[1] Yok-sû-â ko-sṳ̂n yî-heu, Yî-set-lie̍t-ngìn khiù-mun Song-chú: “Ngài-têu tông-chûng nai-ke kî-chhu̍k oi siên sông-hi kûng-tá Kâ-nàm-ngìn nè?”
[2] Song-chú en-kóng: “Yù-thai kî-chhu̍k oi siên sông-hi. Ngài yí-kîn chiông liá-te thú-thi kâu chhai kì-têu sú-chûng.”
[3] Yù-thai kî-chhu̍k ke ngìn tui kì-têu ke hiûng-thi Sî-mién kî-chhu̍k ke ngìn kóng: “Chhiáng lâu ngài-têu khiung-ha to ke yí-kîn fûn-phi pûn ngài-têu ke thú-thi, hi chṳ̂n-fu̍k Kâ-nàm-ngìn, yèn-heu ngài-têu chhiu lâu ngì-têu khiung-ha to fûn-phi pûn ngì-têu ke thú-thi hi.”
[4] Só-yî Sî-mién lâu Yù-thai kî-chhu̍k khiung-ha hi siông-chhṳ̀; Song-chú chiông Kâ-nàm-ngìn lâu Pí-li-sé-ngìn kâu chhai kì-têu sú-chûng. Kì-têu chhai Pí-set chhṳ̀-sí yit-van ngìn,
[5] yu chhai ke-vi tù-tó Â-tô-nì-Pí-set, chhiu lâu kì siông-chhṳ̀.
[6] Â-tô-nì-Pí-set thò-chéu; kì-têu tûi kì, chok-tó kì, chiông kì ke sú-chṳ́-kûng lâu kiok-chṳ́-kûng to̍k-thet.
[7] Â-tô-nì-Pí-set kóng: “Sṳt-yû chhit-sṳ̍p ke vòng pûn ngài to̍k-thôn sú-chṳ́-kûng lâu kiok-chṳ́-kûng; kì-têu chhai ngài chok-è tái-hâ ngiâm ngìn te̍p-thet ke sṳ̍t-vu̍t. Liá-ha Song-ti cheu ngài só-cho ke po-yin ngài lé.” Kì pûn-ngìn tai-to Yâ-lu-sat-lâng, chhiu sí chhai ke-vi.
[8] Yù-thai kî-chhu̍k ke ngìn kûng-tá Yâ-lu-sat-lâng. Kì-têu cham-liâng ke-sàng, chiông sàng-tú ke ngìn chhṳ̀-thet, yu piong-fó sêu-sàng.
[9] Chiap-tén, kì-têu kûng-tá he̍t chhai sân-khî, kô-ngièn, lâu nàm-phu châu-thi ke Kâ-nàm-ngìn.
[10] Kì-têu ya kûng-tá he̍t chhai Hî-pak-lùn-sàng ke Kâ-nàm-ngìn (Hî-pak-lùn yî-chhièn ôn-to Kî-lie̍t-Â-pâ), tá-yàng Sṳ-chhî-chhu̍k, Â-hî-man-chhu̍k, lâu Tha̍t-mâi-chhu̍k ke ngìn.
[11] Yù-thai kî-chhu̍k ke ngìn tui ke-vi kûng-tá Tí-piak-sàng; ke-sṳ̀, Tí-piak ôn-to Kî-lie̍t-Sî-fut.
[12] Yù-thai kî-chhu̍k ke ngìn Kâ-le̍t kóng: “Má-ngìn cham-liâng Kî-lie̍t-Sî-fut, ngài chhiu chiông ngài ke moi-é Ap-sat ka-pûn kì.”
[13] Kâ-le̍t ke ló-thâi Kî-na̍p-sṳ̂ ke lai-é Ngò-thò-ngiap cham-liâng ke-sàng, só-yî Kâ-le̍t chiông moi-é Ap-sat pûn kì cho pû-ngiòng.
[14] Kiet-fûn ke-ngit, Ngò-thò-ngiap sô-súng Ap-sat hi hiong kiâ-pâ thó yit-te thièn-thi. Ap-sat yit hâ lì-è, Kâ-le̍t chhiu mun kì oi má-ke;
[15] kì kóng: “Khiù ngì sung ngài yit-ke lî-vu̍t; yîn-vi ngì pûn ngài ôn-kî chhai châu-thi, khiù ngì ya pûn ngài chhièn-súi.” Só-yî Kâ-le̍t chiông song chhièn-súi lâu ha chhièn-súi chhiòn-phu pûn kì.
[16] Mô-sî chhông-mîn-ló ke heu-thoi he Kî-nì-ngìn; kì-têu lâu Yù-thai kî-chhu̍k ke ngìn khiung-ha lì-khôi chûng-su sàng — Yâ-li-kô to Â-lâ-tet nàm-phién ke Yù-thai fông-thi, he̍t chhai Â-mâ-li̍t-ngìn tông-chûng.
[17] Yù-thai kî-chhu̍k ke ngìn lâu kì-têu ke hiûng-thi Sî-mién kî-chhu̍k ke ngìn lièn-ha̍p hí-lòi, sông-hi tá-yàng he̍t chhai Sé-fap-sàng ke Kâ-nàm-ngìn, chiông ke-sàng chhiòn-phu fí-me̍t, kì ke miàng chhiu ôn-to Hò-ngí-mâ.
[18] Yù-thai kî-chhu̍k ke ngìn yu cham-liâng Kâ-sat, Â-sṳ̍t-kî-lùn, Yî-kiet-lùn lâu liá-têu sàng chû-vì ke thú-thi.
[19] Song-chú pông-chhu Yù-thai kî-chhu̍k ke ngìn, kì-têu chhiu cham-liâng sân-khî, chúng-he mò fap-thu chiông he̍t chhai phiàng-thi ke ngìn kiuk-chéu, yîn-vi kì-têu yû thiet chan-chhâ.
[20] Cheu Mô-sî ke min-lin, Kâ-le̍t tet-tó Hî-pak-lùn; kì chiông Â-na̍p heu-thoi sâm-chhu̍k ke ngìn kiuk-chhut ke-sàng.
[21] Phien-ngâ-mén kî-chhu̍k ke ngìn mò chiông he̍t chhai Yâ-lu-sat-lâng ke Yâ-pu-sṳ̂-ngìn kiuk-chéu, só-yî Yâ-pu-sṳ̂-ngìn chhṳ̍t-to kîm-pû-ngit hàn lâu Phien-ngâ-mén-ngìn khiung-ha he̍t chhai ke-vi.
[22] Yok-sit ke heu-thoi — Yî-fap-lièn lâu Mâ-nâ-sî kî-chhu̍k ke ngìn hi kûng-tá Pak-thi̍t-li-sàng; liá-sàng yî-chhièn ôn-to Lu-sṳ̂. Song-chú pông-chhu kì-têu. Kì-têu phai tham-é to sàng-tú hi;
[24] tham-é khon-tó yit-ke ngìn tui sàng-tú chhut-lòi, chhiu mun kì: “Chhiáng lâu ngài-têu kóng ngióng-pân ngi̍p-sàng, ngài-têu m̀-voi sông-hoi ngì.”
[25] Ke-ngìn chhiu lâu kì-têu kóng. Só-yî Yî-fap-lièn lâu Mâ-nâ-sî kî-chhu̍k ke ngìn chhṳ̀-sí sàng-tú só-yû ke ngìn-mìn, chṳ́ liù-hâ ke-ngìn lâu kì vuk-hâ ngìn.
[26] Heu-lòi, ke-ngìn to Het-ngìn ke thú-thi, chhai ke-vi hí yit-chho sàng, chiông kì ôn-to Lu-sṳ̂; liá-sàng to liá-ha hàn-he ham liá-ke miàng.
[27] Mâ-nâ-sî kî-chhu̍k ke ngìn mò chiông he̍t chhai Pak-San, Thâ-na̍p, Tô-ngí, Yî-pak-lièn, Mí-kit-tô, lâu kok-sàng fu-khiun chhûn-chông ke ngìn-mìn kiuk-chéu; Kâ-nàm-ngìn khiòng-khiòng m̀-hén chéu, ki-siu̍k he̍t chhai ke-vi.
[28] Yî-set-lie̍t-ngìn khiòng-sṳn heu, kì-têu khiòng-pet Kâ-nàm-ngìn cho khú-kûng, chúng-he mò chiông kì-têu chhiòn-phu kiuk-chéu.
[29] Yî-fap-lièn kî-chhu̍k ke ngìn mò chiông he̍t chhai Kî-set-sàng ke Kâ-nàm-ngìn kiuk-chéu, só-yî Kâ-nàm-ngìn ki-siu̍k lâu kì-têu khiung-ha he̍t.
[30] Sî-pu-lùn kî-chhu̍k ke ngìn mò chiông he̍t chhai Kî-lùn lâu Nâ-ha̍p-lâ-sàng ke ngìn-mìn kiuk-chéu, só-yî Kâ-nàm-ngìn ki-siu̍k he̍t chhai ke-vi, chúng-he cho Sî-pu-lùn-ngìn ke khú-kûng.
[31] Â-sat kî-chhu̍k ke ngìn mò chiông he̍t chhai Â-khô, Sî-tun, Â-het-lâ, Â-kiet-sit, Het-pâ, Â-fut-kiet, lâu Li-ha̍p ke ngìn-mìn kiuk-chéu.
[32] Kì-têu lâu liá-têu tông-thi ke Kâ-nàm-ngìn khiung-ha he̍t, mò chiông kì-têu kiuk-chéu.
[33] Nâ-fut-thâ-li kî-chhu̍k ke ngìn mò chiông he̍t chhai Pak-Sṳ-ma̍k lâu Pak-Â-na̍p-sàng ke ngìn-mìn kiuk-chéu. Kì-têu lâu tông-thi ke Kâ-nàm-ngìn khiung-ha he̍t, chúng-he khiòng-pet liá-têu ngìn cho khú-kûng.
[34] Â-mô-li-ngìn chiông Tan kî-chhu̍k ke ngìn pet-sông sân-khî, m̀ chún kì-têu hâ-to phiàng-thi lòi.
[35] Â-mô-li-ngìn ki-siu̍k he̍t chhai Â-ngâ-lùn, Sâ-pîn lâu Hî-lie̍t-sân; chúng-he Yok-sit ke heu-thoi — Yî-fap-lièn lâu Mâ-nâ-sî kî-chhu̍k ke ngìn chṳ̂n-fu̍k kì-têu, khiòng-pet kì-têu cho khú-kûng.
[36] Â-mô-li-ngìn ke piên-kie tui Â-khiet-lâ-pîn lu-héu khôi-sṳ́, chhai Sî-lâ pet-phién.