[1] Yû yit-ngit, Chhâm-sûn to Fî-li-sṳ-ngìn ke Kâ-sat-sàng, chhai ke-vi tù-tó yit-ke kî-ńg, chhiu lâu kì soi-muk.
[2] Kâ-sat-ngìn fat-hien Chhâm-sûn chhai sàng-tú chhiu pâu-vì ke thi-fông, kûi am-pû mài-fu̍k chhai sàng-mùn, tiâm-tiâm mò chhut-sú; kì-têu kóng: “Tén-to thiên-kông chang lòi chhṳ̀ kì.”
[3] Chúng-he Chhâm-sûn soi-to pan-ya chhiu hong-hí-lòi, chiông sàng-mùn chhak-thet, lièn mùn-khiông tai mùn-san, mùn-chhôn chhiòn-phu chhak hâ-lòi, kông chhai kiên-thèu táng, kông to Hî-pak-lùn tui-mien ke sân-táng.
[4] Heu-lòi, Chhâm-sûn chhai Sô-lie̍t sân-lak oi-tó yit-ke fu-ngìn-kâ, miàng ôn-to Thoi-li-lâ.
[5] Yû ńg-ke Fî-li-sṳ liâng-chhiu hi kien Thoi-li-lâ, tui kì kóng: “Ngì oi yung-kie lau Chhâm-sûn, mun kì cho-má-ke yû án-thai ke li̍t-liong, ngài-têu oi ngióng-pân chang-nèn yàng-ko kì, khún tet kì he̍t, lòi khúng-chṳ kì. Án-ngiòng, ngài-têu tak-sà pûn ngì yit-chhiên yit-pak chak ngiùn-pi.”
[6] Só-yî, Thoi-li-lâ mun Chhâm-sûn: “Chhiáng lâu ngài kóng, ngì cho-má-ke yû án-thai ke li̍t-liong. Oi ngióng-pân chang yû phan-fap khún tet ngì he̍t, lòi khúng-chṳ ngì?”
[7] Chhâm-sûn en-kóng: “Na-he ngìn yung chhit-thiàu hàn-màng châu ke chhiâng thèn-é khún ngài, ngài chhiu lâu phû-thûng ngìn khiung-yong mò má-ke li̍t.”
[8] Só-yî, ke-têu Fî-li-sṳ liâng-chhiu chiông chhit-thiàu hàn-màng châu ke chhiâng thèn-é kâu-pûn Thoi-li-lâ, kì chhiu yung chhiâng thèn-é chiông Chhâm-sûn khún hí-lòi.
[9] Kì chó chhiu ham-ngìn chhai kì vuk-tú mài-fu̍k. Kì hêm: “Chhâm-sûn nâ, Fî-li-sṳ-ngìn lòi lô!” Chhâm-sûn chok-li̍t, chhiâng thèn-é chhiu-chhiong mà-sien tù-tó fó, yit-ha-é chhiu thôn-thet. Só-yî, kì-têu hàn-he m̀-tî Chhâm-sûn ke li̍t-liong tui nai-vi lòi.
[10] Thoi-li-lâ tui Chhâm-sûn kóng: “Ngì chok-nung ngài, khî-phien ngài! Chṳn-kîn lâu ngài kóng, oi ngióng-pân chang yû phan-fap khún tet ngì he̍t?”
[11] Chhâm-sûn kóng: “Na-he ngìn yung chhiùng-lòi m̀-sṳt yung-ko ke sîn sok-è khún ngài, ngài chhiu voi lâu phû-thûng ngìn khiung-yong mò má-ke li̍t.”
[12] Só-yî, Thoi-li-lâ nâ sîn sok-è chiông kì khún hí-lòi, yèn-heu hêm: “Chhâm-sûn nâ, Fî-li-sṳ-ngìn lòi lô!” Tông-sṳ̀ ya yû-ngìn mài-fu̍k chhai vuk-tú. Chhâm-sûn pâng-thôn sú-hong ke sîn sok-è, chhiong pâng-thôn yit-thiàu sien khiung-yong.
[13] Thoi-li-lâ tui Chhâm-sûn kóng: “Ngì hàn-he chok-nung ngài, khî-phien ngài! Chhiáng lâu ngài kóng, oi ngióng-pân chang-yû phan-fap khún tet ngì he̍t?” Chhâm-sûn en-kóng: “Na-he ngì chiông ngài thèu-nà táng ke chhit-thiàu mô-piên-é phiên-ngi̍p chṳt-pu-kî tú, yung tâng-é tâng-hó, ngài chhiu voi lâu phû-thûng ngìn khiung-yong mò má-ke li̍t.”
[14] Só-yî, Thoi-li-lâ koái kì soi lo̍k-kau, chiông kì thèu-nà táng ke chhit-thiàu mô-piên-é phiên-ngi̍p chṳt-pu-kî tú, yu yung tâng-é tâng-hó, yèn-heu hêm: “Chhâm-sûn nâ, Fî-li-sṳ-ngìn lòi lô!” Chhâm-sûn siáng ko-lòi, yit-ha-é chhiu chiông thèu-nà-mô tui chṳt-pu-kî tú pâng chhut-lòi lé.
[15] Thoi-li-lâ tui Chhâm-sûn kóng: “Ngì kîn-pún mò lâu ngài thùng-sîm, ngióng-pân hàn kóng ngì siak ngài nè? Ngì chok-nung ngài sâm-pái, mò lâu ngài kóng ngì cho-má-ke án yû-li̍t.”
[16] Thoi-li-lâ tak-ngit chhàu kì, Chhâm-sûn pûn kì chhàn-to voi at-sí,
[17] chui-heu chiông pi-me̍t lâu Thoi-li-lâ kóng. Kì kóng: “Ngài ke thèu-nà-mô chhiùng-lòi m̀-sṳt thi-ko, yîn-vi ngài yit chhut-se chhiu hien-pûn Song-ti cho lì-siu̍k-ngìn. Na-he ngài ke thèu-nà-mô thi-thet, ngài ke li̍t-liong chhiu voi mò-thet hi, ngài voi lâu phû-thûng ngìn khiung-yong ngiôn-ngio̍k.”
[18] Thoi-li-lâ tî Chhâm-sûn yí-kîn chiông pi-me̍t lâu kì kóng, chhiu phai-ngìn hi tui Fî-li-sṳ liâng-chhiu kóng: “Chai sông-lòi yit-pái; kì yí-kîn chiông pi-me̍t lâu ngài kóng-liáu!” Só-yî kì-têu chai lòi, pin tai-tén ngiùn-pi lòi.
[19] Thoi-li-lâ koái Chhâm-sûn soi chhai kì ke thai kiok-pí, yèn-heu ham-ngìn lòi, chiông Chhâm-sûn ke chhit-thiàu mô-piên-é thi-thet. Yèn-heu, Thoi-li-lâ chok-nung Chhâm-sûn, yîn-vi kì chṳn-kîn pien mò-li̍t lé.
[20] Thoi-li-lâ hêm: “Chhâm-sûn nâ, Fî-li-sṳ-ngìn lòi lô!” Chhâm-sûn siáng ko-lòi, sîm-tú sióng: “Ngài voi chhiong yî-chhièn khiung-yong yit chok-li̍t chhiu cho-tet thot-sṳ̂n.” Kì m̀-tî Song-chú yí-kîn lì-khôi kì lé.
[21] Só-yî Fî-li-sṳ-ngìn chok-tó kì, chiông kì lióng-chak muk-chû-yìn yet chhut-lòi, tai kì to Kâ-sat, yung thùng lien-é só-tén kì, hêm kì chhai kâm-ngiu̍k tú súng mo-sa̍k.
[22] Chúng-he Chhâm-sûn ke thèu-nà-mô yu man-man sâng chhut-lòi.
[23] Fî-li-sṳ liâng-chhiu chhi-si̍p khiung-ha khin-chuk, hiong kì-têu ke sṳ̀n-mìn Thai-kún hien thai-chi; kì-têu chhong: “Ngài-têu ke sṳ̀n-mìn chiông sù-thi̍t Chhâm-sûn kâu-pûn ngài-têu lé!”
[24] Kì-têu chhin fôn-hí, chhiu kóng: “Chiông Chhâm-sûn ham chhut-lòi, ngài-têu oi met-sa kì!” Chhâm-sûn pûn-ngìn tai-chhut kâm-ngiu̍k; kì-têu met-sa kì, ham kì khî chhai lióng-kî chhû-é chûng-kiên. Mìn-chung khon-tó Chhâm-sûn chhiu siung-chan kì-têu ke sṳ̀n-mìn, kóng: “Sù-thi̍t Chhâm-sûn fí-fái ngài-têu ke thú-thi, chhṳ̀-thet tông-tô ngìn; ngài-têu ke sṳ̀n-mìn chiông kì kâu chhai ngài-têu sú-chûng!”
[26] Chhâm-sûn tui lâi kì sú ke seu-ngièn kóng: “Pûn ngài miâ ke-têu chhang-tén liá sṳ̀n-meu ke chhû-é; ngài oi pen yit-ha.”
[27] Ke-sṳ̀ meu-tú chiâm-mân nàm-nàm ńg-ńg, ńg-ke Fî-li-sṳ liâng-chhiu chhiòn-phu chhai ke-vi. Meu-táng thai-yok yû sâm-chhiên ke nàm-ńg, khon Chhâm-sûn pûn-ngìn met-sa.
[28] Chhâm-sûn khì-tó Song-chú kóng: “Chṳ-kô ke Song-chú â, khién-khiù Ngì ki-ngiam ngài! Song-ti â, khién-khiù Ngì chai su-pûn ngài li̍t-liong, pûn ngài kâ yit-pái kî-fi po-fu̍k Fî-li-sṳ-ngìn yet ngài lióng-chak muk-chû-yìn ke sù-hen.”
[29] Chhâm-sûn nám-tén chhai pan tûng-ông chhang-tén meu ke lióng-kî chhû-é, yit-sú nám-tén yit-kî,
[30] hêm-tén kóng: “Pûn ngài lâu Fî-li-sṳ-ngìn khiung-ha sí!” Só-yî kì yung-chhin só-yû ke li̍t-liong hiong-chhièn súng, meu chhiu vang-thet, chak-tó ńg-ke liâng-chhiu lâu só-yû ke ngìn sṳ̂n-song. Chhâm-sûn sí ke sṳ̀, só chhṳ̀ ke ngìn pí kì ko-sṳ̂n chhièn só chhṳ̀ ke hàn-kha tô.
[31] Chhâm-sûn ke hiûng-thi lâu kiâ-pâ ke chhiòn-kâ ngìn lòi kông kì ke sṳ̂-thí, chiông kì yun chón-hi, chong chhai Só-lâ lâu Yî-sṳ̍t-thò chṳ̂-kiên kiâ-pâ Mâ-nò-â ke fùn-mu tú. Chhâm-sûn cho Yî-set-lie̍t ke sṳ-sṳ̂ chúng-khiung ngi-sṳ̍p ngièn.