[1] Yî-fap-lièn-ngìn chún-phi siông-chhṳ̀; kì-têu ko Yok-tan-hò, lòi-to Sat-fûn, tui Yâ-fut-thâ kóng: “Ngì cho-má-ke mò ham ngài-têu khiung-ha hi tá Â-mùn-ngìn? Ngài-têu oi chiông ngì lâu ngì ke vuk-è sêu-thet!”
[2] Yâ-fut-thâ tui kì-têu kóng: “Ngài lâu ngài ke thùng-pâu kûng-tá Â-mùn-ngìn; ngài sṳt khiù ngì-têu pông-chhu, ngì-têu sa m̀-hén chhûn-sú lòi kiu ngài-têu.
[3] Ngài khon ngì-têu m̀ lòi, chhiu mò-ku sâng-miang ke ngùi-hiám phàn-ko piên-kie hi tá Â-mùn-ngìn. Song-chú sṳ́ ngài tá-yàng lé. Liá-ha ngì-têu cho-má-ke sông-lòi kûng-tá ngài nè?”
[4] Án-ngiòng Yâ-fut-thâ seu-si̍p Kî-lie̍t só-yû ke ngìn-mìn, lâu Yî-fap-lièn-ngìn siông-chhṳ̀, tá-yàng kì-têu. (Yîn-vi Yî-fap-lièn-ngìn sṳt kóng-ko: “Ngì liá-têu he̍t chhai Yî-fap-lièn lâu Mâ-nâ-sî chûng-kiên ke Kî-lie̍t-ngìn chhiu-chhiong Yî-fap-lièn ke thò-pîn.”)
[5] Kî-lie̍t-ngìn cham-liâng Yok-tan-hò ke kí-ke thu-sòn-thèu, m̀ pûn Yî-fap-lièn-ngìn chéu-thet. Na-he yû Yî-fap-lièn-ngìn ke thò-pîn oi ko-hò, Kî-lie̍t-ngìn chhiu mun kì: “Ngì he Yî-fap-lièn-ngìn mò?” Ke-ngìn na kóng: “M̀-he!”
[6] kì-têu chhiu oi kì kóng “Sṳ-pô-lie̍t”, yîn-vi Yî-fap-lièn-ngìn fat-yîm m̀ chṳn-khok, yit-thin voi kóng-cho “Sî-pô-lie̍t”; án-ngiòng, Kî-lie̍t-ngìn chhiu chok kì, chhai Yok-tan-hò thu-sòn-thèu chiông kì chhṳ̀-thet. Ke-sṳ̀, Yî-fap-lièn-ngìn yû si-van lióng-chhiên ngìn pûn-ngìn chhṳ̀-sí.
[7] Yâ-fut-thâ cho Yî-set-lie̍t ke sṳ-sṳ̂ liuk-ngièn. Yâ-fut-thâ sí-thet, mài-chong chhai Kî-lie̍t ke yit-ke sàng-tú.
[8] Kì sí-heu, yû Pak-li-hèn-ngìn Yî-pí-chan cho Yî-set-lie̍t ke sṳ-sṳ̂.
[9] Kì yû sâm-sṳ̍p ke lai-é, sâm-sṳ̍p ke moi-é. Kì chiông moi-é ka-pûn phe̍t ke chûng-chhu̍k, yu tui phe̍t ke chûng-chhu̍k thó sâm-sṳ̍p ke sîm-khiû. Yî-pí-chan cho Yî-set-lie̍t ke sṳ-sṳ̂ chhit-ngièn.
[10] Yî-pí-chan sí-thet, mài-chong chhai Pak-li-hèn.
[11] Kì sí-heu, yû Sî-pu-lùn-ngìn Yî-lùn cho Yî-set-lie̍t ke sṳ-sṳ̂ sṳ̍p-ngièn.
[12] Yî-lùn sí-thet, mài-chong chhai Sî-pu-lùn kin-nui ke Â-ngâ-lùn.
[13] Kì sí-heu, yû Pí-lâ-tun-ngìn Hî-lie̍t ke lai-é Ap-tun cho Yî-set-lie̍t ke sṳ-sṳ̂.
[14] Kì yû si-sṳ̍p ke lai-é, sâm-sṳ̍p ke sûn-é; kì-têu khì chhit-sṳ̍p chak lì-è. Ap-tun cho Yî-set-lie̍t ke sṳ-sṳ̂ pat-ngièn.
[15] Hî-lie̍t ke lai-é Ap-tun sí-thet, mài-chong chhai Yî-fap-lièn kin-nui ke Pí-lâ-tun, chhai Â-mâ-li̍t-ngìn ke sân-khî.