[1] Roboam taara Sisɛm katuguni Israɛl bɔnsɔn bɛɛ y'u lajɛ ko u b'a kɛ masakɛ ye.
[2] Nebat denkɛ Jeroboam ye o mɛn k'a to Misira. A tun bolila masakɛ Solomaniɲɛ ka taa i dogo yen. A tora yen.
[3] U taara a nɔ fɛ. O tuma la Jeroboam ni Israɛl bɔnsɔn bɛɛ kumana Roboam fɛ ko:
[4] «I fa ye doni girin da an kun, nka i ka o doni bɔ an kun sisan. Diyagoya baaraw ni doni girin minw dara an kun i fa fɛ, i ka olu jigin ka bɔ an kun. O tuma la an na baara kɛ i ye.»
[5] A y'u jaabi ko: «A' ye segin fɔlɔ. Tile saba mana tɛmɛn, aw ka ne sɛgɛrɛ yan.» Mɔgɔw bɛɛ taara.
[6] Cɛkɔrɔba minw tun bɛ Roboam fa Solomani ka baara la a si bɛɛ la, a ye olu ɲininka ko: «Aw hakili la, ne ka nin mɔgɔw jaabi cogo di?»
[7] U y'a jaabi ko: «Ni i bɛ baara kɛ nin mɔgɔw ye bi, ka u ka deliliw lamɛn ka kumaɲuman fɔ u ye, u na kɛ i ka baaradenw ye tuma bɛɛ.»
[8] Nka Roboam ma o cɛkɔrɔbaw ka laadili kuma minɛ. A filaɲɔgɔn kamalen minw tun bɛ a fɛ yen ani olu minw tun bɛ baara kɛɲɔgɔn fɛ, a ye olu ɲininka ko:
[9] «Nin mɔgɔw kumana ne fɛ, ko ne fa ye doni girin min da u kun, ko ne ka o nɔgɔya. Ayiwa, aw hakili la, ne ka mun kuma kɛ ka u jaabi?»
[10] A filaɲɔgɔn kamalenw ko: «O mɔgɔ minw y'o fɔ i ye, i ka u jaabi tan ko: ‹Ne bolonkɔni sinnaban ka kunba ni ne fa cɛmancɛ ye.
[11] Ne fa ye doni girin da aw kun, ne na dɔ da aw kun min ka girin o ye. Ne fa ye aw gosi ni gwɛɲɛw ye, ne na aw gosi ni bunteniw ye.›»
[12] O tile sabanan don Jeroboam ye mɔgɔw ɲɛ minɛ ka taa Roboam sɛgɛrɛ ka kɛɲɛ ni masakɛ ka kuma fɔlen ye, ko u ka kɔsegin tile saba tɛmɛnnen kɔ.
[13] Nka masakɛ ye mɔgɔw jaabi ni fariya ye ka cɛkɔrɔbaw ka laadili bila kɛrɛ fɛ.
[14] A y'u jaabi ni a fɛ kamalenw ka kuma fɔlen ye ko: «Ne fa ye doni girin da aw kun, ne na doni girin wɛrɛ da aw kun ka tɛmɛn o kan. Ne fa ye aw gosi ni gwɛɲɛw ye, nka ne yɛrɛ na aw gosi ni bunteniw ye.»
[15] Ayiwa masakɛ ma mɔgɔw lamɛn. O kow bɛɛ tun ye Matigi nɔ ye walisa a tun ye kuma min fɔ Silo kira Akija da la Nebat denkɛ Jeroboam ko la, o ka dafa.
[16] Israɛl bɔnsɔn y'a ye ko masakɛ ma u lamɛn minkɛ, u y'a jaabi ko: «Dawuda ka ko wajibiyalen jumɛn bɛ an kan tun? An tɛna ciyɛn si ta Isayi denkɛ fɛ tun. A' ye taa so, Israɛl. Dawuda, i ka i yɛrɛ ka so kow ɲɛnabɔ.» O cogo la Israɛl bɔnsɔn bɛɛ taara u ka yɔrɔw la.
[17] Israɛl bɔnsɔn minw sigilen tun bɛ Juda bɔnsɔn ka duguw kɔnɔ, olu ye Roboam jate u ka masakɛ ye.
[18] O tuma la masakɛ Roboam ye Adoram ci ka taa Israɛl bɔnsɔn ka yɔrɔw bɛɛ la ka nisɔngɔ minɛ, nka u y'a bon ni kabakurunw ye k'a faga. O tuma la masakɛ Roboam y'i tɛliya ka don wotoro kɔnɔ ka taa Jerusalɛm.
[19] Ayiwa, Israɛl bɔnsɔn murutira Dawuda ka so ma fo ka na se bi ma.
[20] Israɛl bɔnsɔn y'a mɛn ko Jeroboam kɔseginna tuma min na, u y'a wele ka na u lajɛ k'a sigi k'a kɛ Israɛl bɔnsɔn ka masakɛ ye. U si ma tugu Dawuda ka so ni Juda bɔnsɔn nɔ fɛ.
[21] Roboam sera Jerusalɛm tuma min na, a ye Juda ka so bɛɛ lajɛ ani Benjamɛn bɔnsɔn. U kɛra kɛlɛkɛ cɛ ja gɛlɛn cɛ waa kɛmɛ ni bisegin ye walisa ka Israɛl bɔnsɔn kɛlɛ ka masaya segin Solomani denkɛ Roboam ma.
[22] Nka Ala ka kuma sera Ala ka cɛ Semaɛja ma ko:
[23] «I ka kuma Juda ka masakɛ Solomani denkɛ Roboam fɛ ani Juda ka so bɛɛ ani Benjamɛn bɔnsɔn bɛɛ ani mɔgɔ tɔ tolenw fɛ ko:
[24] ‹Matigi ko: «Aw kana taa, aw kana aw balimaw Israɛl bɔnsɔn kɛlɛ. A' ye kɔsegin yan. Aw bɛɛ ka taa aw ka yɔrɔw la sabu nin ko ye ne nɔ ye.» ›» U ye Matigi kan minɛ, u bɛɛ kɔseginna u ka yɔrɔw la ka kɛɲɛ ni Matigi ka kuma fɔlen ye.
[25] Jeroboam ye Sisɛm dugu sigi Efrayim kulu kan ka i sigi yen. O kɔ, a bɔra Sisɛm ka taa Penuɛl sigi.
[26] Ayiwa Jeroboam y'a fɔ a yɛrɛ kɔnɔ ko: «Masaya na segin Dawuda ka so ma don dɔ la.
[27] Ni ne ka mɔgɔw taara saraka faga Jerusalɛm, Matigi ka so kɔnɔ, o mɔgɔw dusukunw na yɛlɛma u matigi, Juda ka masakɛ Roboam fan fɛ. U na ne faga ka kɔsegin Roboam ma.»
[28] O tuma la masakɛ y'i miiri ka misiden bisigi fila dila ni sanu ye. A y'a fɔ mɔgɔw ye ko: «A mɛnna, aw bɛ taa Jerusalɛm. Ayiwa Israɛl, aw ka bato fɛn filɛ, o min ye aw labɔ Misira jamana la.»
[29] A ye o kelen jɔ Bɛtɛl ka kelen jɔ Dan.
[30] A ye jurumu lase u ma, k'a masɔrɔ mɔgɔw tun bɛ taa fo Dan ka sanu misiden kelen bato.
[31] A ye batoli kɛ yɔrɔ fana jɔ ka sarakalasebaa dɔw sigi minw tɛ Levi bɔnsɔn ye.
[32] Ka fara o kan, Jeroboam ye san kalo seginnan tile tan ni duurunan sigi k'a kɛ seli don ye ka sarakaw faga saraka bɔlan kan i ko u delila ka seli kɛ Juda bɔnsɔn cɛma cogo min na. A tora ka o kɛ Bɛtɛl ka o misiden sanu dilalen bato ka sarakaw faga o ye. A tun ye batoli kɛ yɔrɔ min jɔ, a ye sarakalasebaaw sigi olu kun na.
[33] San kalo seginnan tile tan ni duurunan don, Jeroboam tun ye o don min ɲɛnatɔmɔ, a ye o sigi ka kɛ seli don ye Israɛl bɔnsɔn bɛɛ ye. A ye sarakaw lase a ka saraka bɔlan dilalen kan Bɛtɛl ka wusulan suma duman wusu.