[1] Saypita pisqa junaqtanami juk ishkay Israel mayor runakuna y Tértulo jutiyuq abogädun pushash mas mandaq cüra Ananías Cesareaman chäyarqan. Pablupa contran parlayänanpaqmi Félixpa despächunman aywayarqan.
[2] Despächuman Pabluta chäsiptinnami Tértulo nirqan: “Tayta Félix, qam ali mandaq kaptikimi noqakuna jawka kawayä. Saynöpis shumaq tantiyakur kay nacioncho ali kaqkunatami rurasishkanki.
[3] Sayta rikarmi maysaychöpis kushish agradëcikuyä.
[4] “Tiempuykita aläpa mana perdisinäpaq rätula wiyarkamänaykipaq ruwakushayki.
[5] Kay prësu apayämushqan runa jukukuq qeshyanömi kaykan. Payqa Nazareno sectapa mandaqnin karmi maysaychöpis Israel runakunata chikinakaykäsin.
[6] Jerusaléncho templutapis manakaqmanmi churayta munash. Saymi prësu sarir [leynïkuna nishqanno arreglayta munayashkä.
[7] Prësu sararaykäyaptïmi Lisias chaykamur maqa maqarkur qechuyämash.
[8] Nirkurmi niyämash qampa nawpaykichöraq ima jusan kashqantapis shimpiyänäpaq kashqanta.] Lapan jitapäyashqäkuna rasun kaq kashqanta musyanaykipaq kanan kikiki tapuykulay”.
[9] Tértulo nishqannölami paywan kaykaq Israel runakunapis niyarqan.
[10] Saymi parlamunanpaq Félix sëñaptin Pablo nirqan: “Tayta Félix, aska watanami kay nacioncho runakuna quejakuyashqanta arreglashkanki. Saymi manakaqkunapita conträ sharkuyashqanta mana mansariypa wilashayki.
[11] Tayta Diosta adoraq Jerusalénman chashqä sayraqmi chunka ishkay junaq. Tapukuptikiqa pïmaypis nishqänölami wilayäshunkiman.
[12] Templuchöpis ni sinagögakunachöpis ni markachöpis manami piwanpis rimanakuykaqtasu ni pitapis rabyaykäsiqtasu tariyämash.
[13] Tumpayämashqanno lutanta rurash kaptïqa kanan mayqanpis shimpimäsun.
[14] “Isanqa Diospa Nänin nishqannölami unay ayllükuna adorayashqan Tayta Diosta sirvï. Diospa Nänin juk secta kashqanta paykuna niyaptinpis Moisés qelqashqan leykunaman y profëtakuna qelqayashqanmanmi criyï.
[15] Ali runakunatapis mana ali runakunatapis Tayta Dios kawarisimunanpaq kashqanta paykuna criyiyashqannömi noqapis criyï.
[16] Saymi Tayta Diospa nawpanchöpis y runakunapa rikananchöpis alikunalata imaypis rurayta munä.
[17] “Aska watatami qellayta apar Jerusalénman kutishkä muchuqkunata yanapänäpaq y Tayta Diospaq sacrificiuta rupasinäpaq.
[18] Sacrificiukunata cürakunaman templucho entregaykaptïmi [Asia provinciapita shamuq Israel runakuna] templucho purificakush kaykaqta tariyämash. Manami aska runakunatawansu ni pitapis büllata ruraykäsiqtasu tariyämash.
[19] Imatapis manakaqkunata rurash kaptïqa nawpaykicho shimpiyämänanpaq say runakuna shayämunman karqan.
[20] Sanedrín juezkunapis manami ima jusä kashqantapis tariyashsu. Tapuptiki kay runakunapis sayno kashqantami niyäshunki.
[21] Say autoridäkunapa nawpancho kaynömi nirqä: ‘Wanushkunata Tayta Dios kawarisimunanpaq kashqanta criyiptïmi juzgaykäyämanki’. Say imachir jusä kaykan”.
[22] Sayno nishqanta wiyaykurmi Félix nirqan: “Comandanti Lisias shamur wilamaptinraqmi arreglayäshayki”. Félix shumaqmi tantiyarqan Diospa Näninta qatiraqkuna imata criyiyashqantapis.
[23] Nirkurmi Pablo cuidaq capitanta nirqan: “Carcilman Pabluta kutisiy. Imalatapis aparkur pipis watukaq shamuptin ama michankisu”.
[24] Saypita warayninkunanami warmin Drusilawan despächunman Félix kutir Pabluta qayasirqan. Drusila karqan Israel warmimi. Pablo chaykurmi paykunata parlaparqan Jesucristuman yärakuyänanpaq.
[25] Saynöpis tantiyasirqan Dios munashqanno kawayänanpaq, mana jusalikuyänanpaq y juiciu finalcho Tayta Dios juzgananpaq kashqantapis. Say nishqankunata wiyashpanmi Félix mansakashpan nirqan: “Wichqarashqaykiman kutikuyna. Tiempü kashqan hörami yapay qayasimushayki”.
[26] Pakaylapa pägananta munarmi Pabluta aska kuti Félix qayasir paywan parlarqan.
[27] Saypita ishkay watatanami Félixpa trukan gobernador kayman jukna yaykurqan. Paypa jutinmi karqan Porcio Festo. Félix yarqukur ali autoridä kashqanta Israel runakuna yarpäyänanta munarmi carcilpita Pabluta kacharirqansu.