[1] Ke-sṳ̀, Yî-set-lie̍t mò kiûn-vòng. Tan kî-chhu̍k hàn-he chhìm kì-têu cho-tet ôn-kî ke thú-thi, yîn-vi kì-têu hàn-màng chhai Yî-set-lie̍t tak kî-chhu̍k chûng fûn-tó chhṳ-kâ ke thú-thi.
[2] Tan kî-chhu̍k ngìn tui chhiòn-chhu̍k sién-chhut ńg-ke yúng-sṳ, phai kì-têu lì-khôi Só-lâ lâu Yî-sṳ̍t-thò, hi tá-tham thú-thi. Kì-têu lòi-to Yî-fap-lièn sân-khî, he̍t chhai Mí-kâ vuk-hâ.
[3] Kì-têu thâng-tó ke heu-sâng Li-vi-ngìn kóng-fa ke khiéu-yîm chhiu hi mun kì: “Ngì chhai liá-vi cho-má-ke? Má-ngìn tai ngì to liá-vi lòi?”
[4] Kì en-kóng: “He Mí-kâ ôn-phài ke; kì chhiáng ngài cho kì ke chi-sṳ̂, yû ngie̍t-kip pûn ngài.”
[5] Kì-têu tui kì kóng: “Chhiáng ngì khiù-mun Song-ti, ngài-têu liá-pái chhut-lòi tá-tham voi sṳ̀n-kûng mò?”
[6] Chi-sṳ̂ en-kóng: “Ngì-têu cho-tet phìn-phìn ôn-ôn hi, Song-chú chhai ngì-têu só-hàng ke lu-song khon-ku ngì-têu.”
[7] Só-yî, liá ńg-sà lì-khôi. Kì-têu lòi-to Lâ-yi-sàng, fat-hien ke-vi ke ngìn-mìn mò-sèu mò-li, chhiong Sî-tun-ngìn khiung-yong. Liá-têu ngìn fò-phìn, tiâm-chhin, mò lâu ngoi-ngìn siông-châng; thú-thi chhut-sán yu fûng-fu. Kì-têu lì Sî-tun-ngìn tông-yén, mò lâu ngoi-ngìn lòi-vông.
[8] Liá ńg-sà chón-to Só-lâ lâu Yî-sṳ̍t-thò yî-heu, kì-têu ke thùng-pâu mun kì-têu yû má-ke fat-hien,
[9] kì-têu kóng: “Thai-kâ lòi-hi, lòi-hi kûng-tá Lâ-yi! Ngài-têu tá-tham ko ke thi-fông, khok-sṳ̍t he chhin-hó. M̀-hó chhai liá-vi hàn-hàn m̀ cho-se, kiak-kiak lòi-hi â! Ngài-têu hi cham-liâng â!
[10] Ngì-têu to ke-vi chhiu voi fat-hien ngìn-mìn chhiòn-mò fòng-sú; ke he yit-te tông-fat ke thú-thi, chhut-sán fûng-fu, má-ke tû yû. Song-ti yí-kîn chiông kì kâu-pûn ngì-têu lé.”
[11] Só-yî, Tan kî-chhu̍k yû liuk-pak sà vú-chông hó, lì-khôi Só-lâ lâu Yî-sṳ̍t-thò.
[12] Kì-têu chhut-fat, chhai Yù-thai ke Kî-lie̍t-Yâ-lìm sî-phién ôn-yàng, só-yî ke thi-fông to liá-ha hàn ham-cho Tan-yàng.
[13] Kì-têu ki-siu̍k hiong-chhièn, to Yî-fap-lièn sân-khî Mí-kâ ke vuk-hâ.
[14] Ke ńg-ke tá-tham ko Lâ-yi ke ngìn tui thùng-phân kóng: “Ngì-têu tî mò? Liá-vi yû yit-kiên vuk, tî-poi yû yit-liâng yî-fut-tet, yit-têu kâ-chûng ke sṳ̀n-siong, hàn-yû yit-chak tiâu-khiet ke ngiéu-siong lâu yit-chak chu-sṳ̀n ke ngiéu-siong. Liá-ha ngì-têu tî ngài-têu yin-kôi ngióng-pân cho.”
[15] Ńg-ke tham-é chhiu ngi̍p-to Mí-kâ vuk-hâ, mun-heu ke heu-sâng Li-vi-ngìn.
[16] Ke-sṳ̀, Tan kî-chhu̍k ke liuk-pak ke vú-chông hó ke sṳ-pîn khî chhai mùn-héu.
[17] Tông chi-sṳ̂ lâu liuk-pak ke vú-chông hó ke sṳ-pîn hàn chhai mùn-héu ke sṳ̀, ke ńg-ke tham-é hàng-ngi̍p vuk-tú, nâ-chéu tiâu-khiet ke ngiéu-siong, yî-fut-tet, kâ-chûng ke sṳ̀n-siong lâu chu-sṳ̀n ke ngiéu-siong.
[18] Kì-têu hàng-ngi̍p Mí-kâ vuk-tú nâ-chéu liá-têu tûng-sî ke sṳ̀, chi-sṳ̂ mun kì-têu: “Ngì-têu cho-má-ke â?”
[19] Kì-têu kóng: “Ôi, tiâm-tiâm! M̀-hó chhut-sâng! Thèn ngài-têu khiung-ha lòi, cho ngài-têu ke chi-sṳ̂ lâu ku-mun. Cho Yî-set-lie̍t yit kî-chhu̍k ke chi-sṳ̂ kám m̀-he yàng-ko cho yit-ke kâ-chhu̍k ke chi-sṳ̂!”
[20] Chi-sṳ̂ thâng-tó fî-sòng fôn-hí, chhiu tai-tén yî-fut-tet, kâ-chûng ke sṳ̀n-siong lâu tiâu-khiet ke ngiéu-siong, thèn kì-têu chéu.
[21] Kì-têu chón-sṳ̂n chhut-fat, pûn chṳ́-ńg, ngiù-khiùn lâu chhòi-vu̍t chhai thèu-chhièn hàng.
[22] Kì-têu lì-khôi Mí-kâ ke vuk-hâ yit-chham lu yî-heu, Mí-kâ chang seu-si̍p lìn-sa chhut-lòi tûi. Kì-têu tûi-tó Tan chhu̍k-ngìn,
[23] hêm kì-têu. Tan chhu̍k-ngìn chón-sṳ̂n mun Mí-kâ: “Má-ke sṳ-chhìn? Liá-khiùn ngìn lòi cho-má-ke?”
[24] Mí-kâ en-kóng: “Ngì-têu chhióng-chéu ngài ke chi-sṳ̂ lâu ngài só chho ke sṳ̀n-siong; ngài mò chhûn pan-hong! Ngì-têu hàn mun ngài má-ke sṳ-chhìn!”
[25] Tan chhu̍k-ngìn tui kì kóng: “Ngì chui-hó m̀-hó kâ-kóng; na-he mò, ngiâ liá-têu ngìn fat-khién, kì-têu voi kûng-kit ngì, ngì lâu ngì chhiòn-kâ voi mò-miang.”
[26] Tan chhu̍k-ngìn ki-siu̍k hiong-chhièn hàng; Mí-kâ khon kì-têu pí chhṳ-kâ kha-khiòng, chhiu chón vuk-hâ hi lé.
[27] Tan chhu̍k-ngìn chhióng Mí-kâ só chho ke sṳ̀n-siong lâu kì ke chi-sṳ̂ yî-heu, chhiu hi kûng-tá Lâ-yi. Lâ-yi vá-khiun Pak-Li-ha̍p sân-lak, he yit-chho fò-phìn, mò-sèu mò-li ke sàng. Tan chhu̍k-ngìn chhṳ̀-thet sàng-tú ke ngìn-mìn, piong-fó sêu-sàng. Mò-ngìn lòi-kiu kì-têu, yîn-vi Lâ-yi lì Sî-tun tông-yén, kì-têu ya-mò lâu ngoi-ngìn lòi-vông. Tan chhu̍k-ngìn chhùng-kien ke-sàng, chhai ke-vi he̍t.
[29] Kì-têu yung kì-têu chú-siên Yî-set-lie̍t ke lai-é Tan ke miàng, chiông Lâ-yi liá-chho sàng ke miàng kói-cho Tan.
[30] Tan chhu̍k-ngìn chiông ngiéu-siong ôn-hó, phai Mô-sî ke sûn-é — Kiet-sun ke lai-é Yok-nâ-tân cho Tan kî-chhu̍k ke chi-sṳ̂. Yok-nâ-tân ke chṳ́-sûn chhai ke-vi cho chi-sṳ̂ chhṳ̍t-to Tan chhu̍k-ngìn pûn-ngìn chok-chéu.
[31] Song-ti ke sṳn-chong-phùng thìn-liù chhai Sṳ-lò yû kí-kiú, Mí-kâ tiâu-khiet ke ngiéu-siong ya liù chhai Tan kí-kiú.