[1] Song-chú liù-têu mìn-chhu̍k chhai liá-te thú-thi, oi kháu-ngiam ke-têu mò kîn-ngiam ko Kâ-nàm chan-chên ke Yî-set-lie̍t-ngìn.
[2] Kì ke muk-tit he oi kâu Yî-set-lie̍t-ngìn ke heu-thoi siông-chhṳ̀, thi̍t-phe̍t he chhiùng-lòi m̀-sṳt sông chan-chhòng ke ngìn.
[3] Liù-hâ ke yû Fî-li-sṳ ńg-chho sàng ke liâng-chhiu lâu só-yû Kâ-nàm-ngìn, Sî-tun-ngìn, lâu he̍t chhai Pâ-li̍t-Het-mùn-sân to Ha̍p-mâ ai-héu chûng-kiên Lì-pâ-nun sân-khî ke Hî-vi-ngìn.
[4] Song-chú liù-hâ liá-têu mìn-chhu̍k he oi kháu-ngiam Yî-set-lie̍t-ngìn, khon kì-têu he m̀-he fu̍k-chhiùng Song-chú thûng-ko Mô-sî pân-pu pûn kì-têu chú-siên ke kie-min.
[5] Só-yî Yî-set-lie̍t-ngìn he̍t chhai Kâ-nàm-ngìn, Het-ngìn, Â-mô-li-ngìn, Pí-li-sé-ngìn, Hî-vi-ngìn, lâu Yâ-pu-sṳ̂-ngìn tông-chûng,
[6] thó kì-têu ke moi-é cho pû-ngiòng, chiông chhṳ-kâ ke moi-é ka-pûn kì-têu ke lai-é, yu pai kì-têu ke sṳ̀n-mìn.
[7] Yî-set-lie̍t ngìn-mìn hàng Song-chú khon-cho sià-ok ke sṳ, m̀ ki-tet Song-chú — kì-têu ke Song-ti, hi-pai ke-têu Pâ-li̍t lâu Â-sa-lâ.
[8] Só-yî Song-chú hiong Yî-set-lie̍t-ngìn fat-khién, chiông kì-têu kâu chhai Mî-sok-put-tha̍t-mí-â-vòng Kú-sân-Li-sat-thièn ke sú-chûng. Yî-set-lie̍t-ngìn fu̍k-sṳ kì pat-ngièn.
[9] Heu-lòi kì-têu khiù-ham Song-chú, Song-chú chhiu hîn-hí yit-ke chṳ́n-kiu-chá lòi kié-kiu kì-têu. Liá-ke ngìn chhiu-he Ngò-thò-ngiap; kì he Kâ-le̍t ke ló-thâi Kî-na̍p-sṳ̂ ke lai-é.
[10] Song-chú ke Lìn kong chhai kì sṳ̂n-song, kì chhiu cho Yî-set-lie̍t ngìn-mìn ke sṳ-sṳ̂. Ngò-thò-ngiap chhut-hi siông-chhṳ̀; Song-chú chiông Mî-sok-put-tha̍t-mí-â-vòng Kú-sân-Li-sat-thièn kâu chhai kì sú-chûng, pûn kì tá-yàng.
[11] Só-yî liá thi-fông thai-phìn si-sṳ̍p ngièn, chhṳ̍t-to Ngò-thò-ngiap ko-sṳ̂n.
[12] Yî-set-lie̍t ngìn-mìn yu hàng Song-chú khon-cho sià-ok ke sṳ. Só-yî, Song-chú sṳ́ Mô-ap-vòng Yî-kî-lùn pí Yî-set-lie̍t kha-khiòng, lòi kûng-kit Yî-set-lie̍t-ngìn.
[13] Yî-kî-lùn lièn-ha̍p Â-mùn-ngìn lâu Â-mâ-li̍t-ngìn, lòi tá-yàng Yî-set-lie̍t-ngìn, cham-liâng chûng-su sàng Yâ-li-kô.
[14] Yî-set-lie̍t-ngìn fu̍k-sṳ Mô-ap-vòng Yî-kî-lùn sṳ̍p-pat ngièn.
[15] Heu-lòi Yî-set-lie̍t-ngìn khiù-ham Song-chú, Song-chú chhiu vi kì-têu hîn-hí yit-ke chṳ́n-kiu-chá. Liá-ke ngìn chhiu-he Yî-vut; kì he Phien-ngâ-mén-ngìn Kî-lâ ke lai-é, si̍p-koan yung chó-sú. Yî-set-lie̍t-ngìn phai Yî-vut sung lî-vu̍t pûn Mô-ap-vòng Yî-kî-lùn.
[16] Yî-vut tá yit-kî lióng-piên li ke kiam, pan kûng-chhak chhòng, chiông kì thak chhai yu kiok-pí, khong chhai chhòng-sâm tái-hâ,
[17] yèn-heu tai-tén lî-vu̍t hi-kien Mô-ap-vòng Yî-kî-lùn; Yî-kî-lùn he yit-ke thai-khiêu kú.
[18] Yî-vut hien lî-vu̍t pûn kì yî-heu, ham kông lî-vu̍t ke ngìn chhiòn-phu chón-hi.
[19] Kì chhṳ-kâ chhai Kit-kap fu-khiun khat sa̍k-thèu ke só-chhai chón-to Yî-kî-lùn ke-vi, tui kì kóng: “Koet-vòng, ngài yû pi-me̍t oi lâu ngì kóng.” Só-yî vòng min-lin kì sùn-thèu ke ngìn: “Ngì-têu sám-khôi!” Kì-têu chhiu chhiòn-phu thui chhut-hi.
[20] Ke-sṳ̀, vòng tân-thu̍k chhô chhai vuk-táng chhô-liòng ke lèu-fòng tî-poi; Yî-vut hàng ko-hi, tui kì kóng: “Ngài yû tui Song-ti lòi ke sin-sit oi lâu ngì kóng.” Vòng chhiu khî hí-lòi.
[21] Yî-vut chhiu yung chó-sú pâng-chhut khong chhai yu kiok-pí ke kiam, chhiuk-ngi̍p vòng ke tú-sṳ́;
[22] chiông kiam lièn-piang chhiòn-phu chhiuk ngi̍p-hi, kiam pûn phì-ngiuk kia̍p-tó, lièn sṳ́ ya siet chhut-lòi. Yî-vut chiông kiam liù chhai vòng ke tú-sṳ́,
[23] yèn-heu chhut-hi, chiông mùn chhiòn-phu koân hí-lòi só-hó.
[24] Kì lì-khôi ke-vi yî-heu, vòng ke phu̍k-ngìn lòi-to, khon-tó mùn chhiòn-phu só-tén, láu-tó vòng chhai tî-poi ô-sṳ́.
[25] Kì-têu kín-tén, tén-to mò kat-sat, vòng hàn-he mò khôi-mùn, chhiu nâ só-sṳ̀ khôi-mùn, fat-hien kì-têu ke chú-ngìn yí-kîn vang chhai thi-song, sí-thet lé.
[26] Ke-têu phu̍k-ngìn thô sṳ̀-kiên ke sṳ̀, Yî-vut chhiu thò-chéu lé. Kì kîn-ko khat sa̍k-thèu ke só-chhai, chéu-to Sî-yî-lâ.
[27] To Yî-fap-lièn sân-khî ke Sî-yî-lâ yî-heu, kì phùn yòng-kok seu-si̍p Yî-set-lie̍t-ngìn chún-phi siông-chhṳ̀. Kì tai-liâng Yî-set-lie̍t-ngìn hâ-sân,
[28] min-lin kì-têu kóng: “Thèn ngài lòi! Song-chú chiông ngì-têu ke sù-thi̍t Mô-ap-ngìn kâu chhai ngì-têu sú-chûng lé.” Kì-têu chhiu thèn Yî-vut hâ-sân, cham-liâng Yok-tan-hò thu-sòn-thèu, làn-tén Mô-ap-ngìn, m̀-chún thi̍t-ngìn ko-hò.
[29] Ke-ngit, kì-têu chhṳ̀-thet Mô-ap chîn-pîn yit-van ngìn, lièn yit-ke ya mò pûn kì chéu-thet.
[30] Ke-ngit, Yî-set-lie̍t-ngìn tá-yàng Mô-ap. Só-yî liá thi-fông chhiu thai-phìn pat-sṳ̍p ngièn.
[31] Yî-vut yî-heu, yû Â-nâ ke lai-é Sân-kâ; kì yung yit-kî kiuk-ngiù ke net-kun tá-sí liuk-pak ke Fî-li-sṳ-ngìn, ya chṳ́n-kiu Yî-set-lie̍t.