[1] Judea provinciapa gobernadornin kananpaq Cesareaman chashqanpita kimsa junaqtami Jerusalénman Festo aywarqan.
[2] Chaykuptinmi mandaq cürakuna y Israelcho mas mandaq autoridäkunapis Pabluta demandayarqan.
[3] Saynöpis ruwakuyarqan Pabluta Jerusalénman apasinanpaqmi. Sayno ruwakuyarqan apaykäyaptilanna Pabluta wanusiyta munarmi.
[4] Saymi Festo nirqan: “Pabluqa Cesarea markachömi prësu kaykan. Noqapis sayman aywanäpaqnami kaykä.
[5] Sayman wakinnikiwan aywashun ima jusan kashqantapis shimpiyänaykipaq”.
[6] Jerusaléncho juk semänano qoyarkurmi Cesareaman Festo kutikurqan. Chashqanpita waraynin junaqmi despächunman jamaykur Pabluta jorqasimurqan.
[7] Pablo yaykuriptinmi Jerusalénpita aywaq Israel runakuna juntapaykur tukuyta tumpayarqan. Sayno tumpayaptinpis nishqankuna manami rasunsu karqan.
[8] Saymi Pablo nirqan: “Noqa manami Israel runakunapa leyninkunatapis ni templuntapis manakaqman churashkäsu. Romacho mandaq Césarpa contranpis manami imatapis rurashkäsu”.
[9] Festunami Israel runakunawan ali rikanakuyta munar Pabluta tapurqan: “¿Jerusalénman aywayta munankiku saycho juzganäpaq?” nir.
[10] Saymi Pablo nirqan: “Romacho mandaq Césarmi churashushkanki pitapis juzganaykipaq. Pay churaykäshuptikiqa kaylacho juzgamay. Musyashqaykinöpis manami imatapis Israel runakunapa contran rurashkäsu.
[11] Wanusish kanäpaqno imatapis jusalikush kar imarqa manami sapakushaqsu. Israel runakunapa contran imatapis mana rurash kaptïqa manami pipis paykunapa makinman entregamanmansu. Saypa trukanqa Romacho mandaq César juzgamäsun”.
[12] Sayno niptinmi yäsiqninkunawan Festo wilanakuskir Pabluta nirqan: “Mandamaqninsi César Romacho juzgashunaykita munaptikiqa paymanmi apasishayki”.
[13] Manapis aykälatanami warmin Bereniciwan rey Agripa Cesareaman chäyarqan Festo watukaq.
[14] Aska junaq qoyaptinmi Pablo wichqaraykashqanta Festo wilapar nirqan: “Juk runatami prësu wichqaraykaqta Félix kachaykush.
[15] Jerusalénman aywaptïmi mandaq cürakuna y Israel mayor runakunapis manakayämash say runa wanusish kananpaq.
[16] Saymi nishkä: ‘Contrankuna manaraq shimpiyaptin y acusayashqan runa manaraq defiendikuptinqa Roma autoridäkuna manami pitapis lutalaqa wanusiyansu’.
[17] “Saymi contrankuna chaykayämuptin waraynin junaq despächüman jamaykur say prësuta jukla jorqasimurqä.
[18] Saycho contrankuna manami imatapis niyarqansu noqa yarpashqänöqa.
[19] Saypa trukanqa tumpayarqan costumbrinkunata manakaqman churashlantami. Saynöpis rimanakuyash wanukushna kaykaq Jesús jutiyuq runapitami. Pablo nikan say runa kawaykashqantami.
[20] Imano juzgaytapis mana kamäpakurmi Pabluta tapurqä: ‘¿Jerusalénman aywashwanku saycho arreglanäpaq?’ nir.
[21] Jerusalénman aywayta mana munarmi manakamash mandamaqninsi César arreglananpaq. Saymi Césarman apasishqäyaq jinala prësu kaykan”.
[22] Sayno wilaptinmi Agripa nirqan: “Noqapis say runa nishqanta wiyayta munaykämi”. Saymi Festo nirqan: “Munaptikiqa waray qayasimushun pay nishqanta wiyanaykipaq”.
[23] Saypita waraynin junaqmi Agripa, Berenice, comandantikuna y lapan autoridäkunapis shuntakäyänan jatun cuartuman yaykuyarqan. Lapan shuntakaskiyaptinnami Pabluta Festo jorqasimurqan.
[24] Chaykasiyaptinnami Festo nirqan: “Tayta Agripa y lapayki kaycho shuntakash kaykaqkuna, kay runa wanusish kanantami Israel runakuna Jerusalénchöpis y kaychöpis qaparayparaq manakuykäyan.
[25] Paykuna sayno munayaptinpis wanusish kananpaqqa manami ima jusantapis tarishkäsu. Romacho mandamaqninsi César arreglananpaq kay runa manakamaptinmi Romaman apasinäpaqna kaykä.
[26] Romaman manaraq apasir cartata qelqäman imanir apasishqätapis César musyananpaq. Isanqa manami shumaq musyäsu imata qelqanäpaqpis. Tayta rey Agripa, qamkuna yanapäyämay Pabluta shumaq tapurkur mandaq Césarman imata qelqanäpaqpis.
[27] ¿Imanöpataq prësuta Césarman apasishwan imanir apasishqansitapis shumaq mana wilarqa?”