[1] Tisibite Eli min tun ye Galad jamana siginfɛ dɔ ye, o y'a fɔ masakɛ Akab ye ko: «Matigi, Israɛl ka Ala ɲɛnama tɔgɔ kosɔn, ne bɛ baara kɛ o min ye, ngomi wala sanji tɛna sɔrɔ nin sanw na ni ne ma kuma.»
[2] O kɔ, Matigi ka kuma sera Eli ma ko:
[3] «I ka wuli ka bɔ yan k'i ɲɛ sin kɔrɔn fɛ ka taa i dogo Kerit kɔ da la Jurdɛn ba kuntilenna la.
[4] I na kɔji min, ne kumana nkankan kɔnɔw fɛ ko u ka i balo yen.»
[5] Ayiwa Eli ye Matigi kan minɛ ka wuli ka taa. A taara i sigi Kerit kɔ da la Jurdɛn ba kuntilenna la.
[6] Nkankan kɔnɔw tun bɛ taa buuru ni sogo di a ma sɔgɔma o sɔgɔma ani wula o wula. A tun bɛ kɔji min.
[7] Nka waati dɔ tɛmɛnnen kɔ, o kɔji jara katuguni sanji ma na dugukolo kan.
[8] Ayiwa Matigi ka kuma sera Eli ma ko:
[9] «Wuli ka taa Sidɔn kɛrɛ fɛ dugu dɔ la, o tɔgɔ ko Sarepta, ka i sigi yen, k'a masɔrɔ ne ye ci di muso cɛ salen dɔ ma o dugu kɔnɔ ko o ka i balo yen.»
[10] O tuma la Eli wulila ka taa Sarepta. A selen o dugu donda la, a ye muso cɛ salen dɔ sɔrɔ yen, o tun bɛ dɔgɔ ɲini. A ye o muso wele k'a fɔ a ye ko: «Ne b'i deli, i ka taa ji dɔɔnin ɲini ne ye minan dɔ kɔnɔ walisa ne k'a min.»
[11] O muso taatɔ ji ta, Eli y'a wele k'a fɔ a ye ko: «Ne b'i deli, i ka na ni dumuni dɔɔnin fana ye.»
[12] Muso ko: «Matigi i ka Ala ɲɛnama tɔgɔ kosɔn, dumuni tɛ yen. Mugu tɛgɛɲɛ kelen dɔrɔn bɛ bɔgɔ daga kɔnɔ yen ani tulu dɔɔnin bɛ tulu daga la. Ne bɛ na dɔgɔ bolo fila ɲini ka segin ka taa o dila ne ni ne denkɛ ye. An na o dun ka sɔrɔ ka sa, sabu fɛn wɛrɛ tɛ an bolo.»
[13] Nka Eli ko: «I kana siran. I ka taa a kɛ i ko a fɔra i ye cogo min na, nka i ka buuru misɛn dɔ labɛn ne ye fɔlɔ ka na n'a ye ne fɛ yan. O kɔ, i na dɔ dila i ni i denkɛ ye,
[14] k'a masɔrɔ Matigi, Israɛl ka Ala ko: ‹Bɔgɔ daga kɔnɔ mugu tɛna ban, tulu tɛna dɛsɛ tulu daga kɔnɔ sani Matigi ka sanji lana dugukolo kan don min na.›»
[15] Eli ye min fɔ, muso taara ka o kɛ. A ni a ka so mɔgɔw ni Eli ye dumuni sɔrɔ waati jan kɔnɔ.
[16] Daga kɔnɔ mugu ma ban, tulu daga kɔnɔ tulu fana ma dɛsɛ ka kɛɲɛ ni Matigi ka kuma fɔlen ye Eli da la.
[17] Waati dɔ tɛmɛnnen kɔ, o muso cɛ salen denkɛ banana. O den ka bana juguyara fo a tun tɛ se ka ninakili tun.
[18] O tuma la o muso y'a fɔ Eli ye ko: «Mun bɛ ne ni i cɛ, Ala ka cɛ? Yala e nana ne ka so walisa ka ne hakili jigin ne ka ko jugu kɛlenw na ka ne denkɛ faga wa?»
[19] Eli y'a fɔ a ye ko: «I denkɛ di ne ma.» Eli ye den minɛ a ba bolo ka yɛlɛn n'a ye sankanso sanfɛ so kɔnɔ, a si yɔrɔ la, k'a da a ka dalan kan.
[20] O kɔ, a ye Matigi deli ko: «Matigi, ne ka Ala, nin muso cɛ salen min ye ne ladon, i ye o den gosi k'a faga wa?»
[21] O kɔ, Eli y'i sɛɛnɛ den kan siɲɛ saba. A ye Matigi deli ko kura ko: «Matigi, ne ka Ala, ne b'i deli ko nin den ni ka segin a ma tun.»
[22] Matigi ye Eli kan lamɛn. Den ni seginna a la.
[23] Eli ye den ta ka bɔ a sibon sankanso kɔnɔ ka jigin ka taa a di a ba ma k'a fɔ a ye ko: «I denkɛ ɲɛnama filɛ.»
[24] O tuma la, o muso y'a fɔ Eli ye ko: «Ne y'a dɔn sisan ko i ye Ala ka cɛ ye, ko Matigi ka kuma min bɛ i da la, o ye tiɲɛ ye.»