[1] Seba masamusoma y'a mɛn ko Matigi ye tɔgɔba di Solomani ma tuma min na, o nana Solomani sɛgɛrɛ k'a kɔrɔbɔ ni ɲininkali gɛlɛnw ye.
[2] O masamusoma taara Jerusalɛm ni jamaba ye aniɲaamɛ doninenw ni tulu suma duman ani sanu caman ni kabakurun sɔngɔ gɛlɛnw ye. A donna Solomani yɔrɔ la k'a kɔnɔna kow bɛɛ fɔ Solomani ye.
[3] Solomani y'a ka ɲininkaliw bɛɛ jaabi. U si jaabili ma dogo masakɛ la. Solomani ye cogo sɔrɔ o ɲininkaliw bɛɛ la.
[4] Ayiwa, o masamusoma ye Solomani ka hakilitigiya bɛɛ ye ani a ye so min jɔ
[5] ani a ka dumuni ni a ka baaradenw ka baara cogo ani a ka kuntigiw ka baaraɲɛnabɔ cogo ani o kuntigiw ka finiw ani masakɛ ka minni fɛn tabaaw ani a tun bɛ saraka minw bɔ Matigi ka so kɔnɔ. Olu ye Seba masamusoma kabakoya kosɛbɛ haali.
[6] A y'a fɔ masakɛ Solomani ye ko: «Ne ye i ka hakilitigiya ni i ka kɛwale minw ko mɛn ka ne to ne ka jamana la, olu bɛɛ ye tiɲɛ ye.
[7] Min tun bɛ fɔ, ne tun tɛ da o la sani ne ka na yan ka olu ye ne yɛrɛɲɛ la. Hali u tilancɛ tun ma fɔ ne ye. I ka hakilitigiyaba ni i ka fɛntigiya tɛmɛnna ne ka mɛnni kan.
[8] I ka mɔgɔw ye dubadenw ye, i ka baaraden minw bɛ i ɲɛ kɔrɔ tuma bɛɛ, ni olu bɛ i ka hakilitigiya ni i ka kumaw mɛn, olu ye dubadenw ye.
[9] Matigi, i ka Ala ka tanu, a diyara o min ye ka i sigi Israɛl bɔnsɔn ka masasigilan kan. Tuma bɛɛ Israɛl bɔnsɔn ko ka di Matigi ye, ye tuma bɛɛ o de y'a to, a ye i sigi ka kɛ masakɛ ye walisa i ka u mara ni tiɲɛ ni tilennenya ye.»
[10] O kɔ, a ye sanu kilo waa saba ni kilo kɛmɛ duuru di masakɛ Solomani ma ani tulu suma duman caman ani kabakurun sɔngɔ gɛlɛnw. Seba masamusoma ye tulu suma duman minw di Solomani ma, a ma o ɲɔgɔn nili fɛn sɔrɔ o kɔ.
[11] Hiram ka jikan kurunw nana ni sanu ye ka bɔ Ofir ani gwɔni jiri caman ani kabakurun sɔngɔ gɛlɛnw caman.
[12] Masakɛ tun bɛ o jiriw kɛ samasenw ye Matigi ka so ani a yɛrɛ ka so kɔnɔ. O tun bɛ kɛ nkɔniw fana ye dɔnkili dalaw ye. Ka bɔ o waati la, o jiriɲɔgɔn ma sɔrɔ ka taa Jerusalɛm, a ɲɔgɔn ma sɔrɔ fo ka se bi ma.
[13] Seba masamusoma ye fɛn o fɛn fɔ Solomani ye, a tun bɛ miiri fɛn o fɛn na, Solomani ye o bɛɛ kɛ a ye. Ka fara o bɛɛ kan, masakɛ Solomani ye a sɔn ka kɛɲɛ ni a yɛrɛ ka masaya cogo ye. O kɔ, masamusoma ni a ka baaradenw ye sira minɛ ka taa a ka jamana la.
[14] Masakɛ Solomani tun bɛ sanu kasabi min sɔrɔ san o san, o giriya tun ye kilo waa muganɲɔgɔn ye.
[15] A tun bɛ min sɔrɔ jagokɛlaw bolo ani a tun bɛ tɔnɔ min sɔrɔ jamana wɛrɛw la ani duwaɲɛ sara minw tun bɛ sɔrɔ jamana wɛrɛ masakɛw fɛ ani Arabu jamanaw ni a yɛrɛ ka jamana kuntigiw fɛ, olu sen tun tɛ o jate la.
[16] Masakɛ Solomani ye sanu nɛgɛ bɛnnan kɛmɛ fila fana dila. Olu bɛɛ kelen-kelen giriya tun ye kilo wɔɔrɔ ye,
[17] ani nɛgɛ bɛnnan kɛmɛ saba wɛrɛ minw giriya ka dɔgɔ fɔlɔ taw ye. Olu bɛɛ kelen-kelen giriya tun ye sanu kilo kelen ani garamu kɛmɛ duuru ye. Masakɛ ye o nɛgɛ bɛnnanw bila Liban tu kɔnɔ so kɔnɔ. O tun ye masakɛ ka so dɔ ye.
[18] Masakɛ Solomani ye masasigilan belebeleba dila ni samaɲin ye ka sanu yɛrɛwolo da o yɔrɔ bɛɛ kan.
[19] Senda yɔrɔ wɔɔrɔ tun bɛ o masasigilan na. O masasigilan kɔ sɛmɛlan koolilen tun don. Boloda yɔrɔ tun bɛ a fan fila la. Waraba ja bisigi fila tun bɛ a boloda yɔrɔ kɛrɛ fɛ.
[20] Waraba ja bisigi tan ni fila tun bɛ o yɛlɛnyɛlɛnnan senda yɔrɔ fan fila fɛ, a kinin ni a numan fɛ. Masaya wɛrɛ si ma o ɲɔgɔn kɛ.
[21] Masakɛ Solomani ka jifilenw bɛɛ tun ye sanu ye. Minan minw tun bɛ a ka Liban masaya so kɔnɔ, olu bɛɛ tun ye sanu ye. A ka minan si tun tɛ warijɛ ye. Warijɛ tun tɛ jate Solomani tilew la,
[22] katuguni Tarsisi jikan kurunw tun bɛ masakɛ Solomani fɛ. A ka jikan kurunw ni Hiram taw tun bɛ taa ɲɔgɔn fɛ Tarsisi san saba o saba ka na ni sanu ni warijɛ ni samaɲinw ni warabilenw ani kɔnɔ sifa dɔ ye, o tɔgɔ ko nkuman.
[23] Ayiwa masakɛ Solomani tɛmɛnnna dugukolo kan masakɛw bɛɛ kan fɛntigiya ni hakilitigiya la.
[24] Mɔgɔw bɛɛ tun bɛ taa Solomani sɛgɛrɛ, a ye hakilitigiya min sɔrɔ Ala fɛ, ka o filɛ.
[25] Olu bɛɛ kelen-kelen tun bɛ taa ni u ka nili fɛnw ye, warijɛ minanw ani sanu ni finiw ni kɛlɛkɛ minanw ni tulu suma dumanw ni yɛlɛnkan sow ni falibaw. A tun bɛ olu sɔrɔ san o san.
[26] Solomani ye wotorow ni sotigiw lajɛ yɔrɔ kelen na. U bɛɛ lajɛlen kɛra wotoro waa kelen ni kɛmɛ naani ani sotigiw waa tan ni fila ye. A ye u dɔw bila wotoro mara duguw kɔnɔ ka dɔw to masakɛ kɛrɛ fɛ Jerusalɛm.
[27] Masakɛ ye warijɛ caya Jerusalɛm i ko kabakurunw. Sedere jiri fana cayara i ko jɛkɛnɛ la toro sunw.
[28] Masakɛ Solomani tun bɛ so minw sɔrɔ, olu bɛɛ bɔra Misira. A ka jagokɛlaw tun bɛ olu san sɔngɔ latigɛlen na.
[29] Wotorow ni sow tun bɛ bɔ Misira ka na Jerusalɛm. Wotoro sɔngɔ tun ye warijɛ kɛmɛ wɔɔrɔ ye, so sɔngɔ tun ye warijɛ kɛmɛ ni biduuru ye. O jagokɛlaw tun bɛ na ni u ye ka u feere Hɛti bɔnsɔn ni Sirikaw ka masakɛw fana ma.