[1] Solomani tilalen kɔ Matigi ka so ni masaya so ani a ka so jɔtaw bɛɛ jɔli la,
[2] Matigi y'i jira a la a siɲɛ filanan la i ko a tun y'i jira a la Gabaon cogo min na.
[3] Matigi y'a fɔ a ye ko: «I ye delili ni deliliba minw kɛ, ne ye olu lamɛn. I ye so min jɔ ka kɛ ne ka masaya yɔrɔ ye badaa, ne ye o saniya. Neɲɛ ni ne dusukun na to yen tuma bɛɛ.
[4] E yɛrɛ ta fan fɛ, ni i taamana ne ɲɛ kɔrɔ i ko i fa Dawuda y'a kɛ cogo min na ni dusukun jɛlen ni tilennenya ye ka ne ka sariya taama, ne ye fɛn minw bɛɛ fɔ i ye, ni i ye olu bɛɛ mara ka ne ka ci fɔlenw bɛɛ kɛ,
[5] o tuma la ne na i ka masaya sabati Israɛl bɔnsɔn ka masasigilan kan badaa, i ko ne y'a fɔ i fa Dawuda ye cogo min na ko: ‹I bɔnsɔn tɛna ban Israɛl bɔnsɔn ka masasigilan kan.›
[6] Nka ni aw ni aw denkɛw murutira ne ma, ni aw ma ne ka ci fɔlenw ni ne ka sariyaw mara, ni aw taara baara kɛ bato fɛn wɛrɛw ye ka aw biri u kɔrɔ,
[7] ne ye jamana min di Israɛl bɔnsɔn ma, ne na u halaki ka bɔ o kɔnɔ. Ne ye nin so min saniya ka ne tɔgɔ da o kan, ne na o fili k'a bɔ ne ɲɛ kɔrɔ. Israɛl bɔnsɔn na kɛ ntalen da fɛn ni yɛlɛbɔ fɛn ye siyaw bɛɛ cɛma.
[8] Mɔgɔ minw na tɛmɛn nin yɔrɔ senumaba kɛrɛ fɛ, olu na o filɛ ka kabakoya ka file fyɛ k'a fɔ ko: ‹Mun y'a to Ala ye nin jamana ni nin so kɛ ten?›
[9] U n'a jaabi ko: ‹Katuguni Matigi, u ka Ala min ye u bɛnbaw labɔ Misira jamana la, u ye o bila ka tugu bato fɛn wɛrɛw nɔ fɛ ka olu bato ka baara kɛ u ye. O de kosɔn Matigi ye nin bɔnɛ lase u ma.›»
[10] Solomani ye so fila jɔ san mugan kɔnɔ, Matigi ka so ani a yɛrɛ ka masaya so.
[11] Tir masakɛ Hiram tun ye sedere jiriw ni sipere jiriw ani sanu di Solomani ma o baaraw kosɔn ka kɛɲɛ ni a mago ye. O san mugan tɛmɛnnen kɔ, Solomani ye Galile jamana la dugu mugan di Hiram ma.
[12] Hiram nana ka bɔ Tir, Solomani ye dugu minw di a ma, ka olu filɛ, nka olu ko tun man di Hiram ye.
[13] A ko: «Ne balimakɛ, i ye dugu jumɛnw di ne ma tan?» A ye o duguw tɔgɔ da ko Kabul jamana. Olu bɛ wele ten halibi.
[14] Hiram ye sanu kilo waa saba ni kɛmɛ ci masakɛ ma.
[15] Masakɛ Solomani ye diyagoya baarakɛlaw sigi ka baara minw kɛ, olu filɛ ninw ye. U ye Matigi ka so ni a yɛrɛ ka so ani Milo ni Jerusalɛm lamini kogow ni Hazɔr ni Megido ani Gezɛr duguw jɔ.
[16] Misira masakɛ Faraon wulila ka taa Gezɛr minɛ k'a jeni, a ye Kanankaw fana faga, olu minw sigilen tun bɛ yen. O kɔ, a y'o dugu di a denmuso ma k'a kɛ kɔɲɔ nili fɛn ye, o tun ye Solomani muso ye.
[17] O tuma la Solomani ye Gezɛr ni duguma Bɛt-Horɔn
[18] ni Balat ani Juda jamana kungoba la dugu Tadmor jɔ.
[19] Bolo fɛn mara duguw ani wotoro bila duguw ni sotigiw ka duguw, Solomani tun b'a fɛ ka fɛn o fɛn jɔ Jerusalɛm ani Liban ani a ka mara yɔrɔw bɛɛ la, a ye olu bɛɛ jɔ.
[20] Amɔr siya ani Hɛti bɔnsɔn ni Ferɛz siya ni Hev siya ani Jebuska minw ɲɛnama tora, k'a sɔrɔ olu tɛ Israɛl bɔnsɔn dɔ ye,
[21] olu siyaw bɔnsɔn minw tora u kɔ o jamana kɔnɔ, ni Israɛl bɔnsɔn ma se ka olu halaki ka u ban, Solomani ye olu minɛ ka u kɛ diyagoya baarakɛlaw ye. Olu bɛ yen halibi.
[22] Nka Solomani ma Israɛl bɔnsɔn kɛ jɔnw ye. Olu kɛra a ka kɛlɛkɛ cɛw ni jalatigibaw ni sɔrɔdasi cɛ farinw ani a ka wotoro bolilaw ani a ka sotigiw kuntigiw ye.
[23] Kuntigi minw tun bɛ baarakɛlaw kun na, olu dama tun ye cɛ kɛmɛ duuru ni biduuru ye. Olu tun bɛ mɔgɔw ɲɛ minɛ baara la.
[24] Faraon denmuso bɔra Dawuda ka dugu la tuma min na, Solomani tun ye so min jɔ a ye, a donna o kɔnɔ. O kɔ, Solomani ye Milo jɔ.
[25] Solomani tun bɛ taa saraka jenitaw ni nisɔndiya sarakaw faga Matigi ye a yɛrɛ ka saraka bɔlan jɔlen kan siɲɛ saba san o san. A tun bɛ fɛn suma dumanw kɛ saraka ye Matigi ka saraka bɔlan kan soɲɛ fɛ. A ye Alabatosoba jɔ ka ban.
[26] Masakɛ Solomani ye jikan kurunw dila Eziɔn-Gebɛr, Elɔt kɛrɛ fɛ Kɔgɔji Bilen dala, Edɔm jamana la.
[27] Hiram ye a ka baaradenw ni a ka jikan baarakɛlaw bila o kurunw kɔnɔ, olu ka taa Solomani ka baaradenw dɛmɛ.
[28] U taara Ofir ka na ni sanu kilo waa tan ni fila ani kɛmɛ wɔɔrɔ ye ka o di masakɛ Solomani ma.