[1] Say wisanmi Jesucristuman yärakuqkunata astasiyta munar rey Herodes wakinta prësu sarisirqan.
[2] Saynölami apóstol Juanpa wawqin Santiagutapis espädawan wanusiyänanpaq mandarqan.
[3] Wanusishqanpita Israel runakuna kushikuyashqanta rikarmi Pedrutapis prësu sarisirqan. Say karqan Levadüraynaq Tantata Mikuna fiesta wisanmi.
[4] Pascua fiesta ushayraq lapan runakunapa nawpancho juzgayta munarmi carcilman wichqasirqan. Nirkurmi täpayänanpaq chusku grüpu soldädukunata mandarqan. Cada grüpuchömi chusku soldädukuna kayarqan.
[5] Carcilcho Pedruta wichqaräsiyaptinmi Jesucristuman yärakuqkuna Tayta Diosta mana kachaypa manakuykäyarqan.
[6] Herodes juzgananpaq pasa manaraq waraptin ishkay soldädukunaman cadinash Pedro punuykarqan. Wakin kaq soldädukunanami punkucho täpaykäyarqan.
[7] Sayno kaykaptinmi Señor Jesucristo kachamushqan ángel elaqpita asikyar Pedruta yuriparqan. Custillanta yataykur rikcharkasirmi nirqan: “¡Apurä sharkuy, Pedro!” Niptinmi jinan höra Pedro wataraykashqan cadinakuna makinpita kachakaskirqan.
[8] Saypitanami ángel nirqan: “Jukla wachkakur lanqikita jatikuy”. Jatikurkuptinnami nirqan: “Capötikita ayllukurkur qepaläpa shamuy”.
[9] Saymi angilpa qepalanpa Pedro aywarqan. Carcilpita rasunpaypa yarquykashqanta manami tantiyarqansu, saypa trukanqa revelacionta rikaykashqantami yarparqan.
[10] Ruricho kaq soldädukunata y chawpi punkucho kaq soldädukunata päsaskirmi cälliman yarquna kaq fiërru punkumanna chäyarqan. Say punku kikilan kichakaskiptinmi cällimanna yarquyarqan. Saypita juk esquïnata aywaykäyaptinmi ángel elaqaskirqan.
[11] Saymi cällicho kaykashqanta tantiyakuskir Pedro nirqan: “Kananmi isanqa rasunpaypa musyä salvamänanpaq angilninta Tayta Dios kachamushqanta. Paymi salvamash Herodespita y Israel runakuna wanusiyämänanpaq kaykashqanpita”.
[12] Tayta Dios salvashqanta tantiyarnami Juanpa maman Maríapa wayinman aywakurqan. Juanpa jukaq jutinmi karqan Marcos. Saychömi askaq shuntakaykur Pedrupaq Tayta Diosta manakuykäyarqan.
[13] Chaykur sawan punkuta Pedro takakuptinmi pï kashqantapis rikaq Rode jutiyuq jipash yarqurqan. Say jipash karqan Maríapa yanapaqninmi.
[14] Parlakuyninpa Pedro kashqanta reqiskirmi fiyupa kushikurqan. Saymi punkuta mana kichaylapa Pedro kaykashqanta wilakuq ruriman cörrila kutirqan.
[15] Wilaptinmi niyarqan: “¡Imanöpataq Pedro kanqa!” Rasunpaypa Pedro kashqanta niptinmi mana criyir niyarqan: “Angilnin parlamuq imatachir wiyapakushkanki”.
[16] Sayyaqqa Pedro yaparir yaparirmi punkuta takakurqan. Punkuta kicharir payta rikaykurnami lapanpis espantakuyarqan.
[17] Upälakuyänanpaq makinwan sëñarmi Pedro wilaparqan carcilpita Señor Jesucristo imanöpa jorqamushqantapis. Nirkurnami nirqan: “Carcilpita yarqamushqäta Santiaguta y wakin wawqi panikunatapis wilaykuyälay”. Saypitanami yarqurir jukläpana aywakurqan.
[18] Carcilcho Pedro mana warämush kaptinmi soldädukuna “Pedruta ¿imaraq päsash?” nir ima ruraytapis kamäpakuyarqansu.
[19] Maysaypa ashisirpis mana tariykurmi täpaq soldädukunata shumaq tapuskir Herodes mandarqan say soldädukunata wanusiyänanpaq. Nirkurmi Judeapita Cesareaman Herodes aywakurqan.
[20] Tirucho y Sidóncho taq runakuna Herodespa contran rurash kayaptinmi Herodes rabyakushpan say markakunaman mikuyta apasiyta munarqannasu. Sayno kaptinmi say runakuna Herodesman kachata kachakuyarqan parlayämunanpaq. Manaraq parlarmi Herodespa yanapaqnin Blastuwan amistäta rurayarqan. Blastunami Herodeswan parlarqan Tiro y Sidón runakunawan amistananpaq.
[21] Saymi Herodes jitaparqan juk junaq paykunawan parlayänanpaq. Say junaq chämuptinmi mas alinnin kaq mödananta jatikurqan. Nirkurnami juzgananpaq kaq sillëtaman jamaykur runakunata parlapämurqan.
[22] Sayta wiyaykurmi runakuna sinchipa niyarqan: “¡Kay parlaykämuq manami runasu, sinöqa juk diosmi!”
[23] Tayta Dioslata adorayänanpaq Herodes mana niptinmi Señor Jesucristo kachamushqan ángel jinan höra castigaptin kuru ushaypa wanurqan.
[24] Tayta Diospa wilakuyninta maysaychömi runakuna chaskikuyarqan.
[25] Bernabéwan Saulunami wawqi panikuna apasiyashqanta Jerusalénman chäsiyarqan. Nirkurmi Marcos niyashqan Juanta pushakurkur Antioquíaman kutikuyarqan.