[1] Yî-set-lie̍t hàn-màng yû kiûn-vòng ke thon khì-kiên, yû yit-ke Li-vi-ngìn he̍t chhai Yî-fap-lièn phiên-phit ke sân-khî. Kì thó Yù-thai ke Pak-li-hèn yit-ke se-moi-é cho se-chiá.
[2] Liá se-chiá tui ló-kûng fat-khién, chón-to Pak-li-hèn ngoi-kâ, chhai ke-vi he̍t si-ke ngie̍t.
[3] Heu-lòi liá Li-vi-ngìn kiet-thin hi chhìm kì, sióng-oi khien kì chón-to chhṳ-kâ sṳ̂n-piên. Kì tai yit-ke phu̍k-ngìn, lióng-chak lì-è hi. Liá se-moi-é chhiáng kì ngi̍p-hi vuk-tú; kì ke chhông-mîn-ló khon-tó chhiu ngie̍t-sṳ̀n fôn-ngiàng kì,
[4] kiên-chhṳ̀ oi kì liù hâ-lòi, só-yî kì chhiu he̍t sâm-ngit. Kûng-phò lióng-sà thìn-liù chhai ke-vi sṳ̍t-lîm, soi-muk.
[5] To thi-si ngit chêu-sṳ̀n, kì-têu tá-chó hong-hí-lòi, chún-phi lì-khôi; chúng-he kì ke chhông-mîn-ló tui kì kóng: “Siên sṳ̍t-têu tûng-sî! Ngì voi kám-kok kha-yû ngièn-hi, yèn-heu chang-chéu.”
[6] Só-yî, lióng-sà chhô hâ-lòi, khiung-ha sṳ̍t-lîm. Kì ke chhông-mîn-ló tui kì kóng: “Hiet kâ yit am-pû, piong kha khiâng-sûng têu-é.”
[7] Li-vi-ngìn khî hí-lòi oi chéu, kì ke chhông-mîn-ló khiòng-liù kì, só-yî kì yu hiet yit am-pû.
[8] Thi-ńg ngit tá-chó, Li-vi-ngìn chún-phi lì-khôi; kì ke chhông-mîn-ló yu kóng: “Siên sṳ̍t-têu tûng-sî, ko-chu yî-heu chang-chéu!” Só-yî lióng-sà yu khiung-ha sṳ̍t-lîm.
[9] Liá-sà lâu kì ke se-chiá, phu̍k-ngìn yu yi-phi oi chéu, kì ke chhông-mîn-ló yu kóng: “Ngì khon, thiên voi am lô, hiet kâ yit am-pû nâ! Mò kí-kiú chhiu voi thôn-vû lô, hiet chhai liá-vi hó-hó hióng-su hióng-su. Thiên-kông-ngit tá-chó ngì chhiu cho-tet hí-sṳ̂n chón vuk-hâ hi.”
[10] Chúng-he, liá-ke ngìn mò-oi chai liù hâ-lòi, chhiu lâu kì ke se-chiá hí-sṳ̂n. Kì-têu tai-tén lióng-chak chai-mân tûng-sî ke lì-è chhut-fat.
[11] Tông kì-têu lòi-to Yâ-pu-sṳ̂ (chhiu-he Yâ-lu-sat-lâng) fu-khiun, thiên yí-kîn am lé, phu̍k-ngìn tui chú-ngìn kóng: “Ngài-têu lòi-hi liá Yâ-pu-sṳ̂-sàng hiet yit am-pû!”
[12] Chúng-he chú-ngìn kóng: “Ngài-têu m̀-hó chin-ngi̍p m̀-he Yî-set-lie̍t-ngìn he̍t ke ngoi-pâng ngìn ke sàng-tú; ngài-têu oi hiong-chhièn hàng, chhai Kî-pí-â ya-he Lâ-mâ ko-ya.”
[14] Só-yî kì-têu kîn-ko Yâ-pu-sṳ̂, ki-siu̍k hiong-chhièn hàng. Kì-têu to Phien-ngâ-mén kî-chhu̍k kin-nui ke Kî-pí-â, ngit-thèu yí-kîn lo̍k-sân lé;
[15] kì-têu ngi̍p-sàng, oi chhai ke-vi ko-ya. Kì-têu to sàng-tú, chhai kóng-chhòng chhô hâ-lòi, chúng-he mò ngìn chiap-thai kì-têu to vuk-hâ ko-ya.
[16] Ke am-pû, yû yit-ke ló-ngìn-kâ tui thièn-tú kûng-chok chón-lòi, kîn-ko ke-vi. Yî-chhièn kì he̍t Yî-fap-lièn sân-khî, liá-ha he̍t chhai Kî-pí-â. (Kî-pí-â ke ngìn-mìn pún-lòi he Phien-ngâ-mén kî-chhu̍k ngìn.)
[17] Liá ló-ngìn-kâ khon-tó yû ko-lu ngìn chhai kóng-chhòng, chhiu mun kì: “Ngì tui nai-vi lòi? Oi to nai-vi hi?”
[18] Li-vi-ngìn en-kóng: “Ngài-têu tui Yù-thai ke Pak-li-hèn lòi, oi chón Yî-fap-lièn phiên-phit ke sân-khî hi. Ngài chhiu he̍t chhai ke-vi. Ngài chang tui Yù-thai ke Pak-li-hèn lòi, liá-ha oi to Song-chú ke sṳn-thien hi, chúng-he mò ngìn chêu-thai ngài ko-ya.
[19] Ngài-têu yû chhṳ-liau, chhó-liau hó vi lì-è; ngài lâu ngài ke se-chiá pin ngài ke phu̍k-ngìn ya yû chhṳ-kâ sṳ̍t ke piáng lâu chiú, ngài-têu sî-yeu yung ke tak-hong chhiòn-phu yû.”
[20] Ló-ngìn-kâ kóng: “Fôn-ngiàng ngì-têu to ngài vuk-hâ lòi! Ngì-têu sî-yeu má-ke, ngài chhiòn-phu voi pûn ngì-têu; m̀-hó chhai kóng-chhòng ko-ya.”
[21] Án-ngiòng kì chhiu tai kì-têu chón vuk-hâ, yu vi-páu lì-è; kì-têu chhiu sé-kiok, sṳ̍t-fan.
[22] Kì-têu tông khiâng-sûng fôn-hí ke sṳ̀, fut-yèn sàng-tú ke lù-màn-é lòi pâu-vì liá-kiên vuk, lièn-lièn phông-mùn, tui ló-ngìn-kâ kóng: “Chiông ke lâu ngì khiung-ha chón vuk-hâ ke ngìn tai chhut-lòi, ngài-têu oi lâu kì fat-sên sin koân-he!”
[23] Ló-ngìn-kâ to mùn-ngoi tui kì-têu kóng: “Phèn-yû, chhiên-van cho-m̀-tet cho liá án chit-ok ke sṳ! Liá-ke ngìn he ngài ke ngìn-hak, ngì-têu chhie̍t-tui m̀-hó cho liá án yìm-lon ke sṳ!
[24] Khon â, kì ke se-chiá chhai liá-vi, hàn-yû ngài chhṳ-kâ ke moi-é, kì hàn-he thùng-chṳ̂n-ńg, liá-ha ngài chiông kì-têu kâu-pûn ngì-têu, ngì-têu cho-tet cheu chhṳ-kâ ke sîm-yi tui-thai kì-têu; chhie̍t-tui m̀-hó tui liá-ke ngìn cho ke-chúng án chit-ok ke sṳ!”
[25] Chúng-he kì-têu m̀-thâng. Li-vi-ngìn chhiu chiông kì ke se-chiá khiòng-khiòng súng-chhut mùn-ngoi pûn kì-têu. Kì-têu khiòng-kiên kì, kûi-ya vú-yu̍k kì, yit-chhṳ̍t to thiên-mùng-kông chang piong kì chéu.
[26] Thiên-kông ke sṳ̀, liá fu-ngìn-kâ to-chón-lòi, vang chhai kiâ ló-kûng hiet ke ló-ngìn-kâ vuk-hâ ke mùn-héu. Thiên thai-kông ke sṳ̀, kì hàn vang chhai ke-vi.
[27] Kiâ ló-kûng chêu-sṳ̀n hong-hí-lòi, khôi-mùn oi chéu, fat-hien kì ke se-chiá vang chhai mùn-héu, sûng-sú piong chhai mùn-khiâm táng.
[28] Kì tui fu-ngìn-kâ kóng: “Hong-hí-lòi, ngài-têu oi chéu lé!” Chúng-he kì mò en. Só-yî kì chiông kì ke sṳ̂n-sṳ̂ piong chhai lì-è ke poi-táng, hiong chón vuk-hâ ke lu hi.
[29] To vuk-hâ ke sṳ̀, kì ngi̍p-hi nâ yit-kî tô-é, chiông kiâ se-chiá ke sṳ̂n-sṳ̂ to̍k-cho sṳ̍p-ngi te, sung-to Yî-set-lie̍t sṳ̍p-ngi kî-chhu̍k ke-vi.
[30] Khon-tó ke ngìn chhiòn-phu kóng: “Ngài-têu chhiùng-lòi m̀-sṳt khon-ko liá-chúng sṳ! Tui Yî-set-lie̍t-ngìn lì-khôi Âi-khi̍p yî-lòi, mò fat-sên ko liá-chúng sṳ! Ngài-têu yit-thin oi lòi chhâm-siòng, yin-kôi ngióng-pân cho!”