[1] Yî-fap-lièn-ngìn tui Kî-thien kóng: “Ngì hi kûng-tá Mí-thien-ngìn ke sṳ̀, cho-má-ke m̀ hêm ngài-têu? Ngì cho-má-ke án-ngiòng tui-thai ngài-têu?” Kì-têu thai-sâng chit-phi Kî-thien.
[2] Kî-thien lâu kì-têu kóng: “Ngài só cho-tó ke pí m̀-tet ngì-têu só cho ke; ngì-têu Yî-fap-lièn-ngìn só ngiâm-tó ke phù-thò pí ngài-têu Â-pí-yî-chhia-ngìn ke song-tén phù-thò hàn-kha hó nè!
[3] Song-ti chiông Mí-thien-ngìn ke liâng-chhiu Ngò-li̍p lâu Sî-yî-pak kâu chhai ngì-têu sú-chûng; ngài só cho ke ngióng cho-tet lâu ngì-têu pí nè?” Kì-têu thâng-tó Kî-thien liá-fa chhiu mò chai fat-khién lé.
[4] Kî-thien lâu thèn kì ke sâm-pak ke ngìn lòi-to Yok-tan-hò, ko-hò ke sṳ̀, sûi-yèn kì-têu chhiòn-phu tông-khioi, hàn-he ki-siu̍k tûi-sat thi̍t-ngìn.
[5] Kì-têu to Sû-kot, Kî-thien tui sàng-tú ke ngìn kóng: “Chhiáng nâ-têu piáng-è pûn thèn ngài ke ngìn sṳ̍t, yîn-vi kì-têu tông-khioi. Ngài hàn-oi hi tûi-sat Mí-thien-vòng Sî-pâ lâu Sat-mu-nâ.”
[6] Chúng-he Sû-kot ke liâng-chhiu kóng: “Ngài-têu ngióng-oi nâ piáng-è pûn ngì ke kiûn-chhui? Ngì hàn-màng chok-tó Sî-pâ lâu Sat-mu-nâ!”
[7] Kî-thien kóng: “Hó! Song-chú chiông Sî-pâ lâu Sat-mu-nâ kâu-pûn ngài yî-heu, ngài oi nâ khóng-yâ ke net-è lòi tá-sông ngì-têu.”
[8] Kî-thien hiong-chhièn hàng, lòi-to Pí-nú-yî-le̍t, hiong ke-vi ke ngìn thì-chhut khiung-yong ke yêu-khiù. Ke-vi ke ngìn só en ke lâu Sû-kot-ngìn khiung-yong.
[9] Só-yî Kî-thien tui Pí-nú-yî-le̍t ke ngìn kóng: “Ngài voi phìn-phìn ôn-ôn to-chón-lòi; ke-sṳ̀, ngài oi chhak-thet liá-chho sàng-pó!”
[10] Ke-sṳ̀, Sî-pâ lâu Sat-mu-nâ pin kì-têu ke kiûn-chhui chhai Kâ-kok. Kûi-chak tûng-fông ke yù-mu̍k mìn-chhu̍k chṳ́ chhûn-tó yit-van ńg-chhiên ke sṳ-pîn, yí-kîn yû sṳ̍p-ngi van ngìn chan-sí.
[11] Kî-thien tui Nò-pâ lâu Yok-pí-ha̍p tûng-phién, tui yù-mu̍k mìn-chhu̍k ke tho-lu chhièn-chin; Mí-thien ke kiûn-chhui vàn-chhiòn mò fòng-phi, Kî-thien yit-ha-é chhiu tá-yàng kì-têu.
[12] Mí-thien-ngìn ke lióng-ke vòng — Sî-pâ lâu Sat-mu-nâ chéu-thet hi; Kî-thien tûi kì-têu, chiông kì-têu chok-tó, sṳ́ kì-têu chhiòn-kiûn si-san.
[13] Yok-â-sṳ̂ ke lai-é Kî-thien tui chan-chhòng chón-lòi, kîn-ko Hî-lie̍t-sṳ̂ sân ke lu-héu,
[14] chok-tó yit-ke Sû-kot ke heu-sâng ngìn, sṳ́m-mun kì. Kì chiông Sû-kot liâng-chhiu lâu chóng-ló ke miàng-tân siá-pûn Kî-thien, chúng-khiung chhit-sṳ̍p chhit-ke ngìn.
[15] Kî-thien to Sû-kot, tui sàng-tú ke ngìn kóng: “Hàn ki-tet ngì-têu sṳt khî-chhie̍t pông-chhu ngài mò? Ngì-têu kóng ngài mò chok-tó Sî-pâ lâu Sat-mu-nâ, só-yî m̀ chiông piáng-è pûn ngài tông-khioi ke kiûn-chhui. Liá-ha ngì-têu khon! Kì lióng-sà chhai liá-vi!”
[16] Só-yî Kî-thien chiông Sû-kot ke liâng-chhiu chok hí-lòi, yung khóng-yâ ke net-è hìn-fa̍t kì-têu.
[17] Kì ya chhak-thet Pí-nú-yî-le̍t ke sàng-pó, chhṳ̀-thet sàng-tú ke ngìn.
[18] Kî-thien sṳ́m-mun Sî-pâ lâu Sat-mu-nâ: “Ngì-têu chhai Thâ-phok-sân chhṳ̀-sí ke ngìn he má-ke yong-é?” Kì-têu en-kóng: “Kì-têu tông-chhiong ngì, tak-sà chhiòn-phu chhiong vòng-chṳ́.”
[19] Kî-thien kóng: “Kì-têu he ngài ke hiûng-thi, lâu ngài khiung â-mê kiung ke. Ngài sṳt chṳ́-tén yún-sên ke Song-chú fat-sṳ, na-he ngì-têu mò chhṳ̀-thet kì-têu, ngài chhiu m̀ chhṳ̀ ngì-têu.”
[20] Só-yî Kî-thien tui kì thai ke lai-é Yit-thiap kóng: “Hi chiông kì-têu chhṳ̀-thet!” Chúng-he Yit-thiap chhin-kiâng, mò pâng-chhut tô, yîn-vi kì hàn-he yit-ke se-â-kô-é.
[21] Sî-pâ lâu Sat-mu-nâ tui Kî-thien kóng: “Ngì chhîn-sṳ̂n lòi chhṳ̀ ngài-têu â! Ngì chang-yû liá li̍t-liong.” Só-yî Kî-thien chhṳ̀-thet kì-têu, chiông kì-têu lo̍k-thò kiáng-hong ngie̍t-hìn ke chông-sṳt-phín nâ-chéu.
[22] Heu-lòi, Yî-set-lie̍t ngìn-mìn tui Kî-thien kóng: “Chhiáng cho ngài-têu ke thúng-chhṳ-chá; ngì lâu ngì ke chṳ́-sûn chhiòn-phu cho ngài-têu ke thúng-chhṳ-chá, yîn-vi ngì kiu ngài-têu thot-lì Mí-thien-ngìn.”
[23] Kî-thien kóng: “Ngài m̀ cho ngì-têu ke thúng-chhṳ-chá; ngài ke lai-é ya m̀ cho ngì-têu ke thúng-chhṳ-chá. Song-chú oi thúng-chhṳ ngì-têu.”
[24] Kì yu kóng: “Ngài chṳ́ yêu-khiù ngì-têu yit-khien sṳ, chhiáng chiông ngì-têu tak-sà só chhióng-lòi ke ngí-vàn kâu-pûn ngài.” (Ngièn-lòi Mí-thien-ngìn chhiong khì-thâ Yî-sṳ̍t-mâ-li-ngìn khiung-yong, chhiòn-phu tai kîm ngí-vàn.)
[25] Mìn-chung en-kóng: “Ngài-têu tông ngien-yi pûn ngì.” Kì-têu chhiu thâm-khôi yit-liâng ngoi-sâm, tak-ke ngìn chiông chhióng-lòi ke ngí-vàn fit lo̍k-hi.
[26] Kî-thien sû-si̍p thai-yok ngi-sṳ̍p kûng-kîn chhûng ke kîm ngí-vàn, nang-ngoi hàn-yû Mí-thien-vòng tai ke chông-sṳt-phín, pha̍t-lien lâu chṳ́-set sâm-fu, pin lo̍k-thò kiáng-hong ke lien-é.
[27] Kî-thien yung liá-têu kîm-é cho yit-ke ngiéu-siong, piong chhai kì ke kâ-hiông Ngò-fut-lâ. Heu-lòi só-yû ke Yî-set-lie̍t-ngìn lì-khôi Song-ti, hàng kiên-yìm, to ke-vi hi-pai ke ngiéu-siong; liá chhiu sàng-cho Kî-thien lâu kì vuk-hâ ngìn ke ham-chiáng.
[28] Án-ngiòng, Mí-thien-ngìn pûn Yî-set-lie̍t-ngìn tá-sû lé, khià-thèu m̀-hí. Koet-nui thai-phìn si-sṳ̍p ngièn, chhṳ̍t-to Kî-thien ko-sṳ̂n.
[29] Yok-â-sṳ̂ ke lai-é Kî-thien chón ku-hiông, he̍t chhai vuk-hâ.
[30] Kî-thien yû chhit-sṳ̍p ke lai-é, yîn-vi kì yû tông-tô pû-ngiòng lâu se-chiá.
[31] Kì chhai Sṳ-kiam yû yit-ke se-chiá; kì ya kiung yit-ke lai-é, Kî-thien lâu kì ôn-miàng Â-pí-mí-le̍t.
[32] Yok-â-sṳ̂ ke lai-é Kî-thien chhin chhòng-miang chang ko-sṳ̂n, chong chhai Â-pí-yî-chhia-chhu̍k ke Ngò-fut-lâ, kiâ-pâ Yok-â-sṳ̂ ke fùn-mu.
[33] Kî-thien yit ko-sṳ̂n, Yî-set-lie̍t-ngìn yu lì-khôi Song-ti, hàng kiên-yìm, hi-pai ke-têu Pâ-li̍t. Kì-têu ngin Pâ-li̍t-Pí-li-thú cho kì-têu ke sṳ̀n-mìn.
[34] Yî-set-lie̍t-ngìn mò ki-ngiam Song-chú — kì-têu ke Song-ti, chhiu-he kiu kì-têu lì-khôi si chû-vì sù-thi̍t ke Song-ti.
[35] Kì-têu me mò yîn-vi Yâ-lu-Pâ-li̍t — chhiu-he Kî-thien — vi Yî-set-lie̍t-ngìn só-cho ke hó-sṳ lòi hó khoán-thai kì vuk-hâ ke ngìn.