[1] Matigi ka kuma sera Hanani denkɛ Jehu ma Baesa kama ko:
[2] «Ne de ye i sama ka bɔ buguri la ka i kɛ ne ka mɔgɔw, Israɛl bɔnsɔn ka masakɛ ye, nka i taamana Jeroboam ka sira fɛ ka Israɛl bɔnsɔn bila jurumu la ka ne dusu dimin Israɛl bɔnsɔn ka jurumuw kosɔn.
[3] O de kosɔn ne na Baesa ni a ka so fura ka bɔ yen pewu. Ne na a ka so kɛ i ko ne ye Nebat denkɛ Jeroboam ka so kɛ cogo min na.
[4] Baesa ka so mɔgɔ minw na sa dugu kɔnɔ, wuluw na olu dun. A ka so mɔgɔ minw na sa kungo kɔnɔ, sanfɛ kɔnɔw na olu sogo dun.»
[5] Baesa ka ko tɔw, a ka kɛwalew ni a ka fanga bɛɛ sɛbɛnnen bɛ Israɛl bɔnsɔn ka Tilew Kibaru Kitabu kɔnɔ.
[6] Baesa sunɔgɔra a bɛnbaw fɛ. U y'a su don Tirza. A denkɛ Ela sigira masaya la a nɔ na.
[7] Matigi ka kuma nana Hanani denkɛ kira Jehu da la Baesa ni a ka so kama a ka ko jugu kɛlenw bɛɛ kosɔn Matigi ɲɛ kɔrɔ, katuguni a ye Matigi dusu dimin ni a bolo baara ye ka Jeroboam ka so ka ko jugu kɛlenw ɲɔgɔn kɛ ani k'a masɔrɔ a ye Jeroboam ka so halaki.
[8] Juda ka masakɛ Asa ka masaya san mugan ni wɔɔrɔnan la, Baesa denkɛ Ela sigira ka kɛ Israɛl bɔnsɔn ka masakɛ ye. A ye san fila kɛ masaya la Tirza.
[9] A ka baaraden Zimri min tun ye a ka wotorow tilancɛ kuntigi ye, o wulila a kama. Ka Ela to minni la k'i fa Tirza Ariza ka so kɔnɔ, masakɛ ka so kɔlɔsibaa Zimri tun bɛ masakɛ ka yɔrɔ la dugu kɔnɔ.
[10] Zimri donna so kɔnɔ k'a gosi k'a faga ka sigi a nɔ na. O kɛra Juda bɔnsɔn ka masakɛ Asa ka masaya san mugan ni wolonwulanan la.
[11] A kɛra masakɛ ye ka sigi masasigilan kan tuma min na, a ye Baesa ka so bɛɛ halaki. A ma cɛ si to, mɔgɔ kɔrɔ wala denmisɛn la, o ka so mɔgɔw wala o teriw cɛma, a ye olu bɛɛ faga ka u ban.
[12] Zimri ye Baesa ka so bɛɛ halaki ka kɛɲɛ ni Matigi ka kuma fɔlen ye Baesa kama kira Jehu da la.
[13] O kɛra Baesa ni a denkɛ Ela ka jurumu kɛlenw bɛɛ kosɔn, u yɛrɛ taw ani u ye Israɛl bila o minw na ka Matigi, Israɛl ka Ala dusu dimin ni u ka fɛn fufafuw ye.
[14] Ela ka ko tɔw ni a ka ko kɛlenw, olu bɛɛ sɛbɛnna Israɛl bɔnsɔn ka masakɛw ka Tilew Kibaru Kitabu kɔnɔ.
[15] Juda ka masakɛ Asa ka masaya san mugan ni wolonwulanan la, Zimri ye tile wolonwula kɛ masaya la Tirza. Israɛl ka kɛlɛbolow dagalen tun bɛ Filisitikaw ka dugu Gibetɔn da la.
[16] Ka o kɛlɛbolow dagalen to yen, u ye kibaru mɛn ko Zimri murutira fo ka masakɛ faga. Israɛl bɔnsɔn ye kɛlɛbolow kuntigi Omri sigi ka kɛ u ka masakɛ ye.
[17] O tuma la Omri ni Israɛl bɔnsɔn bɛɛ bɔra Gibetɔn ka taa daga Tirza da la.
[18] Zimri y'a ye ko dugu minɛna minkɛ, a donna masakɛ ka so kɔnɔ ka tasuma don o la. Ale fagara o tasuma fɛ.
[19] O kɛra a ka jurumu kɛlenw kosɔn Matigi ɲɛ kɔrɔ. A ye Jeroboam ka sira taama ka Israɛl bila jurumu la i ko Jeroboam y'a kɛ cogo min na.
[20] Zimri ka ko kɛlen tɔw ani a ka murutili kow bɛɛ sɛbɛnna Israɛl bɔnsɔn ka masakɛw ka Tilew Kibaru Kitabu kɔnɔ.
[21] Ayiwa Israɛl bɔnsɔn tilara fila ye. A tilancɛ tugura Ginat denkɛ Tibni la, o tun b'a fɛ ka kɛ masakɛ ye. A tɔ tilancɛ tugura Omri la,
[22] nka Omri nɔ fɛ mɔgɔw cayara ni Ginat denkɛ Tibni ta ye. Tibni sara, Omri kɛra masakɛ ye.
[23] Juda ka masakɛ Asa ka masaya san bisaba ni kelennan la, Omri sigira ka kɛ Israɛl bɔnsɔn ka masakɛ ye. A ye san tan ni fila kɛ masaya la. A san wɔɔrɔnan la Tirza,
[24] a ye dugukolo dɔ san Semɛr fɛ Samari kulu la warijɛ waa wɔɔrɔ la. A ye dugu dɔ sigi o kulu kan ka o tɔgɔ da ko Samari. O dugu tɔgɔ dara kulutigi Semɛr tɔgɔ la.
[25] Omri ye ko jugu kɛ Matigi ɲɛ kɔrɔ. A ye ko jugu kɛ ka tɛmɛn a ɲɛ fɛ mɔgɔw bɛɛ kan.
[26] A ye Nebat denkɛ Jeroboam ka sira taama ka muruti ka Jeroboam ka ko jugu kɛlenw ɲɔgɔn kɛ, o de ye Israɛl bɔnsɔn bila o kow la ka boliw bato ka Matigi, Israɛl ka Ala dusu dimin.
[27] Omri ka ko tɔw ni a ka kɛlɛ kow sɛbɛnna Israɛl bɔnsɔn ka masakɛw ka Tilew Kibaru Kitabu kɔnɔ.
[28] Omri sunɔgɔra a bɛnbaw fɛ. U y'a su don Samari. A denkɛ Akab sigira masaya la a nɔ na.
[29] Juda bɔnsɔn ka masakɛ Asa ka masaya san bisaba ni seginnan la, Omri denkɛ Akab sigira ka kɛ Israɛl bɔnsɔn ka masakɛ ye Samari. A ye san mugan ni fila kɛ masaya la.
[30] Omri denkɛ Akab ye ko jugu kɛ Matigi ɲɛ kɔrɔ ka tɛmɛn a ɲɛ fɛ mɔgɔw bɛɛ kan.
[31] Nebat denkɛ Jeroboam ka jurumu kɛlenw kɛli kɛra fɛn fitinin ye a ɲɛ na, k'a fara o kan, a ye Sidɔnkaw ka masakɛ Etibal denmuso Jezabɛl furu. A ye Baal batoli daminɛ ka i biri o kɔrɔ.
[32] A ye Baal ka so jɔ Samari ka Baal ka saraka bɔlan jɔ o kɔnɔ.
[33] A ye Astarte boli ja fana dila. A ye ko caman wɛrɛ kɛ ka Matigi, Israɛl ka Ala dusu dimin ka tɛmɛn a ɲɛ fɛ masakɛw bɛɛ kan.
[34] Akab tilew la, Hiɛl min bɔra Bɛtɛl, o ye Jeriko lamini kogo jɔ. A ye a ju sigi tuma min na, a bɔnɛna a denkɛ fɔlɔ Abiram la. A ye a dala konw don tuma min na, a bɔnɛna a denkɛ sinnaban Segub la ka kɛɲɛ ni Matigi ka kuma fɔlen ye Nun denkɛ Josue da la.