[1] Yî-set-lie̍t-ngìn yu hàng Song-chú khon-cho sià-ok ke sṳ, só-yî Song-chú chiông kì-têu kâu chhai Fî-li-sṳ-ngìn sú-chûng si-sṳ̍p ngièn.
[2] Ke-sṳ̀, yû yit-ke Tan kî-chhu̍k ke ngìn, miàng ôn-to Mâ-nò-â, he̍t chhai Só-lâ-sàng. Kì ke pû-ngiòng m̀-voi kiung, mò se-ngìn-è.
[3] Song-chú ke thiên-sṳ́ hiong kiâ pû-ngiòng hién-hien, kóng: “Ngì m̀-voi kiung, mò se-ngìn-è, chúng-he ko mò kí-kiú ngì voi yû-sṳ̂n, kiung yit-ke lai-é.
[4] Ngì oi se-ngi, thâm-chiú lâu ngiàm-chiú chhiòn-phu cho-m̀-tet lîm, ya cho-m̀-tet sṳ̍t lî-ngì song thin-cho mò chhiang-li ke tûng-sî,
[5] yîn-vi ngì oi kiung yit-ke lai-é. Se-ngìn-è chhut-se yî-heu, m̀-hó thi kì ke thèu-nà-mô, yîn-vi kì yit chhut-se chhiu-oi hien-pûn Song-ti cho lì-siu̍k-ngìn. Kì voi tai-thèu chṳ́n-kiu Yî-set-lie̍t-ngìn thot-lì Fî-li-sṳ-ngìn ke sú.”
[6] Liá fu-ngìn-kâ hi lâu ló-kûng kóng: “Yû yit-ke sṳ̀n-ngìn hiong ngài hién-hien; kì ke mien chhiong Song-ti ke thiên-sṳ́, chhin tet-ngìn-kiâng. Ngài mò mun kì tui nai-vi lòi; kì ya mò lâu ngài kóng kì ôn-to má-ke miàng.
[7] Chúng-he kì tui ngài kóng, ngài voi yû-sṳ̂n, kiung yit-ke lai-é. Kì ham ngài cho-m̀-tet lîm thâm-chiú lâu ngiàm-chiú, ya cho-m̀-tet sṳ̍t lî-ngì song thin-cho mò chhiang-li ke tûng-sî; yîn-vi se-ngìn-è yit chhut-se chhiu-oi hien-pûn Song-ti, yit-sên-ngìn cho lì-siu̍k-ngìn.”
[8] Só-yî, Mâ-nò-â hiong Song-chú khì-khiù: “Song-chú â, khiù Ngì pûn Ngì phai-lòi ke sṳ̀n-ngìn to-chón ngài-têu liá-vi lòi, kâu ngài-têu oi ngióng-pân tui-thai chiông-voi chhut-se ke se-lai-é.”
[9] Song-ti thâng-tó Mâ-nò-â ke khì-tó. Ke fu-ngìn-kâ chhai thièn-hong ke sṳ̀, Song-ti ke thiên-sṳ́ to-chón kì mien-chhièn. Ke-sṳ̀, kiâ ló-kûng Mâ-nò-â mò chhai ke-vi;
[10] kì kón-kín chéu-hi lâu kiâ ló-kûng kóng: “Ngì khon! Ke-ngit lòi chhìm ngài ke ngìn yu hiong ngài hién-hien lé!”
[11] Mâ-nò-â hong-hí-lòi thèn kiâ pû-ngiòng hi, to ke-ngìn mien-chhièn, mun kì: “Lâu ngài pû-ngiòng kóng-ko fa ke ngìn, he ngì mò?” Ke-ngìn en-kóng: “He â!”
[12] Mâ-nò-â kóng: “Ngì kóng ke fa sṳ̍t-hien yî-heu, ngài-têu yin-kôi ngióng-pân kâu liá se-ngìn-è nè? Kì oi ko ngióng-pân ke sên-fa̍t nè?”
[13] Song-chú ke thiên-sṳ́ en Mâ-nò-â kóng: “Ngì ke pû-ngiòng yit-thin oi chûn-sú só-yû ngài lâu kì kóng-ko ke fa.
[14] Kì cho-m̀-tet sṳ̍t phù-thò cho ke tûng-sî, cho-m̀-tet lîm thâm-chiú lâu ngiàm-chiú, ya cho-m̀-tet sṳ̍t lî-ngì song thin-cho mò chhiang-li ke tûng-sî. Ngài fûn-fu kì ke yit-chhiet, kì chhiòn-phu oi chûn-sú.”
[15] Mâ-nò-â m̀-tî kì he Song-chú ke thiên-sṳ́, chhiu tui kì kóng: “Chhiáng m̀-hó chéu! Ngài-têu yi-phi yit-chak se sân-yòng pûn ngì sṳ̍t.” Song-chú ke thiên-sṳ́ en Mâ-nò-â kóng: “Chhiu-son liù hâ-lòi, ngài ya m̀ sṳ̍t ngì ke sṳ̍t-vu̍t. Na-he ngì oi chún-phi, chhiu chiông kì cho sêu-fa-chi hien-pûn Song-chú â!”
[17] Mâ-nò-â kóng: “Chhiáng-mun thai-miàng? Ngì ke fa sṳ̍t-hien yî-heu, ngài-têu hó tui ngì péu-sṳ chûn-kin.”
[18] Song-chú ke thiên-sṳ́ en-kóng: “Ngì ngióng-oi mun ngài ke miàng nè? Ngài ke miàng he khì-meu ke miàng.”
[19] Só-yî, Mâ-nò-â tai-tén yit-chak se sân-yòng lâu su-chi, piong chhai sa̍k-thèu ke chi-thàn táng, hien-pûn hàng khì-sṳ ke Song-chú.
[20] Fó-yam tui chi-thàn chhung sông-hi ke sṳ̀, Mâ-nò-â lâu kiâ pû-ngiòng khon-tó Song-chú ke thiên-sṳ́ chhai fó-yam chûng sṳ̂n-thiên. Mâ-nò-â liá-sṳ̀ chang tî ke-ngìn ngièn-lòi he Song-chú ke thiên-sṳ́; kì lâu kì ke pû-ngiòng chhiu phu̍k chhai thi-song. Heu-lòi Song-chú ke thiên-sṳ́ mò-chai hiong kì-têu hién-hien.
[22] Mâ-nò-â tui kiâ pû-ngiòng kóng: “Ngài-têu yit-thin voi sí, yîn-vi ngài-têu khon-tó Song-ti lé!”
[23] Chúng-he kiâ pû-ngiòng en-kóng: “Na-he Song-chú oi chhṳ̀ ngài-têu, Kì m̀-voi chiap-su ngài-têu ke sêu-fa-chi lâu su-chi, m̀-voi hiong ngài-têu hién-mìn liá-têu sṳ, ya m̀-voi chhai liá sṳ̀-chiet lâu ngài-têu kóng liá só-yû ke fa.”
[24] Mâ-nò-â ke pû-ngiòng kiung yit-ke lai-é, chiông kì ôn-miàng Chhâm-sûn. Liá se-ngìn-è chhiam-chhiam chóng-thai; Song-chú su-fuk pûn kì.
[25] Tông kì chhai Só-lâ lâu Yî-sṳ̍t-thò chûng-kiên, Tan-yàng ke só-chhai, Song-chú ke Lìn khôi-sṳ́ kám-thung kì.