[1] Dawuda sa don surunyalen, a ye nin ci fɔ a denkɛ Solomani ye ko:
[2] «Ne bɛ taa dugukolo kan mɔgɔw bɛɛ taa sira fɛ. I ja gɛlɛya ka kɛ cɛ ye.
[3] I ka Matigi, i ka Ala kan minɛ ni kantigiya ye ka taama a ka siraw fɛ ka a ka sariyaw ni a ka ci fɔlenw mara ka a ka ko latigɛlenw ni a ka kalanw sira taama, olu minw sɛbɛnna Musa ka sariya la. O de n'a to i ka kɛtaw kaɲɛ i taa yɔrɔw bɛɛ la.
[4] Matigi ye kuma minw fɔ ne ko la, a na olu kɛ ka dafa. A y'a fɔ ne ye ko, ni ne denkɛw ye u yɛrɛw kɔlɔsi ka u taama cogo dɔn, ni u taamana ne ɲɛ kɔrɔ ni kantigiya ye ni u dusukun bɛɛ ani u ni bɛɛ ye, ko ne bɔnsɔn na to ka sigi Israɛl bɔnsɔn ka masasigilan kan tuma bɛɛ.
[5] «Zeruja denkɛ Joab ye min kɛ ne la, i yɛrɛ bɛ o dɔn. A ye Israɛl bɔnsɔn ka kɛlɛbolo kuntigi fila, Ner denkɛ Abinɛr ni Jetɛr denkɛ Amasa faga i ko u bɛ kɛlɛ la, k'a sɔrɔ kɛlɛ bannen don. Cɛ sirilan min tun kɛra k'a cɛ siri ani sabara min tun bɛ a sen na, a yɛ kɛlɛ joli mun olu la.
[6] I ka a koɲɛnabɔ ka kɛɲɛ ni i ka hakilitigiya ye, nka i kana a to a kunsigijɛ ka sa a yɛrɛma.
[7] «Barzilai min bɔra Galad, i ka o denkɛw minɛ ko ɲuman. Olu de na dumuni kɛ i fɛ i ka tabali la, k'a masɔrɔ olu farala ne kan ne boli tuma la i kɔrɔkɛ Absalɔm ɲɛ.
[8] «Benjamɛn bɔnsɔn Gera denkɛ Simei filɛ i kɛrɛ fɛ yen. A ka dugu ye Bakurim ye. O de wulila ne kama ka ne danga ne taa don na Mahanayim, nka a jiginna ka taa ne kunbɛn Jurdɛn ba da la tuma min na, ne ye ne kali a ye Matigi tɔgɔ la, ko ne tɛna a faga ni npan ye.
[9] Ayiwa sisan i kana a jalakibali to, k'a masɔrɔ i ka kan ka min kɛ a la, i bɛ o dɔn. I ka ale kunsigijɛ jolima ladon kaburu kɔnɔ.»
[10] Dawuda kafora a bɛnbaw kan. U ye Dawuda su don a yɛrɛ ka dugu kɔnɔ.
[11] Dawuda ye san binaani kɛ masaya la Israɛl bɔnsɔn kun na. A ye san wolonwula kɛ Heborɔn, ka san bisaba ni saba kɛ Jerusalɛm.
[12] O kɔ, Solomani sigira a fa Dawuda ka masasigilan kan. A ka masaya barika bonyara kosɛbɛ.
[13] Hajit denkɛ Adonija taara Solomani ba Batseba sɛgɛrɛ. O y'a fɔ a ye ko: «I nana ni hɛrɛ miirili ye wa?» Adonija y'a jaabi ko: «Ɔwɔ, hɛrɛ kuma don.»
[14] A ko: «Kuma dɔ bɛ ne fɛ k'a fɔ i ye.» Muso ko: «A fɔ.»
[15] Adonija ko: «I b'a dɔn ko masaya tun ye ne ta ye. Israɛl bɔnsɔn bɛɛ tun bɛ ne ka masaya makɔnɔ, nka masaya dira dɔ wɛrɛ ma, a kɛra ne dɔgɔkɛ ta ye, sabu Matigi y'a di a ma.
[16] Ayiwa sisan, ne bɛ i deli ko kelen na, i kana ban o ma.»
[17] Batseba y'a jaabi ko: «I ka a fɔ.» A ko: «I ka masakɛ Solomani deli, sabu a tɛna ban i ka delili ma, ko Abisag min bɔra Sunɛm, a ka o di ne ma k'a kɛ ne muso ye.»
[18] Batseba y'a jaabi ko: «Aɲɛna, ne na i ko fɔ masakɛ ye.»
[19] Ayiwa Batseba donna masakɛ Solomani yɔrɔ la walisa ka Adonija ka ko fɔ a ye. Masakɛ wulila ka taa Batseba kunbɛn ka i biri a kɔrɔ, o kɔ, ka i sigi a ka masasigilan kan ka masasigilan wɛrɛ sigi a ba ye, o y'i sigi o kan a kinin fɛ.
[20] Solomani ba y'a fɔ a ye ko: «Ne bɛ fɛn misɛn dɔ deli i fɛ. I kana ban o ma.» Masakɛ y'a jaabi ko: «A fɔ, ne ba, k'a masɔrɔ ne tɛna ban i bolo.»
[21] Muso ko: «Abisag min bɔra Sunɛm, i ka o di Adonija ma.»
[22] Nka masakɛ Solomani y'a ba jaabi ko: «Mun kosɔn i bɛ ne deli Abisag ko la Adonija ye? I ka masaya fana ɲini ale ni sarakalasebaa Abiatar ni Zeruja denkɛ Joab ye, sabu ne kɔrɔkɛ don.»
[23] O tuma la masakɛ Solomani y'i kali Matigi tɔgɔ la ko: «Ni ne ma Adonija sara nin kuma kosɔn, Matigi ka ne faga.
[24] Matigi ɲɛnama tɔgɔ kosɔn, o min ye ne sigi ne fa Dawuda ka masasigilan kan, ka masaya di ne ni ne bɔnsɔnw ma, i ko a tun y'a fɔ cogo min na, Adonija na faga bi yɛrɛ.»
[25] Masakɛ Solomani ye ci di Jehojada denkɛ Benaja ma ko a ka Adonija gosi k'a faga.
[26] O kɔ, masakɛ y'a fɔ sarakalasebaa Abiatar ye ko: «I ka taa i fa so la Anatɔt sabu i ka kan ka faga. Ne tɛna i faga cogo si la bi katuguni i ye Matigi, Ala ka wagande doni ne fa Dawudaɲɛ kɔrɔ. Ani fana, e ni ale ye tɔɔrɔ kow muɲuɲɔgɔn fɛ.»
[27] Ayiwa Solomani ye Abiatar bɔ Matigi ka sarakalasebaaya baara la, o de ye Matigi ka kuma fɔlen dafa Eli ka so ko la Silo.
[28] O kibaru sera Joab ma, ale tun bɛ Adonija fɛ, nka a tun tɛ Absalɔm fɛ. O taara i dogo Matigi ka finiso kɔnɔ ka saraka bɔlan biɲɛkolo minɛ a bolo.
[29] A nana fɔ masakɛ Solomani ye ko Joab dogolen filɛ Matigi ka finiso kɔnɔ saraka bɔlan kɔrɔ. O tuma la Solomani ye Jehojada denkɛ Benaja ci k'a fɔ a ye ko: «I ka taa a gosi.»
[30] Benaja taara Matigi ka finiso la k'a fɔ Joab ye ko: «Ayiwa masakɛ ko i ka bɔ yan.» Joab y'a jaabi ko: «Ayi, ne na sa yan.» Benaja taara o ko fɔ masakɛ ye ko: «Ne y'a fɔ Joab ye tan, a ye ne jaabi nin cogo la.»
[31] Masakɛ ko: «Joab ye min fɔ, i ka taa o kɛ. I k'a faga k'a su don. O cogo la, Joab ye joli min bɔn ni kun t'a la, i na o hakɛ mabɔ ne ni ne fa ka so la.
[32] Matigi na a yɛrɛ joli hakɛ bi a yɛrɛ kan sabu a ye cɛ tilennen, jalakibali fila faga ni npan ye minw tilennen tun don ka tɛmɛn a yɛrɛ kan, k'a sɔrɔ ne fa Dawuda tun tɛ o dɔn. Olu tun ye Israɛl bɔnsɔn ka kɛlɛbolo kuntigi Ner denkɛ Abinɛr ni Juda bɔnsɔn ka kɛlɛbolo kuntigi Jetɛr denkɛ Amasa ye.
[33] Olu joli hakɛ na bi Joab ni a bɔnsɔn kan badaa, nka Matigi na hɛrɛ kɛ Dawuda ni a bɔnsɔn ni a ka so ni a ka masasigilan ye tuma bɛɛ.»
[34] O tuma la Jehojada denkɛ Benaja kɔseginna ka Joab gosi k'a faga. U y'a su don a yɛrɛ ka du kɔnɔ kungokolon kɔnɔ.
[35] Masakɛ ye Benaja bila Joab nɔ na k'a kɛ kɛlɛbolo kuntigi ye ka Zadɔk bila Abiatar nɔ na sarakalasebaaya la.
[36] O kɔ, masakɛ ye Simei wele k'a fɔ a ye ko: «I ka so jɔ Jerusalɛm ka i sigi yen. I kana bɔ ka taa fan si fɛ.
[37] I k'a dɔn ko ni i bɔra ka Sedrɔn kɔ tigɛ don min na, i na sa, siga t'a la. I joli hakɛ na kɛ i yɛrɛ kun.»
[38] Simei ye masakɛ jaabi ko: «Aɲɛna. Ne matigi, masakɛ bɛ fɛn o fɛn fɔ ne ye, ne na o bɛɛ kɛ.» Simei ye waati jan kɛ Jerusalɛm.
[39] San saba tɛmɛnnen kɔ, Simei ka baaraden fila bolila ka taa Gat masakɛ Maka denkɛ Akis ka so. A nana fɔ Simei ye ko: «I ka baaradenw filɛ Gat.»
[40] Simei wulila ka tɛrɛfɛ da a ka fali kan ka taa a ka jɔnw ɲini Akis fɛ Gat. O tuma la Simei kɔseginna ni a ka jɔnw ye Jerusalɛm.
[41] A fɔra Solomani ye ko Simei bɔra Jerusalɛm ka taa Gat, ko a kɔseginna.
[42] Masakɛ ye Simei wele k'a fɔ a ye ko: «Yala ne tun ma ne kali i ye Matigi tɔgɔ la k'a fɔ i ye k'a gɛlɛya ko, i k'a dɔn ko ni i bɔra ka taa fan o fan fɛ, ko i na sa, siga t'a la wa? Yala e de ma ne jaabi ko i y'a mɛn wa?
[43] Mun y'a to Matigi ka kalili kan ni ne ka ci fɔlen minw tun fɔra i ye, i ma olu mara?»
[44] O kɔ, masakɛ y'a fɔ Simei ye ko: «I ye ko jugu minw bɛɛ kɛ ne fa Dawuda la, i bɛ o bɛɛ dɔn, i dusukun ye i yɛrɛ seere ye, o de kosɔn Matigi na i ka juguyaɲɔgɔn lase i yɛrɛ ma,
[45] nka masakɛ Solomani na duba sɔrɔ. Dawuda ka masasigilan na sabati Matigi ɲɛ kɔrɔ badaa.»
[46] Masakɛ y'a fɔ Jehojada denkɛ Benaja ye ko a ka bɔ ka Simei gosi. Simei sara. Solomani ka masaya sabatira a bolo.