[1] Tayta Teófilo, punta kaq libruchömi Jesús lapan rurashqankunata y yachasishqankunata qelqamurqä. Saykunata rurarqan y yachasirqan wilakur qalaykushqanpita
[2] jana pasaman aywakushqan junaqyaqmi. Jana pasaman manaraq aywakurmi akrashqan apostolninkunata Espíritu Santupa munayninwan imata rurayänanpaq kaqtapis tantiyasirqan.
[3] Wanushqanpita kawarirkamur chusku chunka (40) junaqyaqmi paykunata yuriparqan. Rasunpaypa kawaykashqanta criyiyänanpaqmi tukuynöpa tantiyasirqan. Saynölami Tayta Dios mandaykashqanpitapis shumaq tantiyasirqan.
[4] Apostolninkunawan kaykashpanmi Jesús nirqan: “Qamkunata wilashqänömi promitiyäshushqaykita Taytä kachamunqa. Sayta manaraq chaskirqa Jerusalénpita amaraq aywakuyankiraqsu.
[5] Juanqa yakulawanmi bautizarqan. Qamkunami isanqa Espíritu Santuwan bautizash kayanki. Bautizash kayänaykipaq walka junaqlanami pishiykan”.
[6] Jesúswan shuntakash kaykaqkunami tapur niyarqan: “Taytay, ¿kananpitaqa Israel nacionninsipa mandaqninnasuraq kanki?”
[7] Sayno tapuyaptinmi Jesús nirqan: “Manami saykunata musyayänaykisu. Imay junaq imay höra sayno kananpaq kashqantaqa Tayta Dioslami musyan. Paymi munayyuq kaykan munashqan höra sayta kamakäsinanpaq.
[8] Sayno kaptinpis Espíritu Santu qamkunaman shamuptinmi poderninta chaskiyanki. Chaskiskirnami wilakuynïta wilakuyanki Jerusaléncho, intëru Judeacho, Samariacho y maysay markakunachöpis”.
[9] Sayno parlayta ushaskirmi joqarikayta qalaykurqan. Rikaraykäyaptinmi pukutay sapaskiptin elaqaskirqan.
[10] Jana pasapa nukiraykäyaptinmi yuraq mödanash ishkay runakuna elaqpita yuripaskir
[11] niyarqan: “Galilea runakuna, ¿imanirtaq jana pasapa rikaraykäyanki? Nawpaykikunapita jana pasaman aywakushqannölami Jesús yapay kutimunqa”.
[12] Sayno niyaptinmi Olivos lömacho kaykäyashqanpita apostolkuna Jerusalénman kutikuyarqan. Say lömapita Jerusalénman manami aläpa karusu karqan, sinöqa jamay junaqcho puriyashqannölami.
[13] Chaykuyashpannami päsaräyashqan altusman wisäyarqan. Paykunami kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa surin Santiago, Zelote niyashqan Simón y Santiagupa surin Judas.
[14] Paykunami Jesúspa maman Maríawan, Jesúspa wawqinkunawan y wakin warmikunawanpis Tayta Diosta manakuyänanpaq imaypis shuntakäyaq.
[15] Say junaqkunami Jesúsman yärakuqkuna pachak ishkay chunkano (120) shuntaraykäyaptin Pedro ichirkur nirqan:
[16] “Wawqi panikuna, musyashqansinöpis Judasmi runakunata pusharqan Jesústa prësu sariyänanpaq. Sayno kananpaq kashqanta qelqananpaqmi Espíritu Santu rey Davidta tantiyasirqan. Saymi Judasta päsananpaq kashqanta Tayta Diospa palabran nishqannöla kanan cumplish.
[17] Judas noqakunawanmi purirqan. Paytapis apóstol kananpaqmi Jesús akrarqan”.
[18] (Jesústa rantikushqan qellayta Judas kutisishqanwanmi chakrata rantiyarqan. Judasqa pachanpis pashtaqpaq uray senqaypa jeqaptinmi aqishninpis mashtakarqan.
[19] Sayta musyarmi Jerusaléncho taq runakuna say chakrapa jutinta churapäyarqan Acéldama jutin kananpaq. Paykunapa idiömancho Acéldama ninanqa Yawar Pampa ninanmi.)
[20] “Judasta päsananpaq kaqtaqa Salmo librucho kayno qelqaraykan: “ ‘Wayinpis sunyaq rikakusun. Saycho pipis amana täsunnasu’. Maspis kayno qelqaraykan: ‘Pay rurananpaq kaqta jukna rurasun’.
[21] “Saymi juktana churanansi Judaspa trukan apóstol kananpaq. Say runa kasun Jesús wilakur qalaykushqanpita pasa noqakunawan puriq.
[22] Saynöpis Jesústa Juan bautizashqanpita pasa jana pasaman kutikushqanyaq qatiraq kasun. Say runata churashun noqakunano apóstol kar Jesús kawarimushqanta wilakur purinanpaq”.
[23] Sayno niptinmi ishkay runakunata akrayarqan. Jukmi karqan Matías. Jukaqnami karqan José. Wakin runakuna Joséta Barsabás niyaq y wakinnami Justo niyaq.
[24] Nirkurmi Tayta Diosta manakur niyarqan: “Tayta Dios, musyankimi runakunapa shonqun imata yarpashqantapis. Kanan musyaykasiyämay mayqantapis akrashqaykita.
[25] Akrashqayki runami apostolniki kanqa Judas Iscariotipa trukan. Jusalikurmi Judasqa nakay pasaman aywakush”.
[26] Sayno manakuskir suertita jitayaptinmi Matíaspaq yarqurqan. Matíaswanmi apostolkuna yapay chunka ishkay kayarqan.