[1] Song-chú ke thiên-sṳ́ tui Kit-kap to Pô-kîm, tui Yî-set-lie̍t ngìn-mìn kóng: “Ngài thu ngì-têu lì-khôi Âi-khi̍p, to Ngài yin-hí pûn ngì-têu chú-siên ke thú-thi. Ngài sṳt kóng-ko, Ngài chhie̍t-tui m̀-voi fi-thet lâu ngì-têu li̍p ke yok;
[2] ngì-têu chhie̍t-tui cho-m̀-tet lâu tông-thi ke ngìn-mìn li̍p má-ke khie-yok. Ngì-têu oi chhak-thet kì-têu ke chi-thàn. Chúng-he, ngì-têu mò cheu Ngài ke fa cho, phiên-phiên hi-cho Ngài m̀-chún ngì-têu cho ke sṳ.
[3] Só-yî, Ngài lâu ngì-têu kóng, ngì-têu hiong chhièn-chin ke sṳ̀, Ngài m̀ chiông ke-thi ke ngìn-mìn kiuk-chéu. Kì-têu thin-chho̍k voi sàng-cho ngì-têu ke sù-thi̍t; kì-têu ke sṳ̀n-mìn voi yín-yu ngì-têu ham-ngi̍p lò-mióng.”
[4] Song-chú ke thiên-sṳ́ liá-têu fa yit kóng-so̍t, Yî-set-lie̍t ngìn-mìn chhiu khôi-sâng thai-kieu,
[5] só-yî ke thi-fông ke miàng ôn-to Pô-kîm. Kì-têu chhai ke-vi hiong Song-chú hien-chi.
[6] Yok-sû-â kié-san Yî-set-lie̍t ngìn-mìn; kok kî-chhu̍k chhiu fûn-khôi hi cham-liâng chhṳ-kâ pûn-tó ke thú-thi.
[7] Yok-sû-â chhai-sṳ ke sṳ̀, Yî-set-lie̍t ngìn-mìn lûng-chúng sṳ-fung Song-chú; kì sí-heu, ke-têu chhîn-muk khon-tó Song-chú vi Yî-set-lie̍t hàng khì-sṳ ke chóng-ló hàn-chhôi ke sṳ̀, Yî-set-lie̍t ngìn-mìn hàn-he sṳ-fung Song-chú.
[8] Song-chú ke phu̍k-ngìn Nun ke lai-é Yok-sû-â yit-pak yit-sṳ̍p se ke sṳ̀ ko-sṳ̂n.
[9] Yî-set-lie̍t ngìn-mìn chiông kì ôn-chong chhai kì pûn-tó ke thú-thi, chhiu-he Kâ-sṳ̍t-sân pet-phién Yî-fap-lièn sân-khî ke Thìn-nâ-Sî-lâ.
[10] Ke-thoi ngìn ya chhiòn-phu ko-sṳ̂n, chón-to chú-chûng ke-vi hi. Ha-yit thoi ngìn hîn-hí, chhiu m̀-sṳt Song-chú, me m̀-tî Song-chú vi Yî-set-lie̍t ngìn-mìn só-cho ke yit-chhiet sṳ.
[11] Heu-lòi, Yî-set-lie̍t ngìn-mìn hàng Song-chú khon-cho sià-ok ke sṳ, khôi-sṳ́ hi-pai ke-têu Pâ-li̍t.
[12] Kì-têu lì-khôi thu kì-têu chhut Âi-khi̍p ke Song-chú — kì-têu chú-siên ke Song-ti, hi-pai phe̍t ke sṳ̀n, chhiu-he kì-têu chû-vì kok-koet ngìn só-pai ke sṳ̀n-mìn, ngiâ Song-chú fat-khién.
[13] Kì-têu lì-khôi Song-chú, hi-pai Pâ-li̍t sṳ̀n lâu Â-sṳ̂-thâ-liu̍k ńg-sṳ̀n.
[14] Só-yî, Song-chú hiong Yî-set-lie̍t-ngìn thai fat-khién, chiông kì-têu kâu chhai si chû-vì thi̍t-ngìn ke sú-chûng, yù-chhai thi̍t-ngìn chhióng kì-têu, hoi Yî-set-lie̍t-ngìn mò fap-thu chai tí-khong thi̍t-ngìn.
[15] Yî-set-lie̍t-ngìn mò-lun chhut-chan to nai-vi, Song-chú cheu chhṳ-kâ só-fat ke sṳ, tak-pái cho kì-têu ke tui-thi̍t, lòi kûng-kit kì-têu. Kì-têu chhiu tù-tó khi̍t-thai ke khú-nan.
[16] Ke-sṳ̀, Song-chú chhiu vi Yî-set-lie̍t-ngìn hîn-hí sṳ-sṳ̂ lòi tai-liâng kì-têu, kié-kiu kì-têu thot-lì ke-têu chhióng kì-têu ngìn ke sú-chûng.
[17] Chúng-he Yî-set-lie̍t ngìn-mìn hàn-he m̀ thâng-chhiùng kì-têu ke sṳ-sṳ̂, phoi-ngia̍k Song-chú, hàng kiên-yìm, hi-pai phe̍t ke sṳ̀n-mìn. Liá-têu sîn ke yit-thoi ngìn tông-kiak chhiu m̀ thèn chú-siên ke kiok-phu, m̀ chûn-hàng Song-chú ke min-lin.
[18] Tak-pái Song-chú hîn-hí sṳ-sṳ̂ pûn kì-têu, Song-chú chhiu lâu ke sṳ-sṳ̂ khiung-ha, pûn kì yit-sên-ngìn kiu ngìn-mìn thot-lì sù-thi̍t. Yîn-vi kì-têu su-khú, su khî-fu to kín-chhên, Song-ti chhiu lìn-mén kì-têu,
[19] chúng-he, ke sṳ-sṳ̂ sí-thet yî-heu, ngìn-mìn yu to-chón hi hàng fái-sṳ, ko chhui-ok ke sên-fa̍t, yu pí song-thoi-ngìn hàn-kha li-hoi. Kì-têu hi-pai phe̍t ke sṳ̀n, fu̍k-sṳ kì-têu, chhin ngang-kiáng, fái hàng-vì hàn-he m̀-hén kói.
[20] Só-yî Song-chú yu hiong Yî-set-lie̍t-ngìn fat-khién, kóng: “Ki-yèn liá ngìn-mìn vì-poi Ngài min-lin kì-têu chú-siên chûn-sú ke yok, m̀ thâng-chhiùng Ngài ke fa,
[21] Ngài ya m̀ chiông Yok-sû-â ko-sṳ̂n ke sṳ̀ hàn liù chhai liá-thi ke ke-têu ngoi-chhu̍k ngìn kiuk-chéu.
[22] Ngài oi yung kì-têu lòi kháu-ngiam Yî-set-lie̍t ngìn-mìn, khon kì-têu he m̀-he chhiong kì-têu chú-siên án-ngiòng chûn-hàng Ngài ke tho-lu.”
[23] Só-yî, Song-chú yún-chún ke-têu mìn-chhu̍k liù chhai liá-te thú-thi, mò chiông kì-têu kâu-pûn Yok-sû-â, me mò chhai Yok-sû-â ko-sṳ̂n heu tông-kiak chhiu chiông kì-têu kiuk chhut-hi.