[1] Italiaman apasiyänanpaq autoridäkuna wilanakuskirmi wakin prësukunatawan capitán Juliuman Pabluta entregayarqan. Juliuqa kaykarqan Augusto niyashqan tröpapa capitanninmi.
[2] Saymi wisäyarqä Adramitiupita shamuq büquiman. Say büqui Asia provinciacho kaq puertukunaman aywananpaqmi yarquykarqan. Pabluta walkiyänäpaqmi Aristarcuwan aywayarqä. Aristarcuqa karqan Macedonia provinciacho Tesalónica markapitami.
[3] Waraynin junaq Sidónman charmi capitán Juliuqa Pabluta kuyapashpan nirqan: “Imalawanpis yanapäyäshunaykipaq reqinakushqaykiman ayway”.
[4] Sidónpita yarquyaptïnami fiyupa wayrämuptin Chipre isla kuchulanpa aywayarqä.
[5] Saypita Cilicia y Panfilia simpanpa päsarmi chäyarqä Liciacho kaq Mira markaman.
[6] Saychömi capitán Julio tarirqan Alejandríapita Italiaman aywaykaq büquita. Saymi say büquimanna wisäsiyämarqan.
[7] Saypita yarqur aska junaqtaraqmi nakar Gnido markapa nawpalanpa päsayarqä. Saypa aywaykäyaptï fiyupa wayrämuptinmi Creta islapa tumar Salmón niyashqan nawpanpa päsayarqä.
[8] Creta isla kuchunpa aywayta nakarmi Buenos Puertos markaman ajataraq chäyarqä. Say marka kaykan Lasea markapita cercalanchömi.
[9] Aska junaq päsashna kaptinmi tamya wisan qalaykunanpaqna karqan. Saymi päsayänäpaq mana ali kaptin büquicho aruq runakunata Pablo nirqan:
[10] “Taytakuna, amaraq aywashunraqsu. Jinapa aywashqaqa büquipis cargapis ushakanqami. Noqansipis capazmi ushakäshun”.
[11] Pablo sayno niptinpis capitán manami cäsurqansu, sinöqa büquiyuqta y büqui manijaqtami cäsuparqan.
[12] Tamya wisan Buenos Puertuscho qoyäyänäpaq mana ali kaptinmi lapäkunapis yarpäyarqä Cretacho kaykaq Fenice markaman aywayta. Fenicichömi isanqa tamya wisanpis büqui ichinanpaq ali karqan.
[13] Aywayänäpaq wayra ali kaptinnami büquicho aruqkuna yarpäyarqan Feniciman chäyänäpaqna kashqanta. Saymi büquipa anclankunata shuntarkur Creta isla kuchulanpa aywayarqä.
[14] Yarquyashqäpita manapis aykälatanami Euroclidón niyashqan shukukuy wayra Cretapita fiyupa wayrämurqan.
[15] Saymi wayra shamushqanpa aywayta mana atipar büqui manijaqkuna kachapariykuyarqan wayra apashlanpana büqui aywakunanpaq.
[16] Saypita Clauda niyashqan taksha islapa aywarmi qarachaypa apashqan taksha büquita seqaypa nakarraq büqui jananman wisarkasir watayarqä.
[17] Saypitanami mana laksikänanpaq aywaykäyashqä jatun büquitapis waskakunawan watayarqan. Nirkurmi lamar rurincho Sirte niyashqan aqushaman chänanta mansarir büquipa juk anclanta kacharpuyarqan despaciu aywayänäpaq. Nirkurmi wayra apashlanpa aywakuyarqä.
[18] Saypita waraynin junaqpis saynöla fiyupa wayrämuptinmi büquipita cargankunata lamarman jitariyarqan.
[19] Büquipa anclanta kacharpuyashqanpita kimsa kaq junaqnami büquicho aläpa mana nistakashqan kaqkunatapis jitariyarqan.
[20] Pukutay saparaptinmi intipis ni qoyllarpis aska junaq rikakarqansu. Fiyupa wayrämuptinmi ushakäyänäpaq kashqantana yarpäyarqä.
[21] Aska junaqna miküni kayaptïmi Pablo ichiykur lapäkunata niyämarqan: “Taytakuna, Creta islapita mana yarqamunansipaq nishqäta wiyakayämaptikiqa manami kayjinanpa nakashwansu karqan ni imakunatapis lamarman jitashwansu karqan.
[22] Sayno kaptinpis ama lakikuyaysu. Manami mayqansipis wanushunsu. Büquimi isanqa ushakanqa.
[23] Qanyan paqasmi sirvishqä Tayta Dios kachamushqan ángel yuriparkamar
[24] nimash: ‘Pablo, ama mansariysu. Romacho mandaq César juzgashunaykipaq chankiraqmi. Büquicho kaykaq runakunatapis qam raykumi Tayta Dios salvanqa’.
[25] Taytakuna, ángel sayno nikämaptinqa ama mansarishunsu. Tayta Diosmanmi noqa yärakü. Ángel nimashqannölami kanqa.
[26] Büqui ushakaptinpis isla kuchunmanmi lamar jitarimäshun”.
[27] Adriático nishqan lamarcho ishkay semänana wayra puriykäsiyämaptinmi büqui manijaqkuna pulan paqasno mayayarqan saki pasaman chaykäyashqäta.
[28] Yakupa jundunta tupuyaptinmi kimsa chunka soqta (36) metru karqan. Yapay tupuptinmi ishkay chunka qanchis (27) metrulana kaykarqan.
[29] Saymi rumikunacho büqui takakänanta mansarir büqui ichinanpaq chusku anclankunata watarkur büqui qepanpa kacharpuyarqan. Nirkurmi pasa warashqanyaq saycho shuyaräyarqä.
[30] Büqui manijaqkuna qeshpikuyta munarmi büqui puntanpapis anclata uräsiq tumpala taksha büquita uräsiyarqan.
[31] Qeshpiyta munayashqanta tantiyarmi capitanta y soldädukunata Pablo wilarqan: “Büqui manijaqkuna aywakuyaptinqa manami salvakuyankisu” nir.
[32] Sayno niptinmi taksha büqui wataraq waskakunata soldädukuna rutuskiyaptin lamarman shikwarqan.
[33] Pasa wararkuptinnami runakunata Pablo nirqan: “Mikushunraq, taytakuna. ‘Imaraq päsamäshun’ nir lakikushpansimi ishkay semänana mikushkansisu.
[34] Kananqa kaway saraqlansipaqpis mikushunraq. Manami mayqansipis wanushunsu”.
[35] Niskirmi tantata aptarkur lapanpa nawpancho Tayta Diosta agradëcikurqan. Nirkurmi tantata pakirir pakirir mikuyta qalaykurqan.
[36] Pablo mikuykaqta rikarmi lapanpis mikuyarqan.
[37] Büquicho aywaqkuna kayarqä ishkay pachak qanchis chunka soqta (276) runakunami.
[38] Pacha junta mikuskirnami büqui ankashyänanpaq apayashqan trïguta lamarman jitayarqan.
[39] Pasa waraskiptinnami chaykäyashqä saki pasata rikarpis büqui manijaqkuna reqiyarqansu maycho kaykäyashqantapis. Pläyata rikaykurnami büquita sayman chäsiyta munayarqan.
[40] Saymi wataraq waskakunata rutuskir anclakunata lamarcho kachaykuyarqan. Nirkurmi timonnin wataraqta paskaskir büquita wayra apananpaq kaq jatun rakta tëlata wisäsiyarqan. Saymi lamar kuchunman büqui aywar qalaykurqan.
[41] Aywaykashqanchömi büquipa puntan aqushaman jatikäkurqan. Saymi yaku jaytaykälar büquipa qepan kaqta pakir usharqan.
[42] Saymi prësukuna mana qeshpiyänanpaq soldädukuna wanusiyta munayarqan.
[43] Sayno yarpäyaptinpis Pabluta salvayta munarmi capitán nirqan: “Ama pitapis wanusiyaysu. Nadyayta yachaqkunaqa yaku kuchunman yarquyäsun.
[44] Wakinkunana tablakunata o büqui pakipankunata sarikurkur yaku kuchunman imanöpapis yarquyäsun”. Saynöpami lapäkuna yakupita yarquyarqä.