[1] Festo sayno niptinmi Pabluta Agripa nirqan: “Imano kashqantapis kanan wilayämay”. Saymi runakuna upälakuyänanpaq makinta joqarishpan Pablo nirqan:
[2] “Tayta Agripa, Israel autoridäkuna manakaqkunata tumpaykäyämashqanta kanan defiendikunäpaq nawpaykiman qayasimaptiki kushikümi.
[3] Qamqa musyankimi Israel runakunapa costumbrinkuna imano kayashqantapis y imapita rimanakuyashqantapis. Saymi kanan ruwakü parlamushqäta wiyaykamänaykipaq.
[4] “Markächöpis Jerusalénchöpis Israel mayïkuna lapanmi musyayan wamra kashqäpita pasa imano kawashqätapis.
[5] Saynöpis musyayanmi nawpapita pasa fariseo kar Moisés qelqashqan leykunata wakin runakunapitapis mas cumplishqäta. Saytaqa kikinkunapis wilapäyäshunkimanmi.
[6] “Kananqa unay ayllunsikunata Tayta Dios promitishqankunaman yärakuptïmi runakuna demandaykäyäman.
[7] Say promitishqankunata Tayta Dios cumplinanpaq kashqanman yärakurmi chunka ishkay trïbu Israel runakuna paqasta junaqta payta sirviyan. Tayta Agripa, noqapis paykunanöla yärakushqäpitami demandaykäyäman.
[8] ¿Imanirtaq criyiyankisu wanushkunata Tayta Dios kawarisimunanpaq kashqanta?
[9] “Nawpataqa noqapis yarparqä Nazaret markapita kaq Jesúsman yärakuqkunapa contran sharkur alita ruraykashqätami.
[10] Mandaq cürakuna kachamaptinmi Jesúsman yärakuqkunata Jerusaléncho askaqta carcilman wichqasirqä. Wanusiyaptinpis ‘alimi wanusiyanki’ nirqämi.
[11] Lapan sinagögakunachöpis Jesústa ñëgayänanta munar askaqtami prësu sarimurqä. Fiyupa chikirmi prësu sarimunäpaq karu markakunayaqpis aywarqä.
[12] “Saynöpami mandaq cürakuna ordinta qoyämaptin Damascuman aywaykarqä.
[13] Tayta rey, pulan junaqno aywaykäyaptïmi intipitapis mas chipipïmur asikyapaykayämarqan.
[14] Sayno chipipïmuptinmi lapäkuna tuniyarqä. Saychömi hebreo idiömacho kayno nimuqta wiyarqä: ‘Saulo, Saulo, ¿imanirtaq qatikachaykämanki? Picata töru jaytar däñakushqannömi kikilayki mana alita rurakuykanki’.
[15] Saymi nirqä: ‘¿Pitaq kanki, Taytay?’ Saymi nimarqan: ‘Noqaqa qatikachaykashqayki Jesúsmi kaykä.
[16] ¡Sharkuy! Qamta yuripashkä sirvimaqnï y wilakuqnï kanaykipaqmi. Saymi kanan rikashqaykikunata y rikasinäpaq kaqkunatapis wilakunki.
[17] Israel runakunapitapis y mana Israel runakunapitapis sapäshaykimi. Mana Israel runakunamanmi wilakuq qamta kachaykä.
[18] Nishqäkunata wilaptikimi runakuna tantiyakur sakäpakushno kawayashqanpita asikyaqchönöna kawayanqa. Satanáspa munaynincho kawayashqanpita Tayta Diospa makinchöna kawayanqa. Noqaman yärakayämaptinmi jusalikuyashqanta perdonashaq. Saynöpami salvash kaqkunawan Tayta Diospita herenciata chaskiyanqa’.
[19] “Tayta Agripa, jana pasapita sayno revelaykämaptinqa ¿imanirtaq cumplïmansu?
[20] Saymi Damascucho kaq runakunata wilakuyninta wilapar qalaykurqä. Nirkurmi wilakurqä Jerusaléncho y Judeacho kaq wakin markakunachöpis. Saypitanami mana Israel runakunatapis wilaparqä. Lapantami wilaparqä jusankunata wanakur Tayta Dios munashqanno kawayänanpaq.
[21] Sayta wilakushqäpitami wakin Israel runakuna templucho prësu sariykamar wanusimayta munayämash.
[22] Sayno kaptinpis Tayta Dios yanapämaptinmi yachaqtapis mana yachaqtapis wilakuyninta kananyaqpis wilapaykä. “Moisés y wakin profëtakuna qelqayashqancho nishqannölami wilakuykä.
[23] Paykuna qelqayashqancho nikan Tayta Dios kachamushqan Cristo nakar wanunanpaq kashqantami. Saynöpis nikan lapan runakunapitapis mas puntata kawarimur Israel runakunapaq y mana Israel runakunapaqpis aksi kashqantami”.
[24] Pablo sayno wilaptinmi Festo sinchipa nirqan: “¡Pablo, aläpa estudiarmi löcuyash kaykanki!”
[25] Sayno niptinmi Pablo nirqan: “Tayta Festo, manami löcusu kaykä. Noqa rasun kaqlatami parlaykä.
[26] Kay wilakuykashqätaqa pïmaypis musyanmi. Rey Agripapis musyaptinmi mana mansakuypa parlaykämü.
[27] Tayta Agripa, ¿profëtakuna qelqayashqanta criyinkiku? Noqa musyämi criyishqaykita”.
[28] Saymi Agripa nirqan: “¿Say nimashlaykiwan cristiänu kanäpaq kashqantaku yarpanki?”
[29] Niptinmi nirqan: “Jukla chaskikunayki kaptinpis o nirkurraq chaskikunayki kaptinpis noqaqa Tayta Diostami manakuykä qampis y kaycho wiyamaqkunapis noqano Jesucristuta chaskikuyänaykipaq. Isanqa manami munäsu noqano cadinash kayänaykitaqa”.
[30] Saypitanami rey Agripa, gobernador Festo, Berenice y lapan shuntakaqkunapis sharkur
[31] yarquyarqan. Nirkurmi kikinpura parlar niyarqan: “Kay runaqa manami imatapis rurashsu wanusish kananpaq ni carcilcho wichqaränanpaqpis”.
[32] Saymi Festuta Agripa nirqan: “Mandaq César arreglananpaq Pablo mana manakush kaptinqa kacharishwanmi karqan”.