[1] Yî-set-lie̍t ngìn-mìn, tui pet-phu ke Tan to nàm-phu ke Phe̍t-sṳ-pâ, tûng-to Kî-lie̍t-thi, chhiòn-phu thùng-sîm lòi-to Mí-sṳ̂-pâ, chhi-si̍p chhai Song-chú mien-chhièn.
[2] Yî-set-lie̍t tak kî-chhu̍k ke liâng-chhiu chhiòn-phu chhut-si̍t liá-pái Song-ti chṳ́-mìn ke chhi-fi. Khià tô-é ke phu-pîn yû si-sṳ̍p van-ngìn.
[3] Thùng-sṳ̀, Phien-ngâ-mén-ngìn ya thâng-kóng só-yû ke Yî-set-lie̍t-ngìn chhiòn-phu si̍p-ha̍p chhai Mí-sṳ̂-pâ. Yî-set-lie̍t-ngìn mun: “Lâu ngài-têu kóng, liá-chúng sià-ok ke sṳ ngióng-pân voi fat-sên?”
[4] Ke Li-vi-ngìn, chhiu-he su-hoi fu-ngìn-kâ ke ló-kûng, en-kóng: “Ngài lâu ngài ke se-chiá to Phien-ngâ-mén kin-nui ke Kî-pí-â ko-ya;
[5] ke am-pû Kî-pí-â-ngìn lòi pâu-vì vuk-è, oi chok ngài, chhṳ̀ ngài, yu chiông ngài ke se-chiá khiòng-kiên to sí-thet.
[6] Ngài chiông kì ke sṳ̂-thí to̍k-cho yit-te yit-te, sung-to Yî-set-lie̍t sṳ̍p-ngi kî-chhu̍k, yit kî-chhu̍k yit-te. Kî-pí-â-ngìn chhai ngài-têu tông-chûng cho án chit-ok, án yìm-lon ke sṳ.
[7] Ngì-têu chhiòn-phu he Yî-set-lie̍t-ngìn; liá-ha ngì-têu oi ngióng-pân chhú-lî liá khien-sṳ nè?”
[8] Só-yû ke ngìn chhiòn-phu khiung-ha khî hí-lòi kóng: “Ngài-têu lièn yit-sà ya m̀ chón chong-phùng, m̀ chón vuk-tú hi.
[9] Liá-ha ngài-têu oi án-ngiòng cho: Ngài-têu oi chhû-chhiâm sién-têu ngìn hi kûng-tá Kî-pí-â.
[10] Yî-set-lie̍t tak kî-chhu̍k sṳ̍p-fûn chṳ̂-yit ke ngìn oi fu-chit yun kiûn-liòng, khì-thâ ke ngìn oi hi po-fu̍k Phien-ngâ-mén ke Kî-pí-â, yîn-vi kì-têu chhai Yî-set-lie̍t tông-chûng fam-tó án chit-ok ke chhui.”
[11] Só-yî só-yû ke Yî-set-lie̍t-ngìn thùng-sîm yit-yi, chhi-si̍p kûng-tá ke-sàng.
[12] Yî-set-lie̍t tak kî-chhu̍k phai sṳ́-chá hi mun Phien-ngâ-mén kî-chhu̍k ke kok kâ-chhu̍k, tui kì-têu kóng: “Ngì-têu tông-chûng ngióng-voi yû-ngìn cho án sià-ok ke sṳ!
[13] Liá-ha chiông ke-têu Kî-pí-â ke lù-màn-é kâu chhut-lòi, ngài-têu oi chiông kì-têu chhú sí-hìn, tui Yî-set-lie̍t tông-chûng chhù-thet liá chhui-ok.” Chúng-he Phien-ngâ-mén-ngìn m̀-tap liá-têu Yî-set-lie̍t thùng-pâu;
[14] kì-têu tui Phien-ngâ-mén tak sàng lòi-to Kî-pí-â, oi lâu liá-têu Yî-set-lie̍t-ngìn siông-chhṳ̀.
[15] Ke-ngit, Phien-ngâ-mén-ngìn tui tak sàng seu-si̍p lióng-van liuk-chhiên khià tô-é ke sṳ-pîn. Nang-ngoi, Kî-pí-â ke ngìn-mìn ya seu-si̍p chhit-pak miàng sṳ́-yung chó-sú, thi̍t-phe̍t sién-ko ke ngìn. Kì-têu chhiòn-phu voi fin sa̍k-é, fin-to chún-chún mò phiên-chhâ.
[17] Phien-ngâ-mén kî-chhu̍k yî-ngoi ke Yî-set-lie̍t-ngìn seu-si̍p si-sṳ̍p van khià tô-é ke, su-ko hiun-lien ke sṳ-pîn.
[18] Yî-set-lie̍t-ngìn to Pak-thi̍t-li ke sṳn-só khiù-mun Song-ti: “Nai-yit kî-chhu̍k oi tai-thèu hi kûng-tá Phien-ngâ-mén-ngìn nè?” Song-chú kóng: “Yù-thai kî-chhu̍k.”
[19] Thi-ngi chêu-sṳ̀n, Yî-set-lie̍t-ngìn chhut-fat, chhai Kî-pí-â fu-khiun ôn-yàng.
[20] Kì-têu mien-tui sàng ke fông-hiong chún-phi siông-chhṳ̀, oi kûng-tá Phien-ngâ-mén kiûn-chhui.
[21] Phien-ngâ-mén kiûn-chhui chhiu tui Kî-pí-â chhut-lòi. Ke-ngit, kì-têu chhṳ̀-thet lióng-van lióng-chhiên ke Yî-set-lie̍t sṳ-pîn.
[22] Yî-set-lie̍t-ngìn chón-to sṳn-só, chhai Song-chú mien-chhièn thai-kieu, chhṳ̍t-to am-pû-sṳ̀. Kì-têu khiù-mun Song-chú: “Ngài-têu yin-kôi chai hi kûng-tá ngài-têu ke thùng-pâu Phien-ngâ-mén-ngìn mò?” Song-chú en-kóng: “Yin-kôi hi.” Só-yî, Yî-set-lie̍t-ngìn tet-tó kú-li, yu chhai chhièn yit-ngit pài-chhṳn ke thi-fông chún-phi siông-chhṳ̀.
[24] Thi-ngi-ngit kì-têu yu kûng-tá Phien-ngâ-mén kiûn-chhui.
[25] Phien-ngâ-mén-ngìn yu yit-pái tui Kî-pí-â chhut-lòi, chhṳ̀-thet yit-van pat-chhiên khià tô-é ke Yî-set-lie̍t sṳ-pîn.
[26] Só-yû Yî-set-lie̍t-ngìn chhiòn-phu to Pak-thi̍t-li, chhai Song-chú mien-chhièn chhô-tén thai-kieu, kì-têu kim-sṳ̍t, yit-chhṳ̍t to am-pû-sṳ̀. Kì-têu chhai Song-chú mien-chhièn hien phìn-ôn-chi lâu sêu-fa-chi.
[27] Ke-sṳ̀, Song-ti ke yok-khui chhai Pak-thi̍t-li; Â-lùn ke sûn-é, Yî-li-â-sat ke lai-é Fî-nì-ha̍p khî chhai yok-khui chhièn. Ngìn-mìn khiù-mun Song-chú: “Ngài-têu yin-kôi chai hi kûng-tá ngài-têu ke thùng-pâu Phien-ngâ-mén-ngìn mò? Ya-he chhiu thìn-chṳ́ chan-chên?” Song-chú en-kóng: “Hi kûng-tá! Thiên-kông-ngit Ngài oi chiông kì-têu kâu chhai ngì-têu ke sú-chûng.”
[29] Só-yî, Yî-set-lie̍t-ngìn ôn-phài sṳ-pîn mài-fu̍k chhai Kî-pí-â si chû-vì.
[30] Thi-sâm ngit, kì-têu kûng-tá Phien-ngâ-mén kiûn-chhui, chhiong chhièn lióng-pái khiung-yong, mien-tui Kî-pí-â ke fông-hiong chún-phi siông-chhṳ̀.
[31] Phien-ngâ-mén-ngìn chhut-lòi siông-chhṳ̀, pûn Yî-set-lie̍t-ngìn koái-phien lì-khôi sàng. Phien-ngâ-mén-ngìn lâu thèu-pái khiung-yong, chhai hi Pak-thi̍t-li lâu Kî-pí-â lu-song ke khóng-yâ chhṳ̀-thet Yî-set-lie̍t-ngìn, thai-yok sâm-sṳ̍p sà.
[32] Phien-ngâ-mén-ngìn kóng: “Ngài-têu chhiong yî-chhièn khiung-yong tá-yàng kì-têu lé.” Chúng-he, Yî-set-lie̍t-ngìn yí-kîn kie-va̍k hó, yung thui pîn lòi phien kì-têu lì-khôi sàng, to thai-lu hi.
[33] Só-yî, chhai Yî-set-lie̍t-ngìn ke chú-li̍t kiûn thui-chón Pâ-li̍t-Thâ-mâ chhùng-sîn pài-chhṳn ke sṳ̀, nang-ngoi mài-fu̍k chhai Kî-pí-â si chû-vì ke ngìn fut-yèn chéu-chhut lòi.
[34] Tui chhiòn Yî-set-lie̍t sién-chhut ke yit-van yúng-sṳ, to Kî-pí-â, kûng-tá Phien-ngâ-mén-ngìn. Chan-chên kit-lie̍t, Phien-ngâ-mén-ngìn hàn m̀-tî kì-têu chhiu voi pûn Yî-set-lie̍t-ngìn sêu-me̍t lé.
[35] Song-chú chiông Phien-ngâ-mén kiûn-chhui kâu chhai Yî-set-lie̍t sú-chûng; ke-ngit, Yî-set-lie̍t-ngìn chhṳ̀-thet Phien-ngâ-mén-ngìn lióng-van ńg-chhiên yit-pak sà, chhiòn-phu he khià tô-é ke sṳ-pîn.
[36] Phien-ngâ-mén-ngìn chang tî chhṳ-kâ sû-thet lé. Siên-chhièn, Yî-set-lie̍t kiûn-chhui ke chú-li̍t tui Phien-ngâ-mén-ngìn mien-chhièn ká thui pîn, yîn-vi kì-têu kho ke-têu mài-fu̍k chhai Kî-pí-â si chû-vì ke ngìn.
[37] Liá-têu ngìn chhin-kiak chhûng-ngi̍p Kî-pí-â, fûn-san chhai sàng-tú, chiông sàng-tú ke ngìn chhiòn-phu chhṳ̀-thet.
[38] Yî-set-lie̍t-ngìn ke chú-li̍t kiûn lâu mài-fu̍k ke kiûn-chhui sṳ-chhièn yok-thin yit-ke sin-ho: Kì-têu khon-tó sàng-tú fó-yên chhung hí-lòi ke sṳ̀,
[39] chan-chhòng song ke Yî-set-lie̍t-ngìn chhiu oi vat-chón thèu. Liá-sṳ̀, Phien-ngâ-mén-ngìn yí-kîn chhṳ̀-thet sâm-sṳ̍p ke Yî-set-lie̍t-ngìn; kì-têu kóng: “Ngài-têu chhiong yî-chhièn khiung-yong yu tá-yàng kì-têu lé.”
[40] Heu-lòi, sin-ho chhut-hien, sàng-tú fó-yên chhung hí-lòi, Phien-ngâ-mén-ngìn chón-thèu yit-khon, fat-hien chhiòn-sàng fó-yên chhung-thiên.
[41] Yî-set-lie̍t-ngìn ke chú-li̍t kiûn vat-chón thèu, Phien-ngâ-mén-ngìn chhiu tông chho̍k-kiâng, yîn-vi kì-têu tî chhṳ-kâ voi pûn Yî-set-lie̍t-ngìn sêu-me̍t lé.
[42] Kì-têu tui Yî-set-lie̍t-ngìn mien-chhièn chón-sṳ̂n, hiong khóng-yâ thò-chéu, chúng-he chéu m̀-thet; kì-têu pûn Yî-set-lie̍t ke chú-li̍t kiûn lâu sàng-tú chhut-lòi ke ngìn kia̍p chhai chûng-kiên, pûn-ngìn chhṳ̀ chhiang-chhiang.
[43] Yî-set-lie̍t-ngìn pâu-vì Phien-ngâ-mén-ngìn, yit-chhṳ̍t tûi kì-têu, chhṳ̍t-to Kî-pí-â tûng-phién ke thi-fông, theu-lu chhin chhṳ̀ kì-têu.
[44] Phien-ngâ-mén-ngìn thai-yok yû yit-van pat-chhiên chîn-pîn pûn-ngìn chhṳ̀-sí;
[45] khì-thâ ke ngìn chón-to khóng-yâ, hiong Lìm-mùn ke ngàm-sa̍k thò-chéu, yû ńg-chhiên ngìn chhai lu-song pûn Yî-set-lie̍t-ngìn chhṳ̀-sí. Yî-set-lie̍t-ngìn ki-siu̍k tûi chhûn-tó ke ngìn, chhṳ̍t-to Kî-tun, yu chhṳ̀-thet lióng-chhiên ngìn.
[46] Ke-ngit, Phien-ngâ-mén-ngìn chúng-khiung yû lióng-van ńg-chhiên khià tô-é ke yúng-sṳ pûn Yî-set-lie̍t-ngìn chhṳ̀-sí.
[47] Hiong khóng-yâ thò-chéu ke Phien-ngâ-mén-ngìn yû liuk-pak sà; kì-têu lòi-to Lìm-mùn ke ngàm-sa̍k, chhai ke-vi he̍t si-chak ngie̍t.
[48] Yî-set-lie̍t-ngìn to-chón Phien-ngâ-mén-thi hi, chiông kok-sàng ke ngìn lâu thèu-sâng chhiòn-phu chhṳ̀ chhiang-chhiang, ya chiông ke thi-khî só-yû ke sàng-chṳ́n sêu-thet.