[1] Kî-lie̍t-ngìn Yâ-fut-thâ he yit-ke yúng-kám ke chan-sṳ. Kiâ-pâ he Kî-lie̍t, chúng-he kiâ-mê he kî-ńg.
[2] Kî-lie̍t lâu pû-ngiòng kiung kí-ke lai-é; liá-têu lai-é chóng-thai yî-heu, chhiu chiông Yâ-fut-thâ kiuk-chhut kâ-mùn. Kì-têu tui kì kóng: “Ngì cho-m̀-tet sṳ̀n-chiap ngài-têu â-pâ ke kâ-ngia̍p, yîn-vi ngì he kî-ńg kiung ke.”
[3] Án-ngiòng Yâ-fut-thâ lì-khôi kì ke hiûng-thi, he̍t chhai Thò-pak. Chhai ke-vi yû yit-khiùn lù-màn-é chhi-si̍p lòi-thèn kì.
[4] Yit-chham sṳ̀-kiên yî-heu, Â-mùn-ngìn kûng-tá Yî-set-lie̍t-ngìn.
[5] Chan-chên yit khôi-sṳ́, Kî-lie̍t ke-têu chóng-ló chhiu to Thò-pak chhiáng Yâ-fut-thâ chón-lòi.
[6] Kì-têu tui kì kóng: “Chhiáng ngì cho ngài-têu ke ngièn-soi, tai-liâng ngài-têu lâu Â-mùn-ngìn siông-chhṳ̀.”
[7] Yâ-fut-thâ en-kóng: “Yî-chhièn ngì-têu kám m̀-he nâu ngài, kiuk ngài lì-khôi ngâ-pâ ke vuk-hâ? Liá-ha ngì-têu tù-tó châi-nan, ngióng-pân yu lòi chhìm ngài?”
[8] Kî-lie̍t ke-têu chóng-ló tui Yâ-fut-thâ kóng: “Liá-ha ngài-têu chón-lòi chhìm ngì, oi ngì tai-liâng ngài-têu lâu Â-mùn-ngìn siông-chhṳ̀; án-ngiòng, ngì chhiu voi cho só-yû Kî-lie̍t ngìn-mìn ke liâng-chhiu.”
[9] Yâ-fut-thâ kóng: “Ngì-têu oi ngài chón-hi lâu Â-mùn-ngìn siông-chhṳ̀, na-he Song-chú sṳ́ ngài tá-yàng, ngài chhiu cho ngì-têu ke liâng-chhiu.”
[10] Kì-têu kóng: “Song-chú vi ngài-têu cho-chṳn, ngài-têu yit-thin voi cheu ngì ke fa hi-cho.”
[11] Só-yî Yâ-fut-thâ lâu Kî-lie̍t ke-têu chóng-ló chón-hi; mìn-chung chhiu li̍p kì cho kì-têu ke liâng-chhiu lâu ngièn-soi. Yâ-fut-thâ chhai Mí-sṳ̂-pâ chiông chhṳ-kâ ke fa chhai Song-chú mien-chhièn kóng chhut-lòi.
[12] Yâ-fut-thâ phai sṳ́-chá to Â-mùn-vòng ke-vi, kóng: “Ngì lâu ngài-têu teu má-ke? Ngì cho-má-ke chhîm-cham ngài-têu ke thú-thi?”
[13] Â-mùn-vòng en Yâ-fut-thâ phai-lòi ke sṳ́-chá, kóng: “Yî-set-lie̍t-ngìn lì-khôi Âi-khi̍p yî-heu cham-liâng ngài ke thú-thi, tui Â-nun sân-lak to Ngâ-pok sân-lak, chhṳ̍t-to Yok-tan-hò. Liá-ha, ngì-têu oi koâi-koâi chiông liá-te thi kâu-vàn pûn ngài.”
[14] Yâ-fut-thâ yu phai sṳ́-chá hi-kien Â-mùn-vòng,
[15] tui kì kóng: “Yî-set-lie̍t-ngìn pin-mò chhîm-cham Mô-ap-ngìn ya-he Â-mùn-ngìn ke thú-thi.
[16] Khì-sṳ̍t, Yî-set-lie̍t-ngìn lì-khôi Âi-khi̍p yî-heu, kîn-ko khóng-yâ to Fùng-hói, yèn-heu to Kâ-tâi-sṳ̂.
[17] Ke-sṳ̀, kì-têu phai sṳ́-chá hi chhiáng-khiù Yî-tûng-vòng chún kì-têu kîn-ko kì ke thú-thi, chúng-he Yî-tûng-vòng m̀-chún. Kì-têu ya phai sṳ́-chá hi chhiáng-khiù Mô-ap-vòng chún kì-têu kîn-ko kì ke thú-thi, kì ya m̀-chún. Só-yî Yî-set-lie̍t-ngìn liù chhai Kâ-tâi-sṳ̂.
[18] “Heu-lòi, kì-têu hiong-chhièn hàng-ko khóng-yâ, tîn-ko Yî-tûng lâu Mô-ap ke thú-thi, to Mô-ap ke tûng-phién. Kì-têu chhai Â-nun sân-lak tui-mien ôn-yàng, pin mò-ko Â-nun sân-lak, yîn-vi ke-he Mô-ap ke piên-kie.
[19] Yî-set-lie̍t-ngìn phai sṳ́-chá hi chhiáng-khiù Â-mô-li-ngìn ke vòng, chhiu-he Hî-sṳ̍t-pún-vòng Sî-fèn, chún kì-têu kîn-ko kì ke thú-thi, to Yî-set-lie̍t-ngìn chhṳ-kâ ke só-chhai.
[20] Chúng-he Sî-fèn m̀ sin-fu̍k Yî-set-lie̍t-ngìn, m̀-chún kì-têu kîn-ko kì ke thú-thi; kì fán-chón tai-liâng chhiòn-kiûn chhai Ngâ-chha̍p ôn-yàng, kûng-tá Yî-set-lie̍t-ngìn.
[21] “Song-chú — Yî-set-lie̍t ke Song-ti chiông Sî-fèn lâu kì ke kiûn-chhui chhiòn-phu kâu chhai Yî-set-lie̍t-ngìn ke sú-chûng; Yî-set-lie̍t-ngìn tá-yàng Â-mô-li-ngìn, cham-liâng kì-têu só-yû ke thú-thi.
[22] Kì-têu cham-liâng Â-mô-li-ngìn só-yû ke thú-thi, tui nàm-phu ke Â-nun sân-lak to pet-phu ke Ngâ-pok sân-lak, tui tûng-phién ke khóng-yâ to sî-phién ke Yok-tan-hò.
[23] “Só-yî, he Song-chú — Yî-set-lie̍t ke Song-ti vi Kì ke chṳ́-mìn Yî-set-lie̍t kiuk-chéu Â-mô-li-ngìn. Ngì sióng-oi chhióng-chón liá-te thú-thi he-mò?
[24] Ngì ke sṳ̀n-mìn Kî-mat pûn ngì ke thú-thi, ngì cho-tet cham-tén; chúng-he Song-chú — ngài-têu Song-ti pûn ngài-têu só-yû ke, ngài-têu oi sú-hó.
[25] Ngì láu-tó ngì pí Mô-ap-vòng Sî-pat ke lai-é Pâ-le̍t hàn-kha khiòng he-mò? Kì m̀-sṳt ngiâ Yî-set-lie̍t-ngìn chan-chên, ya m̀-sṳt kûng-tá ngài-têu.
[26] Yî-set-lie̍t cham-yû Hî-sṳ̍t-pún lâu chû-vì ke sàng-chṳ́n, Â-lò-ngí lâu chû-vì ke sàng-chṳ́n, pin Â-nun sân-lak lióng-phién só-yû ke sàng-sṳ, yí-kîn yû sâm-pak ngièn lé. Chhai liá-chham sṳ̀-kiên, ngì-têu cho-má-ke m̀ sû-chón liá-têu thi-fông nè?
[27] Ngài mò tet-chhui ngì, ngì fán-chón lòi kûng-tá ngài, ngiâ ngài chan-chên. Song-chú he sṳ́m-phan chá; kîm-pû-ngit Kì oi chhai Yî-set-lie̍t-ngìn lâu Â-mùn-ngìn chûng-kiên phan-ton sṳ-fî.”
[28] Chúng-he, Â-mùn-vòng m̀-tap Yâ-fut-thâ phai ke ngìn chón-pûn kì ke fa.
[29] Ke-sṳ̀, Song-chú ke Lìn lìm-to Yâ-fut-thâ, kì chhiu kîn-ko Kî-lie̍t, Mâ-nâ-sî, chón-to Kî-lie̍t ke Mí-sṳ̂-pâ, oi hi Â-mùn-ngìn ke-vi.
[30] Yâ-fut-thâ hiong Song-chú hí-ngien kóng: “Na-he Ngì sṳ́ ngài tá-yàng Â-mùn-ngìn,
[31] ngài tet-sṳn kûi-lòi ke sṳ̀, yit-thin voi chiông thi-yit ke tui ngài vuk-hâ chhut-lòi ngiàng-chiap ngài ke ngìn, cho sêu-fa-chi hien-pûn Ngì.”
[32] Só-yî, Yâ-fut-thâ ko-hi lâu Â-mùn-ngìn siông-chhṳ̀; Song-chú sṳ́ kì tá-yàng.
[33] Kì kûng-tá kì-têu, tui Â-lò-ngí to Mí-ni̍t yit-tai, yén-yén to Â-phi-le̍t-Kî-lâ-mìn, yit-khiung ngi-sṳ̍p chho sàng, chhṳ̀-thet tông-tô ngìn. Án-ngiòng, Â-mùn-ngìn pûn Yî-set-lie̍t-ngìn chṳ̂n-fu̍k lé.
[34] Yâ-fut-thâ chón-to Mí-sṳ̂-pâ chhṳ-kâ vuk-hâ ke sṳ̀, kì ke thu̍k-sên-ńg nâ-tén lìn-kú thiau-vú chhut-lòi ngiàng-chiap kì.
[35] Yâ-fut-thâ khon-tó kì, chhiu sông-sîm chhá-lan sâm, kóng: “Ngài ke moi-é â, ngì voi hoi ngài sông-sîm sí ô! Ngióng-pân he ngì nè? Ngài yí-kîn sṳ́m-chhung hiong Song-chú hí-ngien, cho-m̀-tet sû chón-lòi lé!”
[36] Kì ke moi-é kóng: “Â-pâ! Ngì yí-kîn hiong Song-chú hí-ngien, chhiu cheu ngì hí ke ngien tui-thai ngài hó lé, yîn-vi Song-chú sṳ́ ngì chhai sù-thi̍t Â-mùn-ngìn sṳ̂n-song po-sù.”
[37] Kì ke moi-é yêu-khiù kì kóng: “Ngài chṳ́ khiù ngì yit-khien sṳ. Chhiáng chún ngài lì-khôi vuk-hâ lióng-ke ngie̍t, m̀-hó kón ngài; ngài oi lâu phèn-yû to sân-táng hi, vi ngài mò chhut-ka chhiu sí lòi ôi-sông.”
[38] Yâ-fut-thâ chún kì lì-khôi vuk-hâ lióng-ke ngie̍t, kì chhiu lâu phèn-yû to sân-táng hi, chhai ke-vi vi kì hàn-màng chhut-ka chhiu sí lòi ôi-sông.
[39] Lióng-ke ngie̍t heu, kì chón-to kiâ-pâ ke-vi, Yâ-fut-thâ cheu kì hiong Song-chú hí ke ngien vàn-ngien. Kì ke moi-é sí ke sṳ̀ hàn-he thùng-chṳ̂n-ńg. Heu-lòi, chhai Yî-set-lie̍t chûng yû yit-ke fûng-siu̍k:
[40] Yî-set-lie̍t ke fu-ńg tak-ngièn oi lì-khôi vuk-hâ si-ngit, hi fài-ngiam Kî-lie̍t-ngìn Yâ-fut-thâ ke moi-é.