[1] Yî-vut sí-heu, Yî-set-lie̍t ngìn-mìn yu hàng Song-chú khon-cho sià-ok ke sṳ,
[2] só-yî Song-chú chiông kì-têu kâu chhai thúng-chhṳ Ha-só-sàng ke Kâ-nàm-vòng Yâ-pîn ke sú-chûng. Yâ-pîn ke ngièn-soi he Sî-sî-lâ, he̍t chhai ngoi-pâng ngìn ke Ha-lò-sat.
[3] Yâ-pîn yû kiú-pak liòng thiet chan-chhâ; kì fî-sòng chhàn-phau, khî-fu ap-pet Yî-set-lie̍t-ngìn ngi-sṳ̍p ngièn. Heu-lòi Yî-set-lie̍t ngìn-mìn khiù-ham Song-chú pông-chhu.
[4] Yû yit-ke ńg siên-tî miàng ôn-to Tí-pô-lâ; kì he Lâ-pí-tô ke pû-ngiòng, ke-sṳ̀ cho Yî-set-lie̍t ke sṳ-sṳ̂.
[5] Chhai Yî-fap-lièn sân-khî Lâ-mâ lâu Pak-thi̍t-li chûng-kiên yû yit-thèu chûng-su, Tí-pô-lâ sòng-sòng chhô chhai ke chûng-su hâ; Yî-set-lie̍t ngìn-mìn yû sṳ-chhìn chhiu to ke-vi chhiáng kì chú-chhṳ̀ kûng-tho.
[6] Yû yit-ngit, kì phai-ngìn to Nâ-fut-thâ-li ke Kî-tâi-sṳ̂-sàng hi ham Â-pí-nò-êm ke lai-é Pâ-lâ lòi, tui kì kóng: “Song-chú — Yî-set-lie̍t ke Song-ti min-lin ngì kóng: ‘Ngì oi tui Nâ-fut-thâ-li lâu Sî-pu-lùn kî-chhu̍k chûng seu-si̍p yit-van ngìn, tai-liâng kì-têu to Thâ-phok-sân.
[7] Ngài oi yín-yu Yâ-pîn ke ngièn-soi Sî-sî-lâ tai-liâng chan-chhâ lâu kiûn-chhui hi Kî-sun-hò lâu ngì siông-chhṳ̀, chúng-he Ngài oi chiông kì kâu chhai ngì sú-chûng.’ ”
[8] Pâ-lâ en kì kóng: “Na-he ngì lâu ngài khiung-ha hi, ngài chhiu-hi; ngì m̀ lâu ngài khiung-ha hi, ngài chhiu m̀ hi.”
[9] Tí-pô-lâ kóng: “Hó â, ngài lâu ngì khiung-ha hi; chúng-he ngì tá-yàng me mò kûng-lò, yîn-vi Song-chú oi chiông Sî-sî-lâ kâu chhai yit-ke fu-ngìn-kâ ke sú-chûng.” Só-yî Tí-pô-lâ lâu Pâ-lâ khiung-ha chhut-fat hi Kî-tâi-sṳ̂.
[10] Pâ-lâ seu-si̍p Sî-pu-lùn lâu Nâ-fut-thâ-li kî-chhu̍k ke ngìn to Kî-tâi-sṳ̂, yû yit-van ngìn thèn-tén kì. Tí-pô-lâ me lâu kì khiung-ha hi.
[11] Ke-sṳ̀, Kî-nì-ngìn Hî-pak chhai Kî-tâi-sṳ̂ fu-khiun Sat-nâ-yîm ke siong-su sùn tap chong-phùng. Kì yí-kîn lì-khôi khì-thâ ke Kî-nì-ngìn; kì-têu he Mô-sî ke chhî-khiû-é Hò-pâ ke heu-thoi.
[12] Sî-sî-lâ thâng-tó Â-pí-nò-êm ke lai-é Pâ-lâ yí-kîn to Thâ-phok-sân táng,
[13] kì chhiu chhi-si̍p kiú-pak liòng thiet chan-chhâ lâu só-yû ke kiûn-chhui, phai kì-têu tui ngoi-pâng ngìn ke Ha-lò-sat to Kî-sun-hò hi.
[14] Tí-pô-lâ tui Pâ-lâ kóng: “Hó chhut-chan lé, Song-chú chhai thèu-chhièn tai-liâng ngì! Kîm-pû-ngit, Song-chú yí-kîn chiông Sî-sî-lâ kâu chhai ngì ke sú-chûng.” Só-yî Pâ-lâ tai-liâng yit-van ngìn tui Thâ-phok-sân hâ-hi.
[15] Pâ-lâ ke kiûn-chhui fat-thung kûng-kit ke sṳ̀, Song-chú chiông Sî-sî-lâ lâu kì só-yû ke thiet chan-chhâ lâu kiûn-chhui tá-to lon kâu-kâu. Sî-sî-lâ hâ-chhâ, hàng-lu thò-chéu.
[16] Pâ-lâ tûi-tá kì-têu ke kiûn-chhui lâu thiet chan-chhâ, yit-chhṳ̍t tûi-tó ngoi-pâng ngìn ke Ha-lò-sat. Sî-sî-lâ chhiòn-kiûn tó chhai tô-ha, lièn yit-sà ya mò-chhûn.
[17] Tân-chhiang Sî-sî-lâ hàng-lu thò-chéu, to Kî-nì-ngìn Hî-pak ke pû-ngiòng Ngâ-yi ke chong-phùng, yîn-vi Ha-só-vòng Yâ-pîn lâu Hî-pak-kâ chhin-hó.
[18] Ngâ-yi chhut-lòi ngiàng-chiap Sî-sî-lâ, tui kì kóng: “Thai-ngìn â, chhiáng ngi̍p ngài chong-phùng lòi, m̀-sṳ́ kiâng.” Sî-sî-lâ chhiu ngi̍p-hi; Ngâ-yi yung phî-kut chiông kì koi-tén.
[19] Sî-sî-lâ tui kì kóng: “Pai-thok ngì pûn-têu súi ngài lîm, ngài choi tông-châu.” Ngâ-yi tá-khôi yit phì-thoi ngiù-nen pûn kì lîm, yèn-heu chai chiông kì khong hí-lòi.
[20] Sî-sî-lâ tui Ngâ-yi kóng: “Pai-thok ngì khî chhai chong-phùng mùn-héu. Na yû ngìn lòi mun ngì: ‘Yû ngìn chhai liá-vi mò?’ Ngì oi kóng: ‘Mò’.”
[21] Sî-sî-lâ fî-sòng khioi, yit vang lo̍k-hi chhiu soi-thet. Hî-pak ke pû-ngiòng Ngâ-yi nâ yit-kî chhùi-è lâu yit-kî ku-thin chong-phùng ke tâng-é, thêu-thêu-é hàng-to Sî-sî-lâ sṳ̂n-piên, chiông tâng-é tâng-ngi̍p kì ke thai-yòng-hiet, chhôn-to thi-nài tî-poi. Sî-sî-lâ chhiu sí-thet.
[22] Pâ-lâ lòi tûi Sî-sî-lâ; Ngâ-yi chhut-lòi ngiàng-chiap, tui kì kóng: “Chhiáng ngi̍p-lòi, ngài pûn ngì khon ngì oi chhìm ke ngìn.” Pâ-lâ thèn kì ngi̍p-hi, khon-tó Sî-sî-lâ sí chhai thi-song, yû yit-kî tâng-é chhôn-ko kì ke thèu-nà.
[23] Ke-ngit, Song-ti sṳ́ Yî-set-lie̍t-ngìn chṳ̂n-fu̍k Kâ-nàm-vòng Yâ-pîn.
[24] Tui án-ngiòng, Yî-set-lie̍t-ngìn ye̍t-lòi ye̍t khiòng-thai, yàng-ko Kâ-nàm-vòng Yâ-pîn, chhṳ̍t-to chiông kì sêu-me̍t.