[1] Ayiwa masakɛ Solomani ye jamana wɛrɛ musow caman furu ka olu fara Faraon denmuso kan, Moab bɔnsɔn ni Amɔn bɔnsɔn ni Edɔmkaw ni Sidɔnkaw ani Hɛti bɔnsɔn denmusow.
[2] Matigi tun y'a fɔ Israɛl bɔnsɔn ye o siyaw ko la ko: «Aw kana u furu, aw kana aw denw furu u ma, katuguni u na aw dusukunw fara ka taa u ka bato fɛnw nɔ fɛ, siga t'a la.» Solomani ye o musow kanu ka nɔrɔ u la.
[3] Masakɛw denmusow kɛmɛ wolonwula ni jɔnmuso kɛmɛ saba tun bɛ Solomani kun. A musow ye a dusukun yɛlɛma ka mabɔ Ala la.
[4] Solomani kɔrɔlen, a musow y'a dusukun yɛlɛma bato fɛn wɛrɛw nɔ fɛ. A dusukun dafalen tun tɛ Matigi, a ka Ala ɲɛ kɔrɔ i ko a fa Dawuda tun bɛ cogo min na.
[5] Solomani ye baara kɛ Sidɔnkaw ka bato fɛn musoma Astarte boli ani Amɔn bɔnsɔn ka bato fɛn haramulen Milkom ye.
[6] Solomani ye ko jugu kɛ Matigi ɲɛ kɔrɔ, a ma kɛ kantigi ye i ko a fa Dawuda y'a kɛ cogo min na.
[7] Ayiwa Solomani ye batoli kɛ yɔrɔ dɔ jɔ kulu kan Jerusalɛm kuntilenna la Moab bɔnsɔn ka bato fɛn haramulen Kemas ye, ka batoli kɛ yɔrɔ dɔ jɔ Amɔn bɔnsɔn ka bato fɛn haramulen Molɔk fana ye.
[8] A y'o bɛɛ kɛ a ka jamana wɛrɛ musow kosɔn. Olu tun bɛ wusulan suma duman wusu ka sarakaw lase u ka bato fɛnw ye.
[9] Matigi diminna Solomani kɔrɔ, k'a masɔrɔ a dusukun jɛngɛna ka mabɔ Matigi, Israɛl ka Ala la, o min y'i jira a la siɲɛ fila,
[10] k'a bali bato fɛn wɛrɛw batoli la, nka a ma Matigi ka ci fɔlenw mara.
[11] O de y'a to Matigi y'a fɔ Solomani ye ko: «I taamana nin cogo la, ne ye layidu ni sariya minw sɛbɛn i ye, i ma kɛ kantigi ye olu ko la. O de kosɔn ne na masaya bɔsi i la k'a di i ka baaraden ma.
[12] O bɛɛ n'a ta ne tɛna o kɛ i si tilew la i fa Dawuda kosɔn. Ne na o masaya bɔ i denkɛ bolo.
[13] O bɛɛ n'a ta ne tɛna a bɛɛ bɔsi a la, nka ne na siya kelen to i denkɛ bolo, ne ka baaraden, i fa Dawuda ni ne ka duguɲɛnatɔmɔlen Jerusalɛm kosɔn.»
[14] Ayiwa Matigi ye jugu dɔ lawuli Solomani kama, o tɔgɔ ko Hadad. A bɔra Edɔm jamana la, u ka masakɛ den dɔ don.
[15] Dawuda ye Edɔm kɛlɛ waati min na, kɛlɛbolo kuntigi Joab taara Israɛl kɛlɛkɛ cɛ salenw suw don. A ye Edɔm cɛw bɛɛ faga o waati la,
[16] katuguni Joab ye kalo wɔɔrɔ kɛ Israɛl bɔnsɔn ka kɛlɛkɛ cɛw fɛ yen ka Edɔm den cɛmaw bɛɛ faga.
[17] Hadad tun ye denmisɛn ye o waati la. Hadad ni a fa ka baaradenw bolila ka bɔ Edɔm ka taa Misira jamana la.
[18] U wulila ka bɔ Madian jamana la ka taa se Paran. O kɔ, Paran cɛ dɔw farala u kan ka taa Misira masakɛ Faraon sɛgɛrɛ. O ye so di Hadad ma k'i janto a la ka dugukolo dɔ di a ma.
[19] Hadad ko diyara masakɛ Faraon ye kosɛbɛ. O ye a yɛrɛ muso Takpenɛs dɔgɔmuso furu Hadad ma.
[20] O ye denkɛ bange Hadad ye, a tɔgɔ ko Genubat. Takpenɛs y'a lamɔ masakɛ ka so kɔnɔ masakɛ denw cɛma.
[21] Hadad y'a mɛn k'a to Misira ko Dawuda kafora a bɛnbaw kan tuma min na, ko kɛlɛbolo kuntigi Joab fana sara, a y'a fɔ Faraon ye ko: «I ka ne bila, ne ka taa ne ka jamana la.»
[22] Faraon y'a ɲininka ko: «Mun dɛsɛra i la ne fɛ yan fo i b'a fɛ ka taa i ka jamana la?» A ye Faraon jaabi ko: «Foyi, nka o bɛɛ n'a ta, i ka ne bila ka taa.»
[23] Ala ye jugu wɛrɛ lawuli Solomani kama. O tun ye Elijada denkɛ Rezon ye. O tun bolila ka bɔ a matigi, Zoba masakɛ Hadadezɛr ka so.
[24] A ye mɔgɔ dɔw lajɛ a yɛrɛ kɔrɔ ka kɛ olu kuntigi ye. A ni olu taara Damasi ka sigi yen. A ye yen masaya minɛ ka kɛ masakɛ ye.
[25] Rezon kɛra Israɛl jugu ye Solomani si bɛɛ la. Ale ni Hadad ka ko jugu kɛra waati kelen na Israɛl bɔnsɔn la. A ye Israɛl koniya k'a to Siri masaya la.
[26] Efrayim bɔnsɔn Nebat denkɛ Jeroboam ka bɔ Zereda dugu kɔnɔ, o ye Solomani ka baaraden dɔ ye. O wulila Solomani kama k'a kɛlɛ. A ba tun ye muso cɛ salen ye. O tɔgɔ ko Zerua.
[27] Jeroboam wulila masakɛ kama ko min na, o filɛ nin ye. Solomani tun ye Milo jɔ ka a fa Dawuda ka dugu tiɲɛn yɔrɔw labɛn,
[28] k'a sɔrɔ Jeroboam tun ye kamalen barikama cɛ ja gɛlɛn ye. Solomani y'a ka ko kɛtaw ye minkɛ, a ye ale kɛ Yusufu bɔnsɔn ka faama baaraw kuntigi ye.
[29] Jeroboam bɔra Jerusalɛm o waati la, kira Akija min bɔra Silo, a ni o bɛnna. Dulɔki kura tun bɛ Akija kan na. U fila bɛnna kungo kɔnɔ.
[30] Dulɔki kura min tun bɛ Akija kan na, Akija ye o minɛ k'a fara ka kɛ kunkurun tan ni fila ye.
[31] O kɔ, k'a fɔ Jeroboam ye ko: «I ka kunkurun tan minɛ k'a masɔrɔ Israɛl ka Ala ko: ‹A filɛ, ne na masaya bɔsi Solomani la ka siya tan di e ma.
[32] Nka siya kelen na to a bolo ne ka jɔnkɛ Dawuda ni Jerusalɛm kosɔn, o ye ne ka duguɲɛnatɔmɔlen ye ka bɔ Israɛl bɔnsɔn bɛɛ cɛma.
[33] O bɛ kɛ sabu Israɛl bɔnsɔn ye ne bila ka u biri Sidɔnkaw ka Astarte boli kɔrɔ ani Moab bɔnsɔn ka bato fɛn Kemas ani Amɔn bɔnsɔn ka bato fɛn Milkom kɔrɔ. U ma ne ka siraw taama. U ma ko tilennenw kɛ ne ɲɛ kɔrɔ. U ma ne ka ci fɔlenw ni ne ka sariyaw mara i ko Solomani fa Dawuda y'a kɛ cogo min na.
[34] O bɛɛ n'a ta ne tɛna fanga bɛɛ bɔsi Solomani la, masaya fan kelen na to a bolo. Ne na masaya di a ma a si bɛɛ la, ne ka jɔnkɛ Dawuda kanuya kosɔn, ne ye o min ɲɛnatɔmɔ. O ye ne ka ci fɔlenw ni ne ka ko latigɛlenw mara,
[35] nka ne na masaya bɔsi a denkɛ la, ne na siya tan di i ma.
[36] Ne na siya kelen to a denkɛ bolo walisa ne ka jɔnkɛ Dawuda ka lanpa manalen ka to ne ɲɛ kɔrɔ Jerusalɛm, ne ka duguɲɛnatɔmɔlen na walisa ka ne tɔgɔ mara.
[37] Ne na i ta, i na sigi i sagona mɔgɔw bɛɛ kun na. I na kɛ Israɛl bɔnsɔn ka masakɛ ye.
[38] Ni i ye ne ka ciw bɛɛ mara ka taama ne ka siraw fɛ, ka ko tilennenw kɛ ne ɲɛ kɔrɔ ka ne ka ci fɔlenw ni ne ka ko latigɛlenw bɛɛ kɛ i ko ne ka jɔnkɛ Dawuda y'a kɛ cogo min na, o tuma la ne na to i fɛ. Ne na i ka so sabati i ko ne y'a kɛ Dawuda ye cogo min na. Ne na Israɛl bɔnsɔn di i ma.
[39] Ne na Dawuda bɔnsɔn majigin nka o tɛna kɛ tuma bɛɛ.›»
[40] O de kosɔn Solomani tun b'a fɛ ka Jeroboam faga nka Jeroboam bolila a ɲɛ ka taa Misira jamana la, Misira masakɛ Sisak ka so. A tora yen fo ka Solomani sa.
[41] Solomani ka ko tɔw ni a ka ko kɛlenw ni a ka hakilitigiya kow, olu bɛɛ sɛbɛnnen bɛ a ka kitabu kɔnɔ.
[42] Solomani ye san binaani kɛ masaya la Israɛl bɔnsɔn kun na Jerusalɛm.
[43] O kɔ, Solomani kafora a bɛnbaw kan. A su donna a fa Dawuda ka dugu kɔnɔ. A denkɛ Roboam sigira masaya la a nɔ na.