[1] Ke-ngit, Tí-pô-lâ lâu Â-pí-nò-êm ke lai-é Pâ-lâ chhong liá-sú kô:
[2] Oi siung-chan Song-chú! Yî-set-lie̍t ke kiûn-chóng kiet-sîm siông-chhṳ̀, ngìn-mìn chhṳ-ngien chhiùng-kiûn.
[3] Kiûn-vòng â, ngì-têu oi thâng! Liâng-chhiu â, chet-ngí lòi thâng! Ngài oi hiong Song-chú thàn-khìm chhong-kô, oi kô-siung Song-chú — Yî-set-lie̍t ke Song-ti.
[4] Song-chú â! Ngì lì-khôi Sî-ngí-sân, Ngì tui Yî-tûng chhut-fat, thai-thi kín-chûn, thiên-táng lo̍k-yí, yùn-chhèn tó-súi.
[5] Chhai Sî-nai ke Song-chú — Yî-set-lie̍t ke Song-ti mien-chhièn, khiùn-sân chhiòn-phu kín-chûn.
[6] Chhai Â-nâ ke lai-é Sân-kâ ke sṳ̀-thoi, chhai Ngâ-yi ke ngit-è, sên-lî ngìn m̀-kám kîn-ko liá-vi, chhut-ngoi ngìn lit-to phe̍t-thiàu lu hi.
[7] Tí-pô-lâ â, Yî-set-lie̍t ke chhûn-chông mò-ngìn kám he̍t, tak só-chhai khûng-khûng, chhṳ̍t-to ngì lòi; ngì lòi-cho Yî-set-lie̍t ke â-mê.
[8] Yî-set-lie̍t von sîn ke sṳ̀n-mìn, sàng-mùn chhiu yû chan-chên. Si-van Yî-set-lie̍t-ngìn chûng, khon m̀-tó tún-phài lâu chhiông.
[9] Ngài hiong Yî-set-lie̍t ke chṳ́-fî-kôn chûng-sîm, chṳ̂-chhṳ̀ Yî-set-lie̍t-ngìn ke chṳ-ngien kiûn. Oi siung-chan Song-chú!
[10] Ngì-têu khì pha̍k-lì ke, chhô chhai mâ-ôn táng ke, hàng-lu ke chhiòn-phu oi chhòn-yòng.
[11] Thâng â, chhai chiáng-sùn yû ngìn chhòn-chhut fôn-fû! Kì-têu chhòn-kóng Song-chú ke sṳn-li; khin-chuk Yî-set-lie̍t tet-sṳn chón-lòi. Ke-sṳ̀ Song-chú ke chṳ́-mìn hàng-to sàng-mùn fôn-fû:
[12] Tí-pô-lâ â, hîn-hí hîn-hí! Hîn-hí chhong-kô, yúng-kám hiong-chhièn! Â-pí-nò-êm ke lai-é Pâ-lâ â, hong hí-lòi! Chiông ngì chok-tó ke ngìn tai-chéu!
[13] Chûng-sin ke ngìn hiong kì-têu ke liâng-chhiu hàng-tén hi; Song-chú ke chṳ́-mìn to Kì mien-chhièn chún-phi siông-chhṳ̀.
[14] Kì-têu tui Yî-fap-lièn lòi, chin-ngi̍p sân-lak, thèn chhai Phien-ngâ-mén kî-chhu̍k ngìn ke heu-poi. Yû chṳ́-fî-kôn tui Mâ-kit chhut-lòi; yû kiûn-kôn tui Sî-pu-lùn hâ-lòi.
[15] Yî-sat-kâ ke liâng-chhiu lâu Tí-pô-lâ khiung-ha lòi; Yî-sat-kâ lòi, Pâ-lâ ya lòi; kì-têu thèn kì chin-ngi̍p sân-lak. Chúng-he Lî-phien kî-chhu̍k yi-kien kóng m̀-fò; kì-têu mò fap-thu cho kiet-thin.
[16] Ngì-têu cho-má-ke thèn chhai yòng-khiùn heu-poi? Oi thâng mu̍k-ngìn hêm khiùn-yòng he-mò? He â, Lî-phien kî-chhu̍k yi-kien kóng m̀-fò; kì-têu mò fap-thu kiet-thin.
[17] Kî-lie̍t-ngìn he̍t chhai Yok-tan-hò tûng-phién; Tan kî-chhu̍k cho-má-ke liù chhai sòn-táng? Â-sat kî-chhu̍k he̍t chhai hói-sùn; kì-têu chhai hói-kóng sùn thìn-thò.
[18] Chúng-he Sî-pu-lùn-ngìn kám piang-miang m̀-kiâng sí; Nâ-fut-thâ-li-ngìn chhai chan-chhòng ya he án-ngiòng.
[19] Chhai Mí-kit-tô hò-sùn ke Thâ-na̍p, chung-vòng chhiòn-phu lòi liá-vi siông-chhṳ̀. Kâ-nàm só-yû ke vòng lòi chan-chên; chúng-he kì-têu mò tai-chéu ngiùn-è.
[20] Sên-é tui thiên-táng lòi yên-chhu, pî ko-lòi kûng-tá Sî-sî-lâ.
[21] Kî-sun ke hò-súi chhûng-tén hâ — kip-liù chiông kì-têu tá-chéu. Ngài oi chhièn-chin, piang-miang hiong-chhièn!
[22] Ke-sṳ̀ chan-mâ pêu-tén chéu, kiok-thài sâng ti̍t-ti̍t ta̍t-ta̍t.
[23] Song-chú ke thiên-sṳ́ kóng: Oi chu-chú Mí-lò-sṳ̂, oi thai-thai lòi chu-chú he̍t chhai ke-vi ke ngìn-mìn. Kì-têu mò lòi pông-chhu Song-chú, m̀ lòi then-sú kûng-tá khiòng-thi̍t.
[24] Kî-nì-ngìn Hî-pak ke pû-ngiòng Ngâ-yi, chhai fu-ngìn-kâ chûng chui su ngìn chhṳ̂n-chan; pí he̍t chong-phùng ke fu-ńg kha mùng-fuk.
[25] Sî-sî-lâ hiong kì thó-súi, kì pûn kì ngiù-nen; kì yung kui-chhung ke vón chông nen-yù pûn kì.
[26] Ngâ-yi chó-sú nâ chong-phùng ke tâng-é, yu-sú nâ-tén sṳ̂-fu yung ke chhùi-è; kì chhin-chhùi Sî-sî-lâ, tá-lan kì ke thèu-nà, chhiuk-chhôn kì ke thai-yòng-hiet.
[27] Chhai Ngâ-yi kiok-chhièn, Sî-sî-lâ kiû hí-lòi, yu vang chón-hi, vang-to chhṳ̍t-chhṳ̍t; Sî-sî-lâ kiû hí-lòi, yu vang chón-hi, kì chhiu thôn-hi.
[28] Sî-sî-lâ ke â-mê kín-khon chhûng-mùn ngoi-poi; chhai kak-è chhûng-mùn ke heu-poi thai-sâng kín-mun: Kì ke chan-chhâ cho-má-ke án-kiú màng-chón? Kì ke chan-mâ cho-má-ke hàn-m̀ chón-lòi?
[29] Kì chui chhûng-mìn ke kiûng-ńg ôn-ví kì, kì ya he chhṳ-kâ mun chhṳ-kâ en kóng:
[30] Kì-têu yit-thin he chhióng tông-tô tûng-sî, tông pûn chan-li-phín, mò yit-thin yit-ke pîn-é pûn-tó yit, lióng ke se-moi-é. Khó-nèn Sî-sî-lâ pûn-tó ke he chhái-set ke ngoi-sâm; kì thin-chho̍k voi tai siu-fâ vì-kîn chón-lòi pûn vòng-heu.
[31] Song-chú â, ngien Ngì ke sù-thi̍t chhiòn-phu án-ngiòng me̍t-mòng! Ngien Ngì ke phèn-yû chhiong ngit-thèu án kông-mìn! Án-ngiòng liá thi-fông thai-phìn si-sṳ̍p ngièn.