[1] Estebanta wanusiyaptin Saulupis kushikurqanmi. Say junaqpitanami Jesúsman yärakuqkunata Jerusaléncho qatikachar qalaykuyarqan. Judeapa y Samariapa qeshpir aywakuyaptinmi apostolkunalana Jerusaléncho quëdakuyarqan.
[2] Estebanpa ayantami Tayta Dios munashqanno kawaqkuna fiyupa lakikuyashpan pampayarqan.
[3] Saulunami Jesúsman yärakuqkunata wayin wayin ashir tarishqan kaqta warmitapis olqutapis carcilman wichqasirqan.
[4] Jerusalénpita qeshpiqkunami maysaychöpis ali wilakuyta wilakuyarqan.
[5] Saynölami Felipipis Samaria markaman chaykur Jesús salvamaqninsi Cristo kashqanta wilakurqan.
[6] Saychömi milagrukuna rurashqanta rikar y parlashqanta wiyar lapan runakuna kushikuyarqan.
[7] Runakunapita qarquptinmi supaykunapis qaparaykar yarquyarqan. Saynölami aska weqrukunatapis y paralïticu runakunatapis aliyäsirqan.
[8] Sayno ruraptinmi say markacho taqkuna seqaypa kushikuyarqan.
[9] Saychömi karqan Simón jutiyuq juk brüju. “Noqa yachaqmi kä” nishpanmi Samaria runakunata nawpapita pasa criyisirqan.
[10] Simón nishqankunata wiyarmi muchuqpis kapuqyuqpis niyaq: “¡Kay runataqa Tayta Diosmi yanapaykan!”
[11] Simón brüju kashpan nawpapita pasa mägicawanmi runakunata engañaq.
[12] Sayno kaptinpis Tayta Dios mandaykashqanpa ali wilakuyninta y Jesucristupita Felipe wilakuptinnami runapis warmipis chaskikur bautizakuyarqan.
[13] Kikin Simónpis criyishpan bautizakuskirmi Felipe maypa aywaptinpis paywan purirqan. Señalkunata y milagrukunata rurashqanta rikarmi Simón fiyupa espantakurqan.
[14] Samariacho Diospa wilakuyninta runakuna chaskiyashqanta musyarmi Jerusaléncho kaykaq apostolkuna Pedrutawan Juanta sayman kachayarqan.
[15] Chaykurmi Tayta Diosta manakuyarqan Samaria runakunapis Espíritu Santuta chaskikuyänanpaq.
[16] Jesúspa jutincho bautizakush kaykarpis Espíritu Santuta manaraqmi mayqanpis chaskishqaraqsu kayarqan.
[17] Saymi paykunapa umankunata churaykur manakuyaptin Espíritu Santuta chaskikuyarqan.
[18] Sayta rikarmi Simónqa apostolkunata pägayta munar
[19] nirqan: “Say munaynikita rantikaykalämay noqapis runakunapa umanman makïta churaykuptï Espíritu Santuta chaskikuyänanpaq”.
[20] Sayno niptinmi Pedro nirqan: “¿Imanirtaq Tayta Dios qarashqan Espíritu Santu rantina kashqanta yarpaykanki? ¡Sayno yarpashqaykipita qellaynintintami supayniki apashunki!
[21] Qam yarpashqaykiqa manami Tayta Dios munashqannösu kaykan. Sayno kaykarqa manami noqakuna rurashqäman jatikämunkimansu.
[22] Lutan yarpashqaykikunata kacharir perdonashunaykipaq Tayta Diosta manakuy. Manakuptiki paqta perdonashunkimanpis.
[23] Jusalikuypa munaylancho kashpayki envidiösu kashqayki reqipalami kaykan”.
[24] Sayno niptinmi Simón ruwakur nirqan: “Nishqaykikuna mana päsamänanpaq Tayta Diosta manakuykuyälay”.
[25] Tayta Diospa wilakuyninta saycho wilakuskirnami Pedruwan Juan Jerusalénman kutiqno Samariacho kaykaq wakin markakunachöpis wilakuyarqan.
[26] Saypitanami Tayta Diospa angilnin Felipita nirqan: “Sur kaqläpa yarqur Jerusalénpita Gaza markaman aywaq nänipa ayway. Say nänimi sunyaq jirkapa päsaykan”.
[27] Saymi Felipe say nänipa aywar Etiopía nacionpita juk eunucu runata rikarqan. Paymi Etiopía nacioncho reina Candacipa tesorërun karqan. Tayta Diosta adoraq Jerusalénman aywashqanpita
[28] kutirmi carrëtanman jamaykur profëta Isaías qelqashqan libruta liyiraykar aywaykarqan.
[29] Saymi Felipita Espíritu Santu nirqan: “Say carrëtawan aywaykaq runaman witipay”.
[30] Nishqanno witiparmi wiyarqan profëta Isaías qelqashqan libruta liyiykaqta. Saymi tapurqan: “Say liyiykashqaykita ¿tantiyankiku?” nir.
[31] Sayno niptinmi nirqan: “Pipis mana tantiyasimaptinqa ¿imanöparaq tantiyashaq?” Nirkurmi Felipita ruwakurqan carrëtaman wisarkur nawpanman jamananpaq.
[32] Tayta Diospa palabranta liyiykashqan kaynömi nirqan: “Uyshata pishtananpaq apaqnömi payta apayarqan. Milwanta rutuyaptin uysha wiyaräkushqannömi upälala wiyaräkurqan. Sayno upälakushpan manami juk shimilapis parlakurqansu.
[33] Manakaqman churayaptinpis manami favornin pipis sharkurqansu. Payta wanusiyaptin surinpis manami karqansu”.
[34] Saymi Felipita eunucu nirqan: “Tantiyaykasilämay, taytay. Profëta Isaías ¿pipaqtaq kayta qelqarqan? ¿Kikinpaqku o jukpaqku?”
[35] Sayno tapuptinmi liyishqanta tantiyasir Jesúspa ali wilakuyninta Felipe wilaparqan.
[36] Saypita aywaykäyashqancho yaku kashqanman chaykurmi say eunucu nirqan: “Kaycho yaku kaykaptinqa ¿manasuraq bautizaykalämankiman?”
[37] [Niptinmi Felipe nirqan: “Lapan shonquykiwan criyiptikiqa bautizashayki ari”. Sayno niptinmi nirqan: “Jesucristo Tayta Diospa Surin kashqanta rasunpaypami criyï”.]
[38] Saymi carrëtanta ichiykasir yakuman uräyarqan. Saychömi eunucuta Felipe bautizarqan.
[39] Yakupita yarqaskayämuptinmi Felipita Señor Jesucristupa Espïritun jukläpa apakurqan. Payta manana rikarpis eunucuqa kushishqami aywakurqan.
[40] Azoto markachöna rikakurmi Felipiqa Jesúspa ali wilakuyninta wilakur markan markan purirqan. Sayno wilakuraykarmi Cesarea markaman charqan.