[1] Pedruwan Juan wilakuykäyaptinmi cürakuna, saduceukuna y templu täpaq wardiakunapa capitanninpis chäyarqan.
[2] Jesucristo kawarimushqanno wanuqkuna kawariyämunanpaq kashqanta yachasiyaptinmi fiyupa rabyanäyarqan.
[3] Prësu sariykurmi tardina kaptin waraynin tutayaq carcilman wichqaykuyarqan.
[4] Sayno kaptinpis Pedruwan Juan wilakuyashqanta wiyar askaqmi criyiyarqan. Say criyiqkuna kayarqan pisqa waranqanömi (5,000).
[5] Waraynin tutanami Jerusaléncho shuntakäyarqan Israel runakunapa autoridäninkuna, mayor runakuna y ley yachasiqkunapis.
[6] Paykunawanmi shuntakäyarqan mas mandaq cüra Anáspis, Caifáspis, Juanpis, Alejandrupis y Anáspa wakin ayllunkunapis.
[7] Nirkurmi Pedrutawan Juanta carcilpita jorqaskasimur tapuyarqan: “¿Ima munaynikiwantaq y pipa jutinchötaq kaykunata rurayashkanki?” nir.
[8] Niyaptinmi Espíritu Santupa munayninwan Pedro nirqan: “Autoridäkuna y Israel mayor runakuna,
[9] ¿paralïticu runata aliyäsiyashqäpitaku tapuyämanki?
[10] Qamkunapis y lapan Israel runakunapis, wiyayämay. Nazaretpita kaq Jesúspa jutinchömi kay runata aliyäsiyashkä. Payta crucificaypa wanusish kayaptikipis Tayta Diosmi kawarisimush.
[11] ‘Kay rumi manami alisu’ nir wayi sharkasiqkuna jitariqnömi payta wanusiyashkanki. Sayno kaptinpis wayi esquïna cimientucho churaraykaq ruminömi kaykan.
[12] Jesucristulami salvamaqninsiqa kaykan. Paypita mas jukqa salvamänansipaq manami pipis kansu”.
[13] Pedruwan Juan shumaq mana estudiash kaykarpis mana mansariypa wilakuyaptinmi autoridäkuna admirakuyarqan. Saymi Jesúspa discïpulunkuna kayashqanta tantiyakuyarqan.
[14] Aliyäsishqan runa saycho ichiraykaqta rikarmi ima niytapis kamäpakuyarqansu.
[15] Shuntakäyashqanpita Pedrutawan Juanta waqtaman jorqaskasirmi kikinpura wilanakur niyarqan:
[16] “¿Imatataq kay runakunata rurashun? Say runata aliyäsiyashqanta Jerusaléncho taq lapan runakunami musyayan. Saytaqa manami ñëgashwansu.
[17] Isanqa wilakuyashqan maysaymanpis mana chänanpaq paykunata albirtishun Jesúspa jutincho pitapis manana wilakuyänanpaq”.
[18] Sayno wilanakurkurmi waqtapita qayaykasimur niyarqan Jesúspa jutincho imaypis manana wilakuyänanpaq ni mana yachasiyänanpaq.
[19] Sayno niyaptinmi Pedruwan Juan niyarqan: “Taytakuna, shumaq tantiyakuyay. ¿Aliku kanman Tayta Diosta cäsukuyänäpa trukan qamkunata cäsukuyaptï?
[20] Rikayashqäta y wiyayashqätaqa mana upälakuypami imaypis wilakuyäshaq”.
[21] Paralïticu runata aliyäsiyashqanpita lapan runakuna Tayta Diosta alabayaptinmi autoridäkuna castigayarqannasu. Saypa trukanqa jurapaykularmi kachariyarqan.
[22] Jesúspa munayninwan aliyaq runaqa chusku chunka (40) watayuqpita maslami karqan.
[23] Carcilpita yarquskirnami Pedruwan Juanqa yärakuq mayinkunaman kutiykur wilayarqan mandaq cürakuna y Israel mayor runakuna imata niyashqantapis.
[24] Sayno wilayaptinmi lapanpis Tayta Diosta manakur niyarqan: “Tayta Dios, qammi kamashkanki jana pasata, kay pasata, lamarta y lapan imaykatapis.
[25] Espíritu Santu tantiyasiptinmi sirvishuqniki David nirqan: “¿Imanirtaq runakuna Diospa contran sharkuyan? ¿Imanirtaq manakaqkunata yarpäyan?
[26] Tayta Diospa y akrashqan Cristupa contran sharkuyänanpaqmi kay pasacho reykuna y autoridäkuna shuntakar wilanakuyan”.
[27] “David nishqannölami Herodespis, Poncio Pilatupis, mana Israel runakunapis y Israel runakunapis kay Jerusaléncho shuntakäyarqan santu sirvishuqniki Jesúspa contran sharkuyänanpaq. Paytami salvakuq Cristo kananpaq churashkanki.
[28] Sayno kananpaq unaypita nishqaykinölami lapantapis rurayarqan.
[29] “Autoridäkuna rimayämashqanta wiyashkankimi, Tayta Dios. Kanan yanapaykayälämay wilakuynikita mana mansariypa wilakuyänäpaq.
[30] Santu sirvishuqniki Jesúspa jutincho tukuy milagrukunata rurayänäpaq y qeshyaqkunatapis munaynikiwan aliyäsiyänäpaq yanapaykayälämay”.
[31] Tayta Diosta manakuyta ushaskiyaptinmi shuntaraykäyashqan wayi suksukyarqan. Saymi Espíritu Santupa munayninwan Tayta Diospa wilakuyninta mana mansariypa wilakuyarqan.
[32] Jesucristuman yärakuqkuna lapanpis say yarpaylami kayarqan. Saymi imatapis kikinkunapaq churakuyänanpa trukanqa nistäyashqanman tupu rakipänakuyaq.
[33] Señor Jesucristo kawarimushqanta mana mansariypami apostolkuna wilakuyaq. Lapan yärakuqkunatami Tayta Dios shumaq yanaparqan.
[34] Saymi paykunaqa mayqanpis muchüyarqansu. Chakrankunata wayinkunata rantikuykurmi say qellayta
[35] apostolkunaman apayaq. Paykunanami muchuqkunata nistäyashqanman tupu aypuyaq.
[36] Saynölami José jutiyuq runapis rurarqan. Payqa Chipre islapita Leví trïbu runami karqan. Paypa kuyay jutintami apostolkuna churapäyarqan Bernabé kananpaq. Say jutiqa “kuyapäkuq runa” ninanmi.
[37] Bernabémi chakranta rantikuskir qellayta apostolkunata apapaykurqan.