'a fɔ a ye ko: «A to, ne ka taa ne fa ni ne ba da susu, o kɔ, ne na tugu i la.» Eli ko: «Taa ka na, katuguni ne ye min kɛ i la, i bɛ o dɔn.»
[21] Elise bɔlen Eli kɔrɔ, a ye misi fila minɛ ka u kɛ saraka ye. A ye o misiw sogo tobi ni zu jiriw ye k'olu di a fɛ cɛw ma. O kɔ, a wulila ka tugu Eli nɔ fɛ ka kɛ a ka baaraden ye.