[1] Kî-thien ke lai-é Â-pí-mí-le̍t to Sṳ-kiam; kì ke-têu mû-khiû he̍t chhai ke-vi. Kì yêu-khiù mû-khiû lâu kì chiá-kûng chhiòn-kâ ke ngìn kóng:
[2] “Chhiáng ngì-têu mun Sṳ-kiam-ngìn: ‘Ngì-têu oi má-ngìn lòi chhṳ-lî ngì-têu? Kî-thien só-yû ke chhit-sṳ̍p ke lai-é nè? Ya-he yit-ke ngìn nè?’ Oi ki-tet, ngài — Â-pí-mí-le̍t he ngì-têu ke kut-ngiuk ô!”
[3] Kì ke-têu mû-khiû chhiu thoi kì hi-mun Sṳ-kiam-ngìn; Sṳ-kiam-ngìn kiet-thin thèn Â-pí-mí-le̍t, yîn-vi kì-têu kóng: “Kì he ngài-têu ke hiûng-thi.”
[4] Kì-têu tui Pâ-li̍t-Pí-li-thú ke meu-tú nâ-chhut chhit-sṳ̍p chak ngiùn-pi pûn Â-pí-mí-le̍t; kì yung liá-chhièn chhiáng yit-khiùn lù-màn-é lòi thèn kì.
[5] Kì chón-to Ngò-fut-lâ kiâ-pâ vuk-hâ, chhai yit-te thai sa̍k-thèu táng chiông Kî-thien ke chhit-sṳ̍p ke lai-é, chhiu-he kì ke-têu hiûng-thi, chhiòn-phu chhṳ̀-thet. Chúng-he Kî-thien chui-se ke lai-é Yok-thán khong hí-lòi, mò pûn-ngìn chhṳ̀-sí.
[6] Só-yû ke Sṳ-kiam-ngìn lâu Mí-lò-ngìn lièn-ha̍p hí-lòi, chhai Sṳ-kiam ke-thèu sṳn siong-su piên, li̍p Â-pí-mí-le̍t cho-vòng.
[7] Yok-thán yit thâng-tó liá-sṳ chhiu to Kî-li-sîm-sân, khî chhai sân-táng, thai-sâng hiong kì-têu hêm-kóng: “Sṳ-kiam-ngìn â! Ngì-têu thâng ngài kóng, Song-ti chang voi thâng ngì-têu ke khì-khiù!
[8] Thèu-pái, sêm-lìm tú ke su-é oi li̍p yit-ke vòng. Kì-têu tui kám-lám-su kóng: ‘Chhiáng ngì cho ngài-têu ke vòng.’
[9] Kám-lám-su en-kóng: ‘Ngài kám cho-tet thìn-chṳ́ sên-sán fu̍k-sṳ sṳ̀n-mìn lâu kiûng-kip ngìn ke kám-lám-yù, hi thúng-chhṳ ngì-têu mò?’
[10] Su-é tui vù-fâ-kó-su kóng: ‘Chhiáng ngì cho ngài-têu ke vòng.’
[11] Vù-fâ-kó-su en-kóng: ‘Ngài kám cho-tet thìn-chṳ́ kiet kâm-thiàm ke kó-chṳ́, hi thúng-chhṳ ngì-têu mò?’
[12] Su-é tui phù-thò-su kóng: ‘Chhiáng ngì cho ngài-têu ke vòng.’
[13] Phù-thò-su en-kóng: ‘Ngài kám cho-tet thìn-chṳ́ sṳ́ sṳ̀n-mìn lâu ngìn fôn-hí ke chiú, hi thúng-chhṳ ngì-têu mò?’
[14] Só-yû ke su-é tui net-è kóng: ‘Chhiáng ngì cho ngài-têu ke vòng.’
[15] Net-è en-kóng: ‘Na-he ngì-têu sṳ̀n-sîm oi li̍p ngài cho ngì-têu ke vòng, chhiu lòi vá-kho ngài ke pí-yim, ngài voi pó-fu ngì-têu; na-mò, yû fó voi tui net-è chhut-lòi, chiông Lì-pâ-nun ke hiông-pak-su sêu chhiang-chhiang.’ ”
[16] Yok-thán ki-siu̍k kóng: “Liá-ha, ngì-têu chṳn-kîn sṳ̀n-sîm sṳ̀n-yi li̍p Â-pí-mí-le̍t cho vòng he-mò? Ngì-têu kám m̀-he yin-tông ki-ngiam Kî-thien, cheu kì ke kûng-lò hó khoán-thai kì vuk-hâ ke ngìn?
[17] Ngì-têu m̀ ki-tet ngâ-pâ tai-liâng ngì-têu siông-chhṳ̀, piang-sâng piang-sí kié-kiu ngì-têu lì-khôi Mí-thien-ngìn, he-mò?
[18] Mò sióng-tó, kîm-pû-ngit ngì-têu kin-yèn phoi-ngia̍k ngâ-pâ ke kâ-chhu̍k; ngì-têu chhai yit-te thai sa̍k-thèu táng chhṳ̀-thet kì chhit-sṳ̍p ke lai-é. Yîn-vi kì nù-pî ke lai-é Â-pí-mí-le̍t he ngì-têu ke hiûng-thi, ngì-têu chhiu li̍p kì cho Sṳ-kiam-vòng.
[19] Ngì-têu kîm-pû-ngit na-he chṳn-kîn sṳ̀n-sîm sṳ̀n-yi oi án-ngiòng khoán-thai Kî-thien lâu kiâ vuk-hâ ngìn, ngài chuk-fuk ngì-têu lâu Â-pí-mí-le̍t pí-chhṳ́ yîn-vi tui-fông tet-tó khoai-lo̍k;
[20] na m̀-he án-ngiòng, ngien Â-pí-mí-le̍t piong-fó sêu-chhiang Sṳ-kiam-ngìn lâu Mí-lò-ngìn, ya ngien Sṳ-kiam-ngìn lâu Mí-lò-ngìn piong-fó sêu-thet Â-pí-mí-le̍t.”
[21] Yok-thán yîn-vi kiâng kiâ-kô Â-pí-mí-le̍t, chhiu thò-chéu, lòi-to Pí-ngí, he̍t chhai ke-vi.
[22] Â-pí-mí-le̍t thúng-chhṳ Yî-set-lie̍t sâm-ngièn.
[23] Heu-lòi Song-ti sṳ́ Â-pí-mí-le̍t lâu Sṳ-kiam-ngìn yû yên-sù, Sṳ-kiam-ngìn chhiu phoi-ngia̍k Â-pí-mí-le̍t.
[24] Liá chhiu-he oi po-yin Â-pí-mí-le̍t lâu pông-chhu kì chhṳ̀-sí Kî-thien chhit-sṳ̍p ke lai-é ke Sṳ-kiam-ngìn.
[25] Sṳ-kiam-ngìn phai-ngìn chhai tak-chak sân-táng mài-fu̍k, oi chhṳ̀ Â-pí-mí-le̍t. Kì-têu chhióng só-yû kîn-ko liá-thiàu lu ke ngìn. Yû ngìn chiông liá-sṳ lâu Â-pí-mí-le̍t kóng.
[26] Yî-phe̍t ke lai-é Kâ-le̍t lâu kì ke-têu hiûng-thi lòi-to Sṳ-kiam; Sṳ-kiam-ngìn chhiòn-phu sin-ngim kì.
[27] Kì-têu to phù-thò-yèn chak phù-thò, kiuk-chiú, phan yèn-si̍t. Kì-têu hi-to kì-têu ke sṳ̀n-meu, chhai ke-vi yu-sṳ̍t yu-lîm, chu-ma Â-pí-mí-le̍t.
[28] Yî-phe̍t ke lai-é Kâ-le̍t kóng: “Ngài-têu Sṳ-kiam-ngìn he má-ke ngìn? Cho-má-ke oi fu̍k-sṳ Â-pí-mí-le̍t? Kì son má-ke? Kì he Kî-thien ke lai-é thin-thin! Kì ke chhu-sú kám m̀-he Sî-pu-le̍t. Ngài-têu cho-má-ke oi fu̍k-sṳ kì nè? Oi chûng-sîm fu̍k-sṳ Sṳ-kiam ke â-pâ Ha̍p-mat ke heu-thoi!
[29] Hî-mong liá ngìn-mìn pûn ngài lòi tai-liâng! Ngài chhiu voi chhù-thet Â-pí-mí-le̍t! Ngài voi lâu kì kóng: ‘Kâ phai-têu kiûn-chhui, chhut-lòi siông-chhṳ̀ â!’ ”
[30] Sṳ-kiam-sàng ke liâng-chhiu Sî-pu-le̍t thâng-tó Yî-phe̍t ke lai-é Kâ-le̍t ke fa, fî-sòng fat-khién.
[31] Kì phai sṳ́-chá to Â-lû-mâ hiong Â-pí-mí-le̍t po-ko: “Yî-phe̍t ke lai-é Kâ-le̍t lâu kì ke hiûng-thi lòi-to Sṳ-kiam, san-thung sàng-tú ke ngìn fán-tui ngì.
[32] Só-yî, ngì oi chhai am-pû-sṳ̀ tai-liâng phu-ha mài-fu̍k chhai sàng-ngoi,
[33] thiên-kông chêu-sṳ̀n, thiên yit-kông ngì chhiu lòi kûng-tá liá-sàng. Kâ-le̍t lâu kì ke khiùn-chung chhut-lòi siông-chhṳ̀ ke sṳ̀, ngì oi chhin chhiòn-li̍t kûng-tá kì!”
[34] Só-yî, Â-pí-mí-le̍t chhai am-pû-sṳ̀ tai-liâng phu-ha, fûn-cho si-chhui, mài-fu̍k chhai Sṳ-kiam sàng-ngoi.
[35] Â-pí-mí-le̍t lâu kì ke phu-ha yit khon-tó Kâ-le̍t chhut-lòi, khî-chhai sàng mùn-héu, kì-têu chhiu tui mài-fu̍k ke thi-fông chhut-lòi.
[36] Kâ-le̍t khon-tó, chhiu tui Sî-pu-le̍t kóng: “Ngì khon, yû-ngìn tui sân-táng hâ-lòi lé!” Sî-pu-le̍t en-kóng: “Ngì khon m̀-chho̍k lé; ngì chiông sân ke yîm-yáng khon-cho ngìn!”
[37] Kâ-le̍t yu kóng: “Ngì khon, yû-ngìn tui sân tûng-ông hâ-lòi; nang-ngoi yû yit-chhui tui ‘Puk-koa ke Siong-su’ ke-thiàu lu ko-lòi!”
[38] Sî-pu-le̍t tui kì kóng: “Ngì yî-chhièn kám m̀-he phùn kiê-kôi kóng: ‘Â-pí-mí-le̍t he má-ngìn? Ngài-têu ngióng-oi fu̍k-sṳ kì?’ Liá-têu ngìn chhiu-he ngì só khon-khiâng ke. Liá-ha, ngì chhut-hi siông-chhṳ̀ â!”
[39] Só-yî Kâ-le̍t tai-liâng Sṳ-kiam-ngìn chhut-hi lâu Â-pí-mí-le̍t siông-chhṳ̀.
[40] Â-pí-mí-le̍t tûi-tá Kâ-le̍t, Kâ-le̍t chhiu thò-chéu; su-sông vang lo̍k-hi ke ngìn tông-tô, theu-lu chhṳ̍t-to sàng-mùn.
[41] Â-pí-mí-le̍t he̍t chhai Â-lû-mâ. Sî-pu-le̍t chiông Kâ-le̍t lâu kì ke-têu hiûng-thi chhiòn-phu kiuk-chhut Sṳ-kiam, m̀-chún kì-têu chai he̍t chhai ke-vi.
[42] Thi-ngi ngit, Â-pí-mí-le̍t fat-hien Sṳ-kiam-ngìn kie-va̍k sái-to sàng-ngoi,
[43] kì chhiu chiông phu-ha fûn-cho sâm-chhui, mài-fu̍k chhai sàng-ngoi. Kì yit khon-tó mìn-chung lì-khôi sàng-tú, chhiu tui mài-fu̍k ke thi-fông chhut-lòi chhṳ̀ kì-têu.
[44] Â-pí-mí-le̍t tai-liâng yit-chhui phu-ha chhûng ko-hi khon-sú sàng-mùn; nang-ngoi lióng-chhui chhûng-to sàng-ngoi, chhṳ̀-thet sàng-ngoi ke mìn-chung.
[45] Â-pí-mí-le̍t kûi-ngit kûng-tá sàng, chui-heu chiông sàng tá-hâ, chhṳ̀-thet sàng-tú ke ngìn-mìn, chhak-thet ke-sàng, yu ve-yàm chhai thi-song.
[46] Chhai Sṳ-kiam sàng-pó tî-poi ke liâng-chhiu thâng-tó liá-sṳ, chhiu khong-ngi̍p Yî-le̍t-Pí-li-thú-meu ke thi-lùng tú.
[47] Yû-ngìn chiông liá-sṳ lâu Â-pí-mí-le̍t kóng,
[48] kì chhiu tai phu-ha to Sat-mùn-sân hi. Â-pí-mí-le̍t nâ yit-kî pú-thèu to̍k yit-kî thai su-khoá, khià chhai kiên-thèu táng, kì ya ham phu-ha kón-kín cheu-tén cho.
[49] Só-yî tak-ke ngìn to̍k yit-kî thai su-kî, thèn Â-pí-mí-le̍t, chiông su-kî tôi chhai thi-lùng chû-vì. Kì-têu piong-fó sêu thi-lùng, Sṳ-kiam sàng-pó ke ngìn chhiòn-phu sêu sí-thet, nàm-ńg yok-yû yit-chhiên ngìn.
[50] Chiap-tén, Â-pí-mí-le̍t to Thì-phi-sṳ̂ vì-kûng, cham-liâng liá-sàng.
[51] Sàng-chûng yû yit-chho kiên-ku ke thap; sàng-tú só-yû ke ngìn, mò-lun nàm-ńg, chhiòn-phu thò-ngi̍p thap-tú. Kì-têu chiông mùn koân-hó, chéu-to thap-táng.
[52] Â-pí-mí-le̍t kûng-tá liá-thap, hàng-khiûn mùn-héu oi piong-fó sêu-thap.
[53] Yû yit-ke fu-ngìn-kâ te̍p yit-te thai mo-sa̍k, tá-tó Â-pí-mí-le̍t ke thèu-nà, tá-lan kì ke thèu-nà hok;
[54] kì kón-kín hêm ke thoi kì nâ vú-hi ke heu-sâng ngìn lòi, tui kì kóng: “Tô-é pâng chhut-lòi chhṳ̀ ngài â! Ngài mò-oi pûn-ngìn kóng ngài he pûn yit-ke fu-ngìn-kâ chhṳ̀-sí ke.” Só-yî ke heu-sâng ngìn yung tô-é chhiuk-chhôn Â-pí-mí-le̍t, kì chhiu sí-thet.
[55] Yî-set-lie̍t-ngìn khon-tó Â-pí-mí-le̍t sí-thet, chhiu chhiòn-phu chón-hi chhṳ-kâ ke só-chhai.
[56] Án-ngiòng, Song-ti po-yin Â-pí-mí-le̍t tui kiâ-pâ só-cho ke fái-sṳ, yîn-vi kì chhṳ̀-thet chhṳ-kâ ke hiûng-thi chhit-sṳ̍p ke ngìn.
[57] Song-ti ya sṳ́ Sṳ-kiam-ngìn vi chhṳ-kâ ke chhui-ok su-chhin thung-khú; Kî-thien ke lai-é Yok-thán chu-ma kì-têu ke fa kûi-to kì-têu sṳ̂n-song lé.