[1] Say wisanmi Judeapita Antioquíaman aywaykur wakin runakuna wawqikunata kayno yachasiyarqan: “ Moisés qelqashqan leykuna niyashqanno mana señalakurqa manami salvakuyankisu”.
[2] Sayno yachasiyaptinmi Pablo y Bernabé paykunawan fiyupa rimanakuyarqan. Saymi Antioquía wawqi panikuna wilanakuskir Pabluta, Bernabéta y wakin wawqikunatapis Jerusalénman kachayarqan apostolkunata y mayor wawqikunata tapukayämunanpaq.
[3] Jerusalénpa aywaqno Feniciapa y Samariapa päsarmi wawqi panikunata wilayarqan mana Israel runakunapis Jesucristuta chaskikuyashqanta. Sayno wilapäyaptinmi lapanpis kushikuyarqan.
[4] Jerusalénman chäyaptinnami apostolkuna, mayor wawqikuna y lapan wawqi panikunapis paykunata kushish chaskikuyarqan. Saypitanami Pabluwan Bernabé wilapäyarqan markan markan puriyaptin Tayta Dios imano yanapashqanta.
[5] Saymi Jesúsman yärakuq wakin fariseukuna contran sharkur niyarqan: “Jesústa chaskikurpis mana Israel runakuna señalakuyäsun y Moisés qelqashqan leykunata cumpliyäsun”.
[6] Sayno niyaptinmi apostolkuna y mayor wawqikunapis shuntakaykur wilanakuyarqan.
[7] Qoyati apänakuyaptinmi Pedro sharkurkur nirqan: “Wawqikuna, musyayankimi mana Israel runakuna Jesucristuman manaraq yärakuyaptin wilakuyninta wilapänäpaq Tayta Dios akramashqanta.
[8] Tayta Dios musyanmi runapa shonqun imata yarpashqantapis. Saymi rasunpaypa criyiyashqanta musyasimänansipaq noqansiman kachamushqanno paykunamanpis Espíritu Santuta kachamush.
[9] Saynöpami musyansi Jesucristuman yärakuq kaqtaqa Israel runa kaptinpis mana Israel runa kaptinpis shonqunkunata purificar Tayta Dios salvashqanta.
[10] “Sayno kaykaptinqa ¿imanirtaq Tayta Diosta rabyanäsir discïpulukunata niyanki Moisés qelqashqan leykunata cumpliyänanpaq kashqanta? Say leykunataqa unay ayllunsikunapis ni kikinsipis manami cumpliyta kamäpakushkansisu.
[11] Israel runa kashqapis mana Israel runa kashqapis Señor Jesucristo kuyapämashpansimi salvamansi”.
[12] Pedro sayno niptinmi saycho kaq runakuna upälakuyarqan. Saynami Pabluwan Bernabé wilapäyarqan mana Israel runakuna kaqchöpis milagrukunata rurayänanpaq Tayta Dios yanapashqanta.
[13] Sayno wilapayta ushaskiyaptinmi Santiago nirqan: “Wawqikuna, wiyayämay.
[14] Simón wilamashkansi mana Israel runakunata wilapaptin Tayta Dios salvashqanta.
[15] Sayno kananpaqmi profëtakuna qelqayashqanchöpis kayno nikan:
[16] “ ‘Saypita kutimurmi Davidpa juchush wayinta yapay sharkasishaq. Unay kashqanno yapay kananpaqmi juchush kaqkunata alsashaq.
[17] Sayno rurashaq lapan runakunapis ashiyämänanpaqmi. Noqa akrashqä mana Israel runakunapis noqamannami yärakayämunqa.
[18] Noqa Tayta Diosmi sayno kananpaq nï. Sayno kananpaq unaypita pasami musyasirqä’.
[19] “Sayno niptinmi noqa nï: Mana Israel runakunapis Jesucristuman yärakuyaptin ama ima sapatapis churapäshunsu.
[20] Saypa trukanqa cartakushun ïdulukunapa jutincho pishtayashqan aysata mana mikuyänanpaq, fornicación jusata mana jusalikuyänanpaq, kikilan wanush uywakunapa aysanta mana mikuyänanpaq y uywapa yawarnintapis mana mikuyänanpaq.
[21] Saykunata cumpliyänanpaqqa unaypita pasami Moisés qelqashqan leykunata cada markacho yachaykäsiyan. Saynöpis cada jamay junaqmi sinagögakunacho liyiykäyan”.
[22] Sayno niptinmi apostolkuna, mayor wawqikuna y lapan wawqi panikunapis kushikuyarqan. Saymi Pablo y Bernabé Antioquíaman kutiyaptin walkiyänanpaq ishkay wawqikunata akrayarqan. Say wawqikunami kayarqan Judas y Silas. Judaspa jukaq jutinmi karqan Barsabás. Judastawan Silastami lapan wawqi panikunapis respitayaq.
[23] Paykuna apayashqan cartachömi kayno nirqan: Antioquíacho, Siriacho y Ciliciacho kaykaq mana Israel wawqi panikuna, qamkunapaqmi apostolkuna, mayor wawqikuna y Jerusaléncho kaykaq wawqi panikunapis kay cartata cartakayämü. Salüdükunatapis apasiyämümi.
[24] Noqakuna musyayashkä wakin wawqikuna Jerusalénpita shamur lutanta yachasir lakikasiyäshushqaykitami. [Paykunaqa nikäyan Moiséspa leyninta cumplir señalakuyänaykipaq kashqantami.] Paykunata manami noqakuna kachayämushkäsu.
[25] Sayta musyarmi lapäkuna wilanakuykur kuyayashqä Pabluwan y Bernabéwan shayämunanpaq ishkay wawqikunata kachaykäyämü.
[26] Pabluwan Bernabémi wanuytapis mana mansaypa Señorninsi Jesucristupa wilakuyninta wilakuykäyan.
[27] Paykunawanmi Judasta y Silasta kachaykäyämü kay cartacho qelqayämushqäta tantiyasiyäshunaykipaq.
[28] Manami noqakunapis ni Espíritu Santupis qamkunata obligayäsu Moisés qelqashqan leykunata cumpliyänaykipaq.
[29] Isanqa ïdulukunapa jutincho pishtayashqan aysata, kikilan wanush uywakunapa aysanta y uywapa yawarninta ama mikuyaysu. Saynöpis fornicación jusata ama jusalikuyaysu. Kay nishqäkunata cumpliyaptikiqa alimi kanqa. Aywalä.
[30] Despachayaptinmi Judaswan Silas Antioquíaman chäyashpan wawqi panikunata shuntaykur apayashqan cartata entregayarqan.
[31] Say cartata liyiparkuptinmi lapan kushikuyarqan.
[32] Judaswan Silaspis profëta kayashpanmi tukuynöpa tantiyasir wawqi panikunata shakyäsiyarqan.
[33] Saycho aska junaq qoyarkuyaptinnami Tayta Diosta manakurir Jerusalénman kutikuyänanpaq wawqi panikuna despachayarqan.
[34] [Sayno kaptinpis Silas saychömi quëdakurqan.]
[35] Pabluwan Bernabépis Antioquíacho quëdakuyashpanmi Jesucristupa ali wilakuyninta wakin wawqikunawan yachasiyarqan.
[36] Saypita aska killatanami Bernabéta Pablo nirqan: “Jesucristupa wilakuyninta wilakushqansi markakunaman kutir wawqi panikuna imano kaykäyashqantapis musyamushun”.
[37] Bernabémi Marcos niyashqan Juanta pushayta munarqan.
[38] Pablumi isanqa munarqansu, Panfiliapita kachariykur kutikamush kaptin.
[39] Saymi Pabluwan Bernabé seqaypa rimanakur rakikäyarqan. Bernabémi Marcusta pushakurkur büquiwan Chipriman aywarqan.
[40] Pablunami walkinanpaq Silasta akrarqan. Wawqi panikuna Tayta Diosta manakurkur kachayaptinmi paykunapis aywakuyarqan.
[41] Siria y Cilicia provinciakunacho markakunaman charmi Pabluwan Silas wawqi panikunata shakyäsiyarqan.