[1] Say wisanmi discïpulukuna askayäyarqan. Paykunacho muchuq viüdakuna kayaptinmi waran waran mikuyta aypuyaq. Hebreo parlaq viüdakunata mas yanapäyaptinmi griego parlaqkuna jamurar niyarqan: “Griego parlaq viüdakunata mana cäsuypami hebreo parlaqkunaqa kikinpurala mikuyta aypunakuyan”.
[2] Sayno niyaptinmi lapan discïpulukunata shuntaykur chunka ishkay apostolkuna niyarqan: “Wawqikuna, manami alisu kanman Diospa wilakuyninta kachaykur mikuy aypukuyman churakäyaptï.
[3] Saymi mikuyta aypukuyänanpaq qamkunapita qanchis wawqikunata churayänayki. Paykuna kayäsun ali rikash runakuna, Espíritu Santupa munaynincho kawaqkuna y ali yarpayyuq runakuna.
[4] Saynöpami noqakunapa tiempükuna kanqa Tayta Diosta manakuyänäpaq y ali wilakuyninta wilakuyänäpaq”.
[5] Sayno wilanakuskirmi akrayarqan Estebanta, Felipita, Prócoruta, Nicanorta, Timónta, Parmenasta y Antioquía markapita kaq Nicolásta. Estebanqa Tayta Diosman shumaq yärakuq y Espíritu Santupa munaynincho kawaqmi karqan. Nicolásqa Israel runa kananpaq nawpatanami señalakush karqan.
[6] Nirkurmi say akrayashqan wawqikunapa umankunaman makinta churaykur apostolkuna Tayta Diosta manakuyarqan.
[7] Saymi Tayta Diospa wilakuyninta wilakuyaptin discïpulukuna Jerusaléncho askayäyarqan. Saynölami cürakunapis say wilakuyta askaq chaskikuyarqan.
[8] Runakuna rikanancho milagrukunata y señalkunata rurananpaqmi Estebanta Tayta Dios yanaparqan.
[9] Paywanmi Librina niyashqan sinagögacho shuntakaq wakin Israel runakuna rimanakuyta qalaykuyarqan. Say runakuna kayarqan Cirene nacionpita, Alejandría markapita, Cilicia provinciapita y Asia provinciapita.
[10] Espíritu Santupa munayninwan shumaq tantiyakuykur parlaptinmi Estebanta upälasiyta kamäpakuyarqansu.
[11] Saymi pakaylapa runakunata pägayarqan Estebanpa contran parlayänanpaq. Paykunami niyarqan: “Moiséspa y Tayta Diospa contran Esteban parlaykaqtami wiyayashkä”.
[12] Sayno niyaptinmi Israel mayor runakuna, ley yachasiqkuna y wakin runakunapis fiyupa rabyakuyarqan. Saymi Estebanta prësu sarirkur apayarqan Sanedrín juezkuna shuntaraykäyashqanman.
[13] Saychömi manakaqta jitapar Estebanpa contran niyarqan: “Kay runaqa sagrädu templunsipa y leyninsipa contranmi imaypis parlaykan.
[14] Saynöpis nin Nazaretpita kaq Jesús templunsita juchusinanpaq kashqanta y Moisés yachasishqan costumbrinsikunata mana cäsukunansipaqmi”.
[15] Saycho jamaraykaq juezkuna Estebanpa qaqlanta rikäriyashpan angilpa qaqlantanömi rikayarqan.