[1] Nebat denkɛ Jeroboam ka masaya san tan ni seginnan la, Abijam kɛra Juda ka masakɛ ye.
[2] A ye san saba kɛ masaya la Jerusalɛm. A ba tɔgɔ ko Maka, o tun ye Absalɔm denmuso ye.
[3] A fa ye jurumu minw kɛ a ɲɛ, a taamana olu bɛɛ la. A dusukun ma dafa Matigi, a ka Ala ɲɛ kɔrɔ i ko a bɛnba Dawuda dusukun dafalen tun bɛ cogo min na.
[4] Nka Dawuda kosɔn, Matigi, a ka Ala ye a ka lanpa manalen to a ye Jerusalɛm. A ye denkɛ di Abijam ma ka o sigi masasigilan kan min na Jerusalɛm mara,
[5] katuguni Dawuda ye ko ɲuman kɛ Matigi ɲɛ kɔrɔ a si bɛɛ la. A ma jɛngɛ ka mabɔ Matigi ka ci fɔlenw si la fɔ a ye min kɛ Hɛti bɔnsɔn Uri la.
[6] Kɛlɛ tun bɛ Roboam ni Jeroboam cɛ Roboam si bɛɛ la.
[7] Abijam ka ko tɔw ni a ka kɛwalew, olu bɛɛ sɛbɛnnen bɛ Juda bɔnsɔn ka masakɛw ka Tilew Kibaru Kitabu kɔnɔ. Kɛlɛ tun bɛ Abijam fana ni Jeroboam cɛ.
[8] O kɔ, Abijam sunɔgɔra a bɛnbaw fɛ. U y'a su don Dawuda ka dugu kɔnɔ. A denkɛ Asa sigira masaya la a nɔ na.
[9] Jeroboam ka masaya san mugannan la Israɛl bɔnsɔn kun na, Asa sigira ka kɛ Juda ka masakɛ ye.
[10] A ye san binaani ni kelen kɛ masaya la Jerusalɛm. A ba tɔgɔ ko Maka, o tun ye Absalɔm denmuso ye.
[11] Asa ye ko ɲuman kɛ Matigi ɲɛ kɔrɔ i ko a bɛnba Dawuda y'a kɛ cogo min na.
[12] A ye jatɔw gɛn ka bɔ jamana kɔnɔ ka u bɛnbaw ka boli dilalenw bɛɛ tiɲɛn ka bɔ yen.
[13] A ye a ba Maka yɛrɛ bɔ masamusoya la katuguni a ba tun ye ja haramulen dila k'a kɛ Astarte boli ye. A ye a ka ja dilalen tiɲɛn k'a jeni Sedrɔn kɔ da la.
[14] O bɛɛ n'a ta a ma batoli kɛ yɔrɔw ci, nka a dusukun tora Matigi fɛ a si bɛɛ la.
[15] A fa tun ye fɛn minw di Ala ma, ani a yɛrɛ tun ye fɛn minw di Ala ma, warijɛ ni sanu ani minanw, a ye olu bɛɛ bila Alabatosoba kɔnɔ.
[16] Kɛlɛ tun bɛ Asa ni Israɛl ka masakɛ Baesa cɛ u si bɛɛ la.
[17] Israɛl ka masakɛ Baesa taara ka Juda bɔnsɔn kɛlɛ. A ye Rama dugu barika bonya walisa ka Juda ka masakɛ Asa ka mɔgɔw bali u kana bɔ ka don,
[18] nka warijɛ ni sanu minw tun bɛ Ala ka so ni Asa ka masaya so kɔnɔ, a ye olu bɔ ka u di a ka baaradenw ma, olu ka taa u di Siri masakɛ Ben-Hadad ma. O tun ye Tabirimon denkɛ ye, Tabirimon fa tun ye Hezijon ye. Ben-Hadad sigilen tun bɛ Damasi. A y'a fɔ o ye ko:
[19] «Layidu ka don an cɛ, i ko a tun bɛ i fa ni ne fa cɛ cogo min na. A filɛ, ne bɛ nin bonya warijɛ ni sanu bila ka taa di i ma. Ayiwa sisan layidu min bɛ e ni Israɛl masakɛ Baesa cɛ, i ka o tiɲɛn walisa a ka mabɔ ne la.»
[20] Ben-Hadad ye masakɛ Asa ka kuma minɛ. A ye a ka kɛlɛbolo kuntigiw ci ka taa Israɛl bɔnsɔn ka duguw kama. U ye se sɔrɔ Ijɔn ni Dan ni Abɛl-Bɛt-Maka ani Kinerɔt duguw ani Nefitali bɔnsɔn ka jamana bɛɛ kan.
[21] O kibaru selen Baesa ma, a ye Rama jɔli dabila ka taa Tirza.
[22] O tuma la masakɛ Asa ye Juda cɛw bɛɛ wele. Baesa tun ye kabakurunw ni jiri minw bɛɛ kɛ ka Rama jɔ, u ye olu bɛɛ ta. Masakɛ Asa ye Geba ni Mizpa duguw jɔ ni olu ye Benjamɛn bɔnsɔn ka jamana la.
[23] Asa ka ko tɔw ani a ka kɛlɛ kow ani a ka dugu jɔlenw bɛɛ sɛbɛnnen bɛ Juda ka masakɛw ka Tilew Kibaru Kitabu kɔnɔ. A kɔrɔlen, a senw banana.
[24] Asa sunɔgɔra a bɛnbaw fɛ. U y'a su don a fa Dawuda ka dugu kɔnɔ. A denkɛ Josafat sigira masaya la a nɔ na.
[25] Juda ka masakɛ Asa ka masaya san filanan la, Jeroboam denkɛ Nadab sigira masaya la Israɛl kun na. A ye san fila kɛ masaya la.
[26] A ye ko jugu kɛ Matigi ɲɛ kɔrɔ. A taamana a fa ka siraw fɛ ka muruti Matigi ma ka a fa ka jurumu kɛlenɲɔgɔn kɛ, o de ye Israɛl bila jurumu la.
[27] Akija denkɛ Baesa min bɔra Isakar bɔnsɔn na, o wulila a kama. Ka Nadab ni Israɛl bɔnsɔn bɛɛ to Gibetɔn, Filisitikaw ka yɔrɔ la, Baesa y'a faga Gibetɔn.
[28] Juda ka masakɛ Asa ka masaya san sabanan la, Baesa ye Nadab faga ka i sigi a nɔ na.
[29] Baesa sigira masaya la tuma min na, a ye Jeroboam ka so halaki. Hali u la mɔgɔ kelen ma to. A ye u bɛɛ halaki ka u ban ka kɛɲɛ ni Matigi ka kuma fɔlen ye kira Akija da la Silo.
[30] O kɛra katuguni Jeroboam ye jurumu kɛ ka Israɛl fana bila jurumu la ka Matigi, Israɛl ka Ala dusu dimin.
[31] Nadab ka ko tɔw ni a ka ko kɛlenw, olu bɛɛ sɛbɛnna Israɛl bɔnsɔn ka masakɛw ka Tilew Kibaru Kitabu kɔnɔ.
[32] Kɛlɛ tun bɛ Asa ni Israɛl bɔnsɔn ka masakɛ Baesa cɛ u si bɛɛ la.
[33] Juda ka masakɛ Asa ka masaya san sabanan la, Akija denkɛ Baesa kɛra Israɛl bɔnsɔn bɛɛ ka masakɛ ye. A ye san mugan ni naani kɛ masaya la Tirza.
[34] A ye ko jugu kɛ Matigi ɲɛ kɔrɔ ka Jeroboam ka siraw taama ka o ka jurumu kɛlenw ɲɔgɔn kɛ ka Israɛl bɔnsɔn bila jurumu la.