[1] Heu-lòi, chhai kot ma̍k-é ke sṳ̀-chiet, Chhâm-sûn tai yit-chak se sân-yòng hi khon kì ke pû-ngiòng. Chhâm-sûn tui kiâ chhông-mîn-ló kóng: “Ngài oi ngi̍p kiên-fòng hi chhìm ngài ke pû-ngiòng.” Kiâ chhông-mîn-ló m̀-chún kì ngi̍p-hi,
[2] tui kì kóng: “Ngài chṳ̂n tî ngì tông-nâu kì, só-yî chiông kì ka-pûn ngì ke chhiâ-lòng lé. Kì ke ló-moi pí kì hàn-kha chiâng, ngì cho-tet thó kì!”
[3] Chhâm-sûn kóng: “Liá-pái ngài yû chṳ̂-kiet hó-hó lòi siû-lî Fî-li-sṳ-ngìn!”
[4] Chhâm-sûn chhiu chok sâm-pak chak fù-lì lòi, chiông fù-lì ke mî yit-tui yit-tui kiet khiung-ha, kiet-thèu táng-kô chhap yit-kî fó-pá,
[5] yèn-heu tiám-fó, chiông fù-lì piong-ngi̍p Fî-li-sṳ-ngìn ke ma̍k-thièn tú. Án-ngiòng, kì chiông kot-hó ke lâu hàn-màng kot ke ma̍k-é chhiòn-phu sêu-thet, lièn phù-thò-yèn lâu kám-lám-yèn ya sêu-thet.
[6] Fî-li-sṳ-ngìn thiàu-chhà má-ngìn piong-fó, fat-hien he Chhâm-sûn cho ke, yîn-vi kiâ chhông-mîn-ló (Thìn-nâ-ngìn) chiông kì ke pû-ngiòng ka-pûn kiâ chhiâ-lòng. Só-yî Fî-li-sṳ-ngìn sông-hi, piong-fó sêu ke fu-ngìn-kâ lâu kì ke â-pâ.
[7] Chhâm-sûn tui Fî-li-sṳ-ngìn kóng: “Ngì-têu ki-yèn kám án-ngiòng cho, ngài fat-sṳ, na m̀ po liá yên-sù, ngài chhie̍t-tui m̀ piong ngì-têu so̍t!”
[8] Chhâm-sûn tá-to kì-têu chhám-chhám, chhṳ̀-sí chhin-tô ngìn. Heu-lòi kì to Yî-thán, he̍t chhai ke-vi ke sa̍k-lùng tú.
[9] Fî-li-sṳ-ngìn to Yù-thai, chhai ke-vi ôn-yàng, kûng-tá Li-hî-sàng.
[10] Yù-thai-ngìn mun kì-têu: “Ngì-têu cho-má-ke sông-lòi kûng-tá ngài-têu nè?” Kì-têu kóng: “Ngài-têu lòi chok Chhâm-sûn; kì ngióng-pân tui-thai ngài-têu, ngài-têu ya oi ngióng-pân tui-thai kì.”
[11] Só-yî, yû sâm-chhiên Yù-thai-ngìn to Yî-thán ke sa̍k-lùng hi-chhìm Chhâm-sûn, tui kì kóng: “Kám-kóng ngì m̀-tî Fî-li-sṳ-ngìn he thúng-chhṳ ngài-têu ke? Ngài-têu voi pûn ngì hoi-sí!” Chhâm-sûn en-kóng: “Ngài he cheu kì-têu tui-thai ngài ke fông-sṳt lòi tui-thai kì-têu thin-thin!”
[12] Yù-thai-ngìn lâu kì kóng: “Ngài-têu to liá-vi lòi, oi chiông ngì khún hí-lòi, kâu-pûn Fî-li-sṳ-ngìn.” Chhâm-sûn kóng: “Ngì-têu oi lâu ngài fat-sṳ, ngì-têu chhṳ-kâ m̀-voi chhṳ̀ ngài.”
[13] Kì-têu kóng: “Hó, ngài-têu tân-tân chiông ngì khún hí-lòi, kâu-pûn kì-têu; ngài-têu m̀-voi chhṳ̀ ngì.” Só-yî kì-têu yung lióng-thiàu sîn ke sok-è chiông Chhâm-sûn khún hí-lòi, tai kì chhut sa̍k-lùng.
[14] Chhâm-sûn to Li-hî, Fî-li-sṳ-ngìn hiong kì chéu-tén hi, tui kì chhin-sê. Song-chú ke Lìn khiòng-lie̍t lìm-to kì; kì yit yung-li̍t, khún kiâ sú ke sok-è chhiu-chhiong mà-sok pûn fó sêu thôn-thet yit-yong.
[15] Kì khon-tó yit-kî hàn-màng châu ke lì sôi-kut, chhiu ngiâm hí-lòi, yung kì chhṳ̀-thet yit-chhiên ngìn.
[16] Chhâm-sûn cho sṳ̂ kóng: Ngài yung yit-kî lì sôi-kut chhṳ̀-thet yit-chhiên ngìn; yung yit-kî lì sôi-kut sṳ́ sṳ̂-thí tôi kûi tôi.
[17] Kì kóng-so̍t chhiu chiông lì sôi-kut fit-thet. Ke thi-fông chhiu ôn-to Lâ-ma̍t-Li-hî.
[18] Heu-lòi, Chhâm-sûn fî-sòng choi-châu; kì khién-khiù Song-chú kóng: “Ngì sṳ́ Ngì ke phu̍k-ngìn thai yàng thi̍t-ngìn; liá-ha Ngì oi ngài hot-sí, lo̍k chhai ke-têu mò su kot-lî ke ngìn sú-chûng he-mò?”
[19] Song-ti chhiu sṳ́ Li-hî ke tâi-vô-thi lie̍t-khôi, yúng-chhut chhièn-súi. Chhâm-sûn lîm-súi yî-heu, chîn-sṳ̀n fî-fu̍k. Só-yî, ke chhièn-súi ôn-to Yún-Ha̍p-kô-li, to kîm-pû-ngit hàn chhai Li-hî.
[20] Fî-li-sṳ-ngìn thúng-chhṳ Yî-set-lie̍t-ngìn ke khì-kiên, Chhâm-sûn cho Yî-set-lie̍t ke sṳ-sṳ̂ ngi-sṳ̍p ngièn.