[1] O tuma la Solomani ye Israɛl bɔnsɔn cɛkɔrɔbaw ni Israɛl kuntigiw ni gwatigiw bɛɛ lajɛ a kɔrɔ Jerusalɛm walisa u ka taa Ala ka layidu wagande nɔ fɛ Dawuda ka dugu kɔnɔ, o bɛ wele fana ko Sion.
[2] Israɛl bɔnsɔn bɛɛ ye ɲɔgɔn lajɛ masakɛ Solomani kɔrɔ Etanim kalo la seli waati la, o ye san kalo wolonwulanan ye.
[3] Israɛl cɛkɔrɔbaw bɛɛ selen, sarakalasebaaw ye Matigi ka wagande ta
[4] ka taa ni o niɲɔgɔn kunbɛn finiso ani o minan senumaw bɛɛ ye. Sarakalasebaaw ni Levitew taara ni u ye.
[5] Masakɛ Solomani ni Israɛl bɛɛ ye ɲɔgɔn lajɛ ka u jɔ wagandeɲɛ fɛ. U ye sagadenw ni misi minw bɔ saraka ye, mɔgɔ si tun tɛ se ka olu dama dɔn.
[6] Sarakalasebaaw donna ni Matigi ka layidu wagande ye a sigi yɔrɔ la Alabatosoba kɔnɔ yɔrɔ senuma senuma kɔnɔ serubɛnw kamanw jukɔrɔ.
[7] Serubɛnw kamanfuraw sɛɛnɛlen ye ɲɔgɔn bɛn wagande kun na. U kamanw ye wagande ni a ta berew datugu.
[8] A cɛtigɛ jiriw tun ka jan fo i tun bɛ se ka u ye yɔrɔ senuma senuma kɔ fɛ, nka u tun tɛ ye kɛnɛma. U tora o so kɔnɔ fo ka na se bi ma.
[9] Foyi tun tɛ layidu wagande kɔnɔ ni kabakurun walaha fila tɛ. Musa ye olu bila yen k'a to Hɔrɛb, Ala ye layidu ta Israɛl bɔnsɔn ye tuma min na, u bɔ tuma la Misira jamana la.
[10] Sarakalasebaaw bɔra yɔrɔ senuma kɔnɔ tuma min na, kabasen ye Matigi ka so yɔrɔ bɛɛ fa.
[11] Sarakalasebaaw tun tɛ se ka to yen ka u ka baara kɛ o kabasen kosɔn, katuguni Matigi ka kabasen tun ye Matigi ka so fa.
[12] O tuma la Solomani kumana k'a fɔ ko: «Matigi y'a fɔ ko ale na sigi sankaba fin na dibi la,
[13] ne ye sigi so jɔ i ye, i ka sigi o kɔnɔ badaa.»
[14] Masakɛ y'i yɛlɛma Israɛl bɔnsɔn jama fan fɛ ka dubaw kɛ u ye. Israɛl bɔnsɔn bɛɛ wulila k'u jɔ.
[15] A y'a fɔ u ye ko: «Matigi, Israɛl ka Ala ka tanu. Ala min kumana ne fa Dawuda fɛ ka a ka layidu dafa ni sebaayaba ye k'a fɔ ko:
[16] ‹Kabini ne ye ne ka mɔgɔw Israɛl bɔnsɔn labɔ Misira don min na, ne ma dugu siɲɛnatɔmɔ Israɛl bɔnsɔn cɛma ka ne ka so jɔ yen, walisa ne tɔgɔ ka da o kan, nka ne ye Dawudaɲɛnatɔmɔ walisa ale ka sigi ne ka mɔgɔ Israɛl bɔnsɔn kun na.›
[17] «O bɛɛ n'a ta ne fa Dawuda tun b'a fɛ ka so jɔ ka Matigi, Israɛl ka Ala tɔgɔ da o kan,
[18] nka Matigi Ala y'a fɔ ne fa Dawuda ye ko: ‹Ni i b'a fɛ ka so jɔ ne ye ka ne tɔgɔ da o kan, o miirili diyara ne ye,
[19] nka e tɛna o so jɔ ne ye fɔ i denkɛ min na bange i fɛ, o de na so jɔ ne ye ka ne tɔgɔ da o kan.›
[20] «Matigi ye a ka kuma fɔlen dafa. Ne wulila ne fa Dawuda nɔ na ka sigi Israɛl bɔnsɔn ka masasigilan kan i ko Matigi tun y'a fɔ cogo min na. Ne ye nin so jɔ Matigi, Israɛl ka Ala tɔgɔ la.
[21] Matigi ka layidu wagande ka kan ka sigi yɔrɔ min na, ne ye o labɛn, o layidu min tara an bɛnbaw ye u bɔ tuma la Misira jamana la.»
[22] O kɔ, Solomani taara i jɔ Matigi ka saraka bɔlanɲɛ fɛ Israɛl bɔnsɔn jama bɛɛ ɲɛ kɔrɔ, k'a bolow kɔrɔta san fɛ
[23] k'a fɔ ko: «Matigi, Israɛl ka Ala, i bɔɲɔgɔnko Ala si tɛ sankolo la wala dugukolo kan yan. I kɛra kantigi ye i ka layidu talen ko la i ka baaradenw ye. I falen bɛɲumaya la i sago kɛbaaw bɛɛ ta fan fɛ i ɲɛ kɔrɔ.
[24] Ka fara o kan, i tun ye layidu min ta i ka baaraden, ne fa Dawuda ye, i ye o dafa. I da tun ye min fɔ, i bolo ye o dafa bi.
[25] Ayiwa sisan, Matigi, Israɛl ka Ala, i ye layidu min ta ne fa Dawuda ye ko: ‹Ni i denw taamana ni tilennenya ye ne ɲɛ kɔrɔ i ko i yɛrɛ taamana ne ɲɛ kɔrɔ cogo min na, i bɔnsɔn tɛna dɛsɛ Israɛl ka masasigilan kan tuma si.›
[26] Ayiwa sisan, Matigi, Israɛl ka Ala, i ka i ka layidu dafa ne fa Dawuda, i ka baaraden ye.
[27] «Nka sɛbɛ la, e Ala na sigi dugukolo kan wa? Hali sankolow bɛɛ kunna sankolow ka dɔgɔ i la, janko ne ka nin so dilalen.
[28] O bɛɛ n'a ta, Matigi, ne ka Ala, i ka i janto i ka baaraden ka delili la ka i tulo majɔ ka i ka baaraden kasikan ni a ka deliliba lamɛn, a bɛ olu minw lase i ma bi.
[29] I ɲɛ jɔlen ka to nin so kan su fara tile kan, sabu i y'a fɔ nin yɔrɔ ko la ko: ‹Ne tɔgɔ na da a kan.› I ka baaraden bɛ delili min kɛ ka a ɲɛ sin nin yɔrɔ ma, i ka o lamɛn.
[30] Ni i ka baaraden ani Israɛl mɔgɔw ye delili kɛ k'u ɲɛ sin nin yɔrɔ ma, i ka u ka deliliw jaabi. Ɔwɔ, i ka u ka deliliw jaabi ka i to i sigi yɔrɔ la sankolo la. I ka u ka deliliw lamɛn ka yafa u ma.
[31] «Ni mɔgɔ dɔ ye a mɔgɔɲɔgɔn hakɛ ta, ni o wajibiyara ka kalili kɛ, ni u nana o ɲɛnabɔ i ka saraka bɔlanɲɛ fɛ nin so kɔnɔ,
[32] i ka i tulo majɔ ka i to sankolo la ka i ka jɔnw kiri tigɛ ka jalakitigi jalaki, ka a ka tilenbaliya bi a yɛrɛ kan, ka jo di mɔgɔ tilennen ma ka kɛɲɛ ni a ka tilennenya ye.
[33] «Ni i ka mɔgɔw, Israɛl bɔnsɔn gosira u juguw fɛ u ka tilenbaliya kosɔn, ni u kɔseginna i ma ka i tɔgɔ bonya ka i tɔgɔ wele nin so kɔnɔ ni delili ni delilibaw ye,
[34] i ka u kan lamɛn ka i to sankolo la ka i ka mɔgɔw Israɛl bɔnsɔn ka jurumuw yafa u ma. I ye jamana min di u bɛnbaw ma, i ka u ladon o kɔnɔ tun.
[35] «Ni sankolo datugura fo sanji tɛ na katuguni u ye i hakɛ ta, ni u ye delili kɛ ka u ɲɛ sin nin yɔrɔ ma ka i tɔgɔ bonya, ni u yɛlɛmana ka fara u ka jurumu la k'a masɔrɔ i ye u tɔɔrɔ,
[36] e ka u lamɛn ka i to sankolo la ka i ka jɔnw Israɛl bɔnsɔn ka jurumuw yafa u ma. U ka kan ka taama siraɲuman min fɛ, i ka o jira u la, ka sanji di i ka jamana ma, i ye o min di u ma k'a kɛ u ciyɛn ye.
[37] «Ni kɔngɔba ni fiɲɛbana niɲɔ diro ni ja ni ntɔnw ani ntumuw donna jamana kɔnɔ, ni u juguw dagara u ka duguw da la u ka jamana la, ni fiɲɛbana ni bana sifa o sifa ye u sɔrɔ,
[38] ni mɔgɔ dɔ sɔrɔla i ka mɔgɔw cɛma ka delili kɛ, ni Israɛl bɔnsɔn bɛɛ kelen-kelen ye u ka dusukun juguya dɔn ka na nin so kɔnɔ,
[39] e ka u kan lamɛn ka i to sankolo la, i sigi yɔrɔ la. I ka yafa u ma ka u ka deliliw lamɛn, e min bɛ mɔgɔw bɛɛ kelen-kelen dusukun dɔn, sabu e kelenpe bɛ Hadamadenw bɛɛ dusukun na ko dɔn.
[40] I ka o kɛ walisa u ka siran i ɲɛ tuma bɛɛ ka u to nin jamana la, i ye o min di u bɛnbaw ma.
[41] «Ni dunan min ye i tɔgɔ mɛn, ni o tɛ i ka siya Israɛl dɔ ye, nka a bɔra jamana jan dɔ la ka na,
[42] i bolo barikama ni i bolo mɔɔnɔbɔlen kosɔn, ni o dunan nana delili kɛ nin so kɔnɔ,
[43] e, ka i to sankolo la, ka o ka fɛn delilenw kɛ a ye walisa dugukolo kan mɔgɔw bɛɛ ka i tɔgɔba dɔn. U na i bonya i ko i ka mɔgɔw Israɛl bɔnsɔn bɛ i bonya cogo min na. O tuma la u n'a dɔn ko ne ye nin so min jɔ, ko e tɔgɔ bɛ wele o kɔnɔ.
[44] «Ni i ka mɔgɔw bɔra ka taa u juguw kama ka u kɛlɛ, ni i ye u ci ka taa sira o sira fɛ, ni u ye u ɲɛ sin i ka duguɲɛnatɔmɔlen ma ani ne ye so min jɔ i tɔgɔ la ka i deli,
[45] e ka u ka deliliw lamɛn ka i to sankolo la ka u dɛmɛ.
[46] «Ni Israɛl bɔnsɔn ye i hakɛ ta, k'a masɔrɔ mɔgɔ si jurumu kɛbali tɛ, ni i diminna u kɔrɔ ka u don u juguw bolo, ni olu ye u cɛ ka taa ni u ye jamana wɛrɛ la ka u kɛ jɔnw ye o jugu ka jamana jan na wala jamana surun na,
[47] ni u hakili seginna u ma ka u to o jamana kɔnɔ, ni u kɔseginna i ma ka i deli ka u to u juguw ka dugukolo kan, ni u ko: ‹An ye jurumu kɛ ka kojuguba kɛ, an ye ko bɛnbali kɛ,›
[48] ni u kɔseginna i ma ni u dusukun ni u ni bɛɛ ye ka u to u juguw ka jamana la, olu minw taara ni u ye ka u kɛ jɔnw ye, ni u ye i deli ka u ɲɛ sin u bɛnbaw ka jamana ma ani nin dugu ma, i ye o min ɲɛnatɔmɔ ani nin so ma, ne ye o min jɔ i ye i tɔgɔ la,
[49] e ka u ka deliliw ni u ka delilibaw jaabi ka i to sankolo la ka u dɛmɛ.
[50] I ka i ka mɔgɔw ka jurumuw yafa u ma ani u ka tilenbaliya kow. I ka u hinɛ don u juguw la walisa olu ka hinɛ u la,
[51] k'a masɔrɔ Israɛl bɔnsɔn ye i ka ciyɛn ye, e de ye u labɔ Misira jamana la gwantugu tasumaba cɛma.
[52] «Matigi Ala, i ka i ɲɛ jɔ i ka jɔn ni i ka mɔgɔw Israɛl bɔnsɔn na u ka delili waati la, ka u dɛmɛ ka u jaabi,
[53] k'a masɔrɔ i ye u fara ka bɔ dugukolo kan mɔgɔw bɛɛ la walisa u ka kɛ i ciyɛn ye i ko i y'a fɔ i ka jɔnkɛ Musa da la cogo min na an bɛnbaw labɔ tuma la i fɛ Misira.»
[54] Solomani tilara a ka delili ni delilibaw la Matigi fɛ tuma min na, ka a bolow kɔrɔtalen to san fɛ, a wulila ka bɔ a kunberew kan Matigi ka saraka bɔlanɲɛ kɔrɔ.
[55] K'a jɔlen to a y'a kan kɔrɔta ka dubaw kɛ Israɛl bɔnsɔn jama bɛɛ ye ko:
[56] «Matigi ka tanu, ale min ye nin lafiya di a ka mɔgɔw Israɛl bɔnsɔn ma ka kɛɲɛ ni a ka layidu ye. A ye kumaɲuman minw fɔ a ka jɔnkɛ Musa da la, o si ma to min ma kɛ ka dafa.
[57] Matigi, an ka Ala ka to an fɛ i ko a tora an bɛnbaw fɛ cogo min na. A kana an bila, a kana an to yen fewu,
[58] nka a ka an dusukunw ɲɛ sin a yɛrɛ ma walisa an ka taama a ka siraw fɛ ka a ka ci fɔlenw ni a ka sariyaw ni a ka ko fɔlenw mara, a ye o minw fɔ an bɛnbaw ye.
[59] Ne ye kuma minw fɔ ka deliliba minw kɛ, olu ka to Matigi, an ka Ala kɔnɔ su fara tile kan. Matigi, an ka Ala ka miiri olu la ka a ka baaraden ni a ka mɔgɔw, Israɛl bɔnsɔn magoɲɛ ka kɛɲɛ ni u ka don o don mago ye.
[60] O de n'a to dugukolo kan mɔgɔw bɛɛ k'a dɔn ko Matigi ye Ala ye, ko a bɔɲɔgɔnko si tɛ.
[61] Ayiwa, aw dusukun ka kɛ Matigi aw ka Ala ta ye ka a ka sariya sigilenw kɛ ka a ka ci fɔlenw mara i ko aw b'a kɛ cogo min na bi.»
[62] Masakɛ ni Israɛl bɔnsɔn bɛɛ ye sarakaw faga Matigi ɲɛ kɔrɔ.
[63] Solomani ye ntura waa mugan ni fila ani saga waa kɛmɛ ni mugan kɛ nisɔndiya saraka ye Matigi ɲɛ kɔrɔ. Ayiwa, masakɛ ni Israɛl bɔnsɔn ye o so di Ala ma ka o seli kɛ.
[64] Masakɛ ye dukɛnɛ cɛmancɛ bila Ala ye k'a saniya o don na. A ye saraka jenitaw ni nisɔndiya sarakaw ani kɛn saraka kɔrɔtataw bɔ yen, k'a masɔrɔ nsiranɛgɛ saraka bɔlan min sigilen tun bɛ Matigi ka soɲɛ fɛ, o tun ka dɔgɔ. Saraka jenitaw ni kɛn saraka kɔrɔtataw ani nisɔndiya sarakaw ma kun a kan.
[65] Solomani ni Israɛl bɔnsɔn bɛɛ ye o seli kɛ o waati la. Jamaba bɔra yɔrɔ bɛɛ, ka bɔ Hamat ka taa se Misira kɔji da la. Olu bɛɛ ye ɲɔgɔn lajɛ Matigi, an ka Ala ɲɛ kɔrɔ tile wolonwula kɔnɔ. U ye tile wolonwula wɛrɛ kɛ, o bɛɛ lajɛlen kɛra tile tan ni naani ye.
[66] A tile seginnan don Solomani ye mɔgɔw bila ka taa. U ye duba ta masakɛ ye ka segin so. U ɲagalilen nisɔndiyara Matigi ka ɲumaya kɛlen kosɔn a ka jɔnkɛ Dawuda ni a ka mɔgɔw Israɛl ye.