[1] Â-pí-mí-le̍t sí-heu, Tó-tô ke sûn-é, Phú-ngá ke lai-é Thò-lâ hîn-hí, lòi kié-kiu Yî-set-lie̍t-ngìn. Kì he Yî-sat-kâ kî-chhu̍k ngìn, he̍t chhai Yî-fap-lièn sân-khî ke Sâ-me̍t.
[2] Thò-lâ cho Yî-set-lie̍t ke sṳ-sṳ̂ ngi-sṳ̍p sâm-ngièn. Kì sí-thet, mài-chong chhai Sâ-me̍t.
[3] Thò-lâ sí-heu, yû Kî-lie̍t-ngìn Ngài-ngí hîn-hí, cho Yî-set-lie̍t ke sṳ-sṳ̂ ngi-sṳ̍p ngi-ngièn.
[4] Kì yû sâm-sṳ̍p ke lai-é, khì sâm-sṳ̍p chak lì-è. Kì-têu chhai Kî-lie̍t yit-tai yû sâm-sṳ̍p chho sàng; to kîm-pû-ngit liá-têu sàng hàn ham-cho Ha̍p-vô-thi̍t-Ngài-ngí.
[5] Ngài-ngí sí-thet, chong chhai Kâ-mùn.
[6] Yî-set-lie̍t ngìn-mìn yu hàng Song-chú khon-cho sià-ok ke sṳ. Kì-têu pai ke-têu Pâ-li̍t lâu Â-sṳ̂-thâ-liu̍k, hàn-yû Si-li-â, Sî-tun, Mô-ap, Â-mùn, Fî-li-sṳ ke sṳ̀n-mìn. Kì-têu lì-khôi Song-chú, m̀ kin-pai Kì.
[7] Song-chú hiong Yî-set-lie̍t-ngìn fat-khién, chiông kì-têu kâu chhai Fî-li-sṳ-ngìn lâu Â-mùn-ngìn ke sú-chûng.
[8] Kì-têu pet-hoi pin khî-fu he̍t chhai Yok-tan-hò tûng-phién, Â-mô-li-ngìn kin-nui, Kî-lie̍t yit-tai ke Yî-set-lie̍t-ngìn, chúng-khiung sṳ̍p-pat ngièn,
[9] Â-mùn-ngìn yu ko Yok-tan-hò hi kûng-tá Yù-thai, Phien-ngâ-mén, lâu Yî-fap-lièn kî-chhu̍k. Yî-set-lie̍t-ngìn chhiu tù-tó khi̍t-thai ke khun-khú.
[10] Só-yî, Yî-set-lie̍t-ngìn khiù-ham Song-chú, kóng: “Ngài-têu tet-chhui Ngì; ngài-têu lì-khôi ngài-têu ke Song-ti hi-pai ke-têu Pâ-li̍t.”
[11] Song-chú en-kóng: “Thèu-pái Âi-khi̍p-ngìn, Â-mô-li-ngìn, Â-mùn-ngìn, Fî-li-sṳ-ngìn,
[12] Sî-tun-ngìn, Â-mâ-li̍t-ngìn, lâu Mâ-yùn-ngìn khî-fu ngì-têu, ngì-têu khiù-ham Ngài, kám-kóng Ngài mò kié-kiu ngì-têu he-mò?
[13] Chúng-he, ngì-têu hàn-he lì-khôi Ngài, hi-pai phe̍t ke sṳ̀n-mìn! Só-yî, Ngài mò-oi chai kiu ngì-têu lé.
[14] Ngì-têu hi khiù-ham ngì-têu só-sién ke sṳ̀n-mìn â! Ngì-têu tù-tó châi-nan ke sṳ̀, pûn kì-têu lòi kiu ngì-têu â!”
[15] Chúng-he, Yî-set-lie̍t-ngìn tui Song-chú kóng: “Ngài-têu yí-kîn fam-tó chhui lé; yù-chhai Ngì oi ngióng-pân tui-thai ngài-têu! Chúng-he khiù Ngì kîm-pû-ngit kié-kiu ngài-têu!”
[16] Chiap-tén, kì-têu chhiu chhù-thet ngoi-koet ke sṳ̀n-mìn, kin-pai Song-chú. Song-chú yîn Yî-set-lie̍t só su ke khun-khú sîm-kôn chhin kân-khú.
[17] Ke-sṳ̀, Â-mùn-ngìn ke kiûn-chhui chhai Kî-lie̍t ôn-yàng, chún-phi siông-chhṳ̀. Yî-set-lie̍t-ngìn ya chhi-si̍p, chhai Kî-lie̍t ke Mí-sṳ̂-pâ ôn-yàng.
[18] He̍t chhai Kî-lie̍t ke-phién ke Yî-set-lie̍t-ngìn lâu tak kî-chhu̍k ke liâng-chhiu lûng-chúng án-ngiòng kóng: “Má-ngìn siên hi kûng-tá Â-mùn-ngìn, má-ngìn chhiu cho Kî-lie̍t ngìn-mìn ke liâng-chhiu.”