[1] Saypitanami Tiberias qocha kuchuncho discïpulunkunata Jesús yapay yuriparqan.
[2] Saychömi kaykäyarqan Simón Pedro, Milish nishqan Tomás y Natanaelpis. Natanael karqan Galileacho kaykaq Caná markapitami. Saynölami Zebedeupa ishkan surinkuna y mas ishkay discïpulukunapis kaykäyarqan.
[3] Paykunatami Simón Pedro nirqan: “Pescaqmi aywaykä”. Sayno niptinmi niyarqan: “Noqakunatapis pushayämay”. Sayno nirmi büquiman wisarkur lapan aywayarqan. Say sakay warati pescaykarpis manami ni juklaylatapis sariyarqansu.
[4] Pasa waraykaptinnami qocha kuchuncho juk runa kaykaqta rikayarqan. Isanqa Jesús kashqanta manami musyayarqansu.
[5] Paymi qayakur nirqan: “Amïgukuna, ¿pescäduta sariyashkankinaku?” Saymi niyarqan: “Manami imapis kansu, tayta”.
[6] Sayno niyaptinmi nirqan: “Büquipa aluq kaq nawpanman rednikita mashtayay. Saychöqa pescädu kanqami”. Nishqanno redta mashtarnami sutaytapis mana kamäpakuyashqanyaq saysika pescäduta sariyarqan.
[7] Saymi Jesús kuyashqan kaq discïpulun Pedruta nirqan: “¡Payqa Señorninsimi!” Sayno niptinmi mödananta seqlanman wachkakurkur Simón Pedro jukla Jesús kaqman nadyaypa aywarqan.
[8] Wakin kaq discïpulukunanami rednincho saysika pescäduta qarachash büquiwan aywayarqan. Qocha kuchunman chäyänanpaqqa pachak (100) metrunölami pishirqan.
[9] Kuchunman chaykuyashpannami tariyarqan tantata y shansha janancho pescädu kankash kaykaqta.
[10] Saymi Jesús nirqan: “Sariyämushqayki pescäduta juk ishkayta apayämuy”.
[11] Sayno niptinmi Simón Pedro büquiman wisarkur redta qarachamurqan pescädukunata apayänanpaq. Say redchömi karqan juk pachak pisqa chunka kimsa (153) jatusaq pescädukuna. Saysika pescäduwanpis red manami rachirqansu.
[12] Saymi Jesús nirqan: “Mikuq shayämuy”. Señor Jesús kashqanta musyarmi mayqan discïpulunpis pï kashqantapis tapupäyarqansu.
[13] Paykuna kaqman witiykurmi tantatawan pescäduta Jesús aypurqan.
[14] Saycho yuripashqanwanqa kawarimushqanpita kimsa kutinami discïpulunkunata Jesús yuriparqan.
[15] Mikuyta ushaskirnami Simón Pedruta Jesús tapur nirqan: “Jonáspa surin Pedro, wakin kaq discïpulükunapita ¿masku kuyamanki?” Sayno tapuptin Pedro nirqan: “Aw Taytay, qam musyankimi kuyashqäta”. Saymi Jesús nirqan: “Uysha malwäkunata shumaq rikanki”.
[16] Yapay tapurmi nirqan: “Jonáspa surin Simón, ¿kuyamankiku?” Sayno tapuptin Pedro nirqan: “Aw Taytay, qam musyankimi kuyashqäta”. Niptinmi nirqan: “Uyshäkunata shumaq misinki”.
[17] Saypita yapaymi tapurqan: “Jonáspa surin Simón, ¿rasunpaku kuyamanki?” Saynöla kimsa kuti tapuptinmi Pedro lakish nirqan: “Qam lapantapis musyankimi, Taytay. Kuyashqätapis musyankimi”. Niptinmi Jesús nirqan: “Uyshäkunata shumaq rikanki.
[18] Rasunpami nï: Maqtalaraq karqa mödanaykita jatikur munashqaykipami aywarqayki. Awkinyarnami isanqa rikraykita mashtarkuptiki jukna jatipäshunki. Saynöpis aywayta mana munashqaykipami apayäshunki”.
[19] Sayno nirmi Pedruta Jesús tantiyasirqan Tayta Dios munashqanno kawar imano wanunanpaq kashqanta. Nirkurnami Pedruta nirqan: “Qatirämay”.
[20] Saypitanami tikraykur Jesús kuyashqan kaq discïpuluta Pedro rikarqan. Say discïpulumi Pascua meriendacho Jesúspa läduncho tapurqan mayqan discïpulun contran sharkunanpaq kashqantapis.
[21] Payta rikärirmi Jesústa Pedro tapurqan: “Taytay, paytaqa ¿imataq päsanqa?”
[22] Sayno tapuptinmi Jesús nirqan: “Noqa munaptïqa kutimushqäyaqpis kawaykanmanmi. ¿Imanirtaq paypaq tapumanki? Qamqa qatirämay”.
[23] Jesús sayno nishqanta musyaykurmi maysaychöpis wawqi panikuna yarpäyarqan say discïpulun imaypis mana wanunanpaq kashqanta. Sayno yarpäyaptinpis Jesús manami mana wanunanpaq kashqantasu nirqan, sinöqa kayno nirqan: “Noqa munaptïqa kutimushqäyaqpis kawaykanmanmi. ¿Imanirtaq paypaq tapumanki?”
[24] Jesús kuyashqan discïpulumi kay libruta qelqash. Lapan qelqashqankuna rasun kaqmi kaykan.
[25] Jesús rurashqankuna mas askaraqmi kaykan. Lapanta qelqaptinqa intëru kay pasacho papilpis manami aypanmansu. [Amén.]