[1] Corintucho Apolos kaykaptinmi Pabluqa markan markan aywar Éfesuman charqan. Saycho discïpulukunata tariykurmi
[2] tapurqan: “¿Qamkunaqa Jesucristuta chaskikur Espíritu Santuta chaskikuyashkankiku?” nir. Saymi niyarqan: “Espíritu Santu kashqanta manami imaypis mayayashkäsu”.
[3] Saymi Pablo yapay tapurqan: “Sayno kaptinqa ¿pipa yachasikuyninta chaskikurtaq bautizakuyashkanki?” Niptinmi niyarqan: “Juanpa yachasikuyninta chaskikurmi bautizakuyashkä”.
[4] Saymi Pablo nirqan: “Juanqa runakunata bautizarqan jusankunata wanakur Tayta Dios munashqanno kawayänanpaqmi. Saynöpis yachasirqan Jesucristo shamuptin payman yärakuyänanpaqmi”.
[5] Sayno niptinmi Señor Jesucristupa jutincho bautizakuyarqan.
[6] Paykunapa umanta yataykur Tayta Diosta Pablo manakuptinmi Espíritu Santu paykunaman charqan. Saymi juk idiömakunapa parlayashpan Tayta Dios tantiyasishqankunata parlayarqan.
[7] Say runakuna chunka ishkaynömi kayarqan.
[8] Éfesucho tarmi sinagögaman aywar Tayta Dios mandaykashqanpita Pablo kimsa killantin mana mansariypa yachasirqan.
[9] Sayno yachasiptinpis wakin runakuna Jesúsman yärakuyta mana munarmi lapanpa nawpancho Diospa Näninta manakaqman churayarqan. Saymi Jesúsman yärakuqkunawan sinagögapita yarqukur Tiranno jutiyuq runapa yachasikuna wayinchöna Pablo waran waran yachasirqan.
[10] Ishkay watana sayno yachasiptinmi intëru Asia provinciacho Israel runakunapis y mana Israel runakunapis Señor Jesucristupa wilakuyninta wiyayarqan.
[11] Saychömi Tayta Diospa munayninwan milagrukunata Pablo rurarqan.
[12] Saymi Pablo töpashqan pañuëlukunata y mandilkunatapis qeshyaykaqkunaman apayarqan. Saykunata töpasiptinmi qeshyaqkuna aliyäyaq y supaykunapis runakunapita yarquyaq.
[13] Say wisanmi wakin Israel runakunapis puriykäyarqan runakunapita supaykunata qarqur. Paykunapis Jesúspa jutincho supaykunata qarquyta munarmi niyarqan: “Pablo wilakushqan Jesúspa jutinchömi qamta qarqü”.
[14] Sayno rurayarqan mandaq cüra Escevapa qanchis surinkunami.
[15] Qarquyta kamayaptinmi supay nirqan: “Noqa reqïmi Jesústa. Pablo pï kashqantapis musyämi. Qamkuna ¡pitaq kayanki noqata qarqayämänaykipaq!”
[16] Sayno nirmi supay nakasishqan runa löcutashpan paykunata maqar usharqan. Saymi pasaypa yawarlana say wayipita qarapächu qeshpir aywakuyarqan.
[17] Sayno päsashqanta mayaykurmi Éfesucho taq Israel runakunapis y mana Israel runakunapis fiyupa mansariyarqan. Saymi maysaychöpis runakuna musyayarqan Señor Jesucristo munayyuq kashqanta.
[18] Jusalikuyashqanta tantiyakurmi Jesucristuman wakin yärakuqkunapis jusalikuyashqanta pakayarqannasu.
[19] Saynölami brüju rurakuyänan mágica librunkunatapis shuntaykur lapanpa nawpancho rupasiyarqan. Say librukunapa chaninta jorquyaptin karqan pisqa chunka waranqa (50,000) jornalpa chaninmi.
[20] Saynöpami Tayta Diospa wilakuynin munayyuq kashqanta tantiyakur aska runakuna chaskikuyarqan.
[21] Saypitanami Pablo yarparqan Jerusalénpa aywananpaqqa Macedonia provinciacho y Acaya provinciacho kaq wawqi panikunataraq watukayta. Saynöpis yarparqan Jerusalénpitaqa Romapana aywaytami.
[22] Sayno yarparmi Macedonia provinciaman nawpäyänanpaq Timoteutawan Erastuta kacharqan. Nirkurmi Asia provinciacho quëdakurqan.
[23] Say wisanmi Diospa Näninpita wilakuyaptin Éfesucho runakuna fiyupa rabyakuyarqan.
[24] Sayno rabyakuyarqan Demetrio jutiyuq runa shimita qoptinmi. Paymi Artemisa niyashqan diösapa akapala templunkunata qellaypita ruraq. Saykunata rantikurmi Demetriuqa aruq mayinkunawan aska qellayta gänayaq.
[25] Aruq mayinkunata y paykunano oficiuyuq runakunatapis qayaykasirmi nirqan: “Qamkuna musyayankimi kay aruyninsiwan ali gänashqansita.
[26] Rikayashqaykinöpis y wiyayashqaykinöpis Pablo yachasir nikan: ‘Runa rurashqan ïdulukunaqa manami rasunpaypa Diossu’. Sayno yachasir aska runakunatami kay Éfesucho y intëru Asia provinciachöpis criyiykäsin.
[27] Sayno criyisiptinmi arushqansikunata y diosninsi Artemisapa templuntapis manakaqman churayanqa. Artemisata intëru Asiacho taqkuna y intëru munduchöpis mananami respitayanqanasu”.
[28] Demetrio sayno niptinmi aruq mayinkuna fiyupa rabyakur yaparir yaparir niyarqan: “¡Diosninsi Artemisa alabash kasun!”
[29] Sayno niyashqanta wiyarmi say markacho taq wakin runakunapis pasaypa qayaräyarqan. Fiyupa rabyanäyashpanmi Gayutawan Aristarcuta coliseuman prësu apayarqan. Gayuwan Aristarcuqa Macedoniapitami Pabluta yanapar shayämush karqan.
[30] Runakunata tantiyasinanpaq Pablupis coliseuman aywayta munaptinmi wawqi panikuna michäyarqan.
[31] Say provinciapa wakin autoridäninkunapis Pabluwan reqinakurmi wilakasiyarqan coliseuman mana aywananpaq.
[32] Coliseucho runakuna jukno jukno parlar büllata rurayaptinmi wakin runakuna imapaq sayman shuntakäyashqantapis musyayarqansu.
[33] Saycho kaykaq Israel runakunanami Alejandro jutiyuq runata parlamunanpaq yaykasiyarqan. Saymi runakunapa nawpanman Alejandro yaykuykur makinwan sëñarqan upälakuyänanpaq.
[34] Alejandro Israel runa kashqanta musyayashpanmi say runakuna ishkay hörano qayaräyashpan niyarqan: “¡Diosninsi Artemisa alabash kasun!”
[35] Sayno niyaptinmi markapa mas mandaqnin autoridä upälakuyänanpaq sëñata rurar nirqan: “¡Éfeso runakuna! Maysaychöpis runakuna musyayanmi Artemisapa templun kay markacho kashqanta. Saynöpis musyayanmi ciëlupita unyamuq Artemisa niraq rumitapis sararashqansita.
[36] Saytaqa pïmaypis musyanmi. Lutala qayararqa lutantataq rurayankiman.
[37] Prësu apayämushqayki runakuna manami templunsipita imatapis apakuyashsu ni diosninsi Artemisatapis manakaqman churayashsu.
[38] Sayno kaykaptinqa Demetrio y aruq mayinkuna kay runakunata quejakuyta munarqa autoridäkunaman quejakuyäsun.
[39] Imalapis wilanakunansipaq kaptinqa lapan autoridäkunata shuntaykur sesionta rurashun.
[40] Lutala qayaräyaptikiqa Roma autoridäkuna contran sharkushqansitami yarpäyanqa. Saypita juzgamashqaqa manami ima niytapis kamäpakushunsu”.
[41] Sayno niskirmi lapan runakunata nirqan aywakuyänanpaq.