[1] Yî-set-lie̍t ngìn-mìn yu hàng Song-chú khon-cho sià-ok ke sṳ, só-yî Song-chú chiông kì-têu kâu chhai Mí-thien-ngìn sú-chûng chhit-ngièn.
[2] Mí-thien-ngìn pí Yî-set-lie̍t-ngìn khiòng-chong; Yî-set-lie̍t-ngìn vi-tó thò-phit Mí-thien-ngìn chhiu chhai sân-tú vi chhṳ-kâ yet sân-lùng hí sân-chai.
[3] Tak-pái Yî-set-lie̍t-ngìn ve-chúng, Mí-thien-ngìn chhiu lièn-ha̍p Â-mâ-li̍t-ngìn lâu tûng-fông ke yù-mu̍k mìn-chhu̍k lòi kûng-tá kì-têu.
[4] Liá-têu thi̍t-ngìn tui-tén kì-têu ôn-yàng, sún-fái thú-sán yit-chhṳ̍t to nàm-phu ke Kâ-sat yit-tai. Kì-têu chhióng-chéu só-yû ke yòng-khiùn, ngiù-khiùn lâu lì-è, mò liù-hâ yit-si̍t-é tûng-sî pûn Yî-set-lie̍t-ngìn cho sṳ̍t-vu̍t.
[5] Kì-têu chhiong yit thai-khiùn chhó-máng án-tô, tai-tén ngiù-khiùn, chong-phùng khiung-ha kiuk-tén lòi; kì-têu ke lo̍k-thò ya tô-to son m̀-thet. Kì-têu ngi̍p-to koet-nui, fí-fái chhiòn-thi.
[6] Yî-set-lie̍t-ngìn mò fap-thu tí-khong Mí-thien-ngìn, pien-cho chhin khiùng-khú, chhiu khiù-ham Song-chú.
[7] Yî-set-lie̍t-ngìn khiù-ham Song-chú pông-chhu kì-têu tí-khong Mí-thien-ngìn,
[8] Song-chú chhiu phai yit-ke siên-tî to kì-têu ke-vi, hiong kì-têu chhòn-kóng Song-chú — Yî-set-lie̍t Song-ti ke sin-sit, kóng: “Ngài sṳt tai-liâng ngì-têu thot-lì Âi-khi̍p, lì-khôi cho nù-chhòi ke thi-fông.
[9] Ngài tui Âi-khi̍p-ngìn sú-chûng chiông ngì-têu kiu chhut-lòi; Ngài ya kiu ngì-têu lì-khôi só-yû khî-fu ngì-têu ke ngìn ke sú, chhai ngì-têu chhièn-chin ke sṳ̀ chiông kì-têu kiuk-chéu, chiông kì-têu ke thú-thi su-pûn ngì-têu.
[10] Ngài sṳt lâu ngì-têu kóng, Ngài he Song-chú — ngì-têu ke Song-ti. Ngì-têu he̍t chhai Â-mô-li-ngìn ke thú-thi, cho-m̀-tet pai kì-têu ke sṳ̀n-mìn. Chúng-he ngì-têu m̀ thâng Ngài kóng.”
[11] Heu-lòi, Song-chú ke thiên-sṳ́ lòi-to Ngò-fut-lâ, chhô chhai Yok-â-sṳ̂ vuk-ngoi ke siong-su hâ; Yok-â-sṳ̂ he Â-pí-yî-chhia-chhu̍k ke ngìn. Kì ke lai-é Kî-thien tú-hó chhai cha-chiú-chhṳ̀ thêu-thêu-é tá ma̍k-é, m̀ pûn Mí-thien-ngìn tî.
[12] Song-chú ke thiên-sṳ́ chhai ke-vi hiong Kî-thien hién-hien, tui kì kóng: “Thai-nèn ke yúng-sṳ â, Song-chú lâu ngì khiung-ha!”
[13] Kî-thien kóng: “Thai-ngìn â, na-he Song-chú lâu ngài-têu khiung-ha, ngài-têu ngióng-pân voi su-tó liá-têu khú-nan nè? Ngài-têu ke chú-siên sṳt lâu ngài-têu kóng, Song-chú ngióng-pân thu kì-têu chhut Âi-khi̍p, kîm-pû-ngit, ke-têu sṳ̀n-chiak khì-sṳ chhai nai-vi nè? Song-chú fit-thet ngài-têu, chiông ngài-têu kâu chhai Mí-thien-ngìn sú-chûng.”
[14] Song-chú chhiu khon-tén Kî-thien, tui kì kóng: “Ngì oi chhin ngì chui-thai ke li̍t-liong hi kié-kiu Yî-set-lie̍t lì-khôi Mí-thien-ngìn ke sú-chûng. Kám m̀-he Ngài chhîn-chhṳ phai ngì hi mâ?”
[15] Kî-thien en-kóng: “Chú â, ngài oi ngióng-pân kié-kiu Yî-set-lie̍t nè? Ngài su̍k Mâ-nâ-sî kî-chhu̍k chui-ngio̍k ke chûng-chhu̍k; ngài me he vuk-hâ chui mò-yung ke ngìn.”
[16] Song-chú tui kì kóng: “Ngài yit-thin lâu ngì khiung-ha. Ngì voi tá-yàng Mí-thien-ngìn, chhiu-chhiong tá-yàng yit-ke ngìn khiung-yong.”
[17] Kî-thien en-kóng: “Na-he Ngì chung-yi ngài, chhiáng pûn ngài chṳn-kí, chṳn-mìn he Ngì chhîn-chhṳ lâu ngài kóng-fa.
[18] Chhiáng m̀-hó lì-khôi, tén ngài tai lî-vu̍t pài chhai Ngì mien-chhièn.” Song-chú kóng: “Ngài voi tén ngì chón-lòi.”
[19] Só-yî, Kî-thien chón-to vuk-hâ chú yit-chak se sân-yòng, yu yung sṳ̍p kûng-kîn mien-fún cho vù-kau-piáng. Kì chiông ngiuk piong chhai làm-è tú, chiông thông piong chhai vo̍k-é tú, tai-hi pûn siong-su hâ ke thiên-sṳ́.
[20] Song-ti ke thiên-sṳ́ tui kì kóng: “Chiông ngiuk lâu vù-kau-piáng piong chhai liá-te thai sa̍k-thèu táng, chiông thông tó chhai táng-kô.” Kî-thien cheu án-ngiòng cho.
[21] Song-chú ke thiên-sṳ́ chhûn-chhut Kì ke koái-kun-é, kun-thèu yit tu̍t-tó ngiuk lâu piáng, chhiu yû fó tui thai sa̍k-thèu phun chhut-lòi, chiông ngiuk lâu piáng sêu-thet; Song-chú ke thiên-sṳ́ chhiu m̀ kien-thet.
[22] Kî-thien yit tî kì só khon-tó ke he Song-chú ke thiên-sṳ́, chhiu chho̍k-kiâng kóng: “Chṳ-kô ke Song-chú â, ngài chhám lé, ngài kin-yèn mien-tui-mien khon-tó Song-chú ke thiên-sṳ́!”
[23] Song-chú tui kì kóng: “Phìn-ôn! M̀-sṳ́ kiâng. Ngì m̀-voi sí.”
[24] Kî-thien chhiu chhai ke-vi vi Song-chú hí yit-chho chi-thàn, chiông kì ôn-to “Song-chú su phìn-ôn”. (Liá chi-thàn to kîm-pû-ngit hàn-he chhai Â-pí-yî-chhia-chhu̍k ke Ngò-fut-lâ.)
[25] Ke am-pû, Song-chú lâu Kî-thien kóng: “Ngì oi chiông ngiâ-pâ ke ngiù-kú, chhiu-he ke chhit-se thai ke thi-ngi chak ngiù-kú khiên-chéu, ya oi chhak-thet ngiâ-pâ vi Pâ-li̍t hí ke chi-thàn, chám-thôn chi-thàn sùn-thèu Â-sa-lâ ńg-sṳ̀n ke su-tún.
[26] Ngì oi chhai liá phàn-sa̍k táng vi Song-chú — ngì ke Song-ti hí yit-chho chṳ́n-chhè thó-tong ke chi-thàn, yung ngì chám-thôn ke Â-sa-lâ su-tún cho-chhèu, chiông ke thi-ngi chak ngiù-kú piong chhai táng-kô cho sêu-fa-chi sêu-thet.”
[27] Só-yî Kî-thien tai-tén sṳ̍p-ke phu̍k-ngìn, chûn-cheu Song-chú fûn-fu kì ke hi-cho. Kì yîn-vi kiâng vuk-hâ ngìn lâu sàng-tú ke ngìn, m̀-kám chhai ngit-sṳ̀-thèu cho, só-yî chhai am-pû-sṳ̀ cho.
[28] Thi-ngi chêu-sṳ̀n, sàng-tú ke ngìn hong-hí-lòi, fat-hien Pâ-li̍t ke chi-thàn pûn-ngìn chhak-thet, kì sùn-thèu ke Â-sa-lâ su-tún pûn-ngìn chám-thôn, ke thi-ngi chak ngiù-kú chhai sîn-hí ke chi-thàn táng sêu-thet.
[29] Kì-têu fu-siông mun: “Liá he má-ngìn cho ke?” Kì-têu hi siòng-se chhà, tham-chhut he Yok-â-sṳ̂ ke lai-é Kî-thien cho ke.
[30] Sàng-tú ke ngìn chhiu tui Yok-â-sṳ̂ kóng: “Chiông ngì ke lai-é kâu chhut-lòi, ngài-têu oi chhṳ̀-sí kì! Kì chhak-thet Pâ-li̍t ke chi-thàn, chám-thôn thàn sùn-thèu ke Â-sa-lâ su-tún.”
[31] Yok-â-sṳ̂ en kûng-kit kì ke-têu chung-ngìn kóng: “Ngì-têu sióng-oi thoi Pâ-li̍t phien-fu, sióng-oi kiu kì he-mò? Má-ngìn thoi Pâ-li̍t phien-fu, thiên-kông yî-chhièn chhiu voi sí-thet. Pâ-li̍t na-he sṳ̀n, pûn kì vi chhṳ-kâ phien-fu â! Yîn-vi he kì ke chi-thàn pûn-ngìn chhak-thet!”
[32] Só-yî ke-ngit Kî-thien pûn-ngìn ham-cho Yâ-lu-Pâ-li̍t, yi-sṳ kóng: “Pûn Pâ-li̍t lâu kì phien-fu â!” Yîn-vi kì chhak-thet Pâ-li̍t ke chi-thàn.
[33] Ke-sṳ̀, Mí-thien-ngìn, Â-mâ-li̍t-ngìn, lâu tûng-fông ke yù-mu̍k mìn-chhu̍k chhiòn-phu lièn-ha̍p, ko Yok-tan-hò, chhai Yâ-sṳ̂-lie̍t phìn-ngièn ôn-yàng.
[34] Song-chú ke Lìn châ-koi Kî-thien, kì chhiu phùn yòng-kok, seu-si̍p Â-pí-yî-chhia-chhu̍k ke ngìn lòi thèn kì.
[35] Kì phai-ngìn to Mâ-nâ-sî chhiòn-thi, seu-si̍p kì-têu lòi thèn kì. Kì ya phai-ngìn to Â-sat, Sî-pu-lùn, lâu Nâ-fut-thâ-li kî-chhu̍k hi; kì-têu ya chhiòn-phu lòi lâu kì fi-ha̍p.
[36] Kî-thien tui Song-ti kóng: “Ngì kóng-ko Ngì oi yung ngài lòi kié-kiu Yî-set-lie̍t.
[37] Án-ngiòng, ngài piong-têu yòng-mô chhai ngài-têu tá ma̍k-é ke ma̍k-chhòng, na-he thiên-kông chêu-sṳ̀n chṳ́-yû yòng-mô táng yû lu-súi, thi-mien he châu ke, ngài chhiu tî Ngì oi yung ngài lòi chṳ́n-kiu Yî-set-lie̍t.”
[38] Sṳ-chhìn lûng-chúng cheu kì só-kóng ke fat-sên. Kî-thien tá-chó hong hí-lòi, kì ngién yòng-mô, chhiu ngién-chhut yit-vón mân-mân ke lu-súi lòi.
[39] Kî-thien yu tui Song-ti kóng: “Chhiáng m̀-hó hiong ngài fat-khién, chún ngài chai khiù yit-pái, pûn ngài yung yòng-mô chai chhṳ yit-pái. Liá-pái chhiáng sṳ́ yòng-mô châu-châu, thi-mien fán-chón chhiòn-phu oi yû lu-súi.”
[40] Ke am-pû, Song-ti cheu án-ngiòng hi-cho. Thi-ngi chêu-sṳ̀n, chṳ́-yû yòng-mô chṳn-kîn châu-châu, thi-mien fán-chón chhiòn-phu he lu-súi.