[1] Yû yit-ngit, Chhâm-sûn to Thìn-nâ; kì chhai ke-vi khon-tó yit-ke Fî-li-sṳ ke se-moi-é.
[2] Kì chón vuk-hâ lâu yà-ôi kóng: “Ngài chhai Thìn-nâ khon-tó yit-ke Fî-li-sṳ ke se-moi-é, chhiáng chiông kì thó chón-lòi cho ngài ke pû-ngiòng.”
[3] Kì ke yà-ôi mun kì: “Ngì cho-má-ke phiên-phiên oi chhai mò su kot-lî ke Fî-li-sṳ-ngìn chûng thó pû-ngiòng nè? Kám-kóng chhai ngài-têu chhṳ-kâ ke chûng-chhu̍k ya-he thùng-pâu tông-chûng mò se-moi-é he-mò?” Chúng-he Chhâm-sûn tui kiâ-pâ kóng: “Ngài tông kak-yi kì; chhiáng chiông kì thó chón-lòi.”
[4] Kì ke yà-ôi sa m̀-tî Song-chú oi Chhâm-sûn án-ngiòng cho, yîn-vi Song-chú chhìm kî-fi oi kûng-kit Fî-li-sṳ-ngìn. Liá-sṳ̀, Fî-li-sṳ-ngìn thúng-chhṳ Yî-set-lie̍t.
[5] Só-yî, Chhâm-sûn lâu kiâ yà-ôi to Thìn-nâ hi. Kì-têu kîn-ko ke-vi ke phù-thò-yèn ke sṳ̀, yû yit-chak sṳ̂-é chhut-lòi tui kì ho-ho-kún.
[6] Song-chú ke Lìn khiòng-lie̍t lìm-to Chhâm-sûn, kì khûng-sú pak-lan ke-chak sṳ̂-é, chhiu-chhiong pak yit-chak se sân-yòng. Kì mò chiông só-cho ke sṳ lâu yà-ôi kóng.
[7] Chhâm-sûn hi khon ke se-moi-é, lâu kì kóng-fa; Chhâm-sûn tông kak-yi kì.
[8] Ko kí-ngit, Chhâm-sûn oi to-chón hi thó kì. Pan-lu, Chhâm-sûn chéu ko-hi khon chhṳ̀-sí ke sṳ̂-é, mò sióng-tó kin-yèn chhai sṳ̂-é ke sṳ̂-thí nui fat-hien yit-khiùn phûng-é lâu phûng-thòng.
[9] Kì chiông phûng-thòng yet chhut-lòi piong chhai sú-hong, kín-hàng kín-sṳ̍t. Yèn-heu kì to yà-ôi ke-vi, nâ-têu phûng-thòng pûn kì-têu, kì-têu ya sṳ̍t; chúng-he Chhâm-sûn mò lâu kì-têu kóng phûng-thòng he tui sṳ̂-é ke sṳ̂-thí nui yet chhut-lòi ke.
[10] Kiâ-pâ to ke se-moi-é vuk-hâ; Chhâm-sûn cheu ke-yông-sṳ̀ heu-sâng ngìn ke si̍p-koan, chhai ke-vi phan fûn-yîn ke yèn-si̍t.
[11] Fî-li-sṳ-ngìn khon-tó Chhâm-sûn, chhiu phai sâm-sṳ̍p ke ngìn phì kì.
[12] Chhâm-sûn tui liá sâm-sṳ̍p ke ngìn kóng: “Ngài chhut yit-ke liang-é pûn ngì-têu thòn, na-he ngì-têu nèn chhai liá chhit-ngit fûn-yîn ke yèn-si̍t khì-kiên thòn chhut-lòi, ngài chhiu pûn ngì-têu tak-sà yit-liâng song-tén mà-sâ sâm lâu yit-sṳ̂n lî-fu̍k;
[13] na-he ngì-têu thòn m̀-chhut, ngì-têu tak-sà oi pûn ngài yit-liâng song-tén mà-sâ sâm lâu yit-sṳ̂n lî-fu̍k.” Kì-têu kóng: “Chiông liang-é kóng-chhut pûn ngài-têu thâng â!”
[14] Chhâm-sûn tui kì-têu kóng: Sṳ̍t ke tui sṳ̍t-chá chhut; thiàm ke tui khiòng-chá lòi. Kì-têu sióng sâm-ngit, chhiòn-phu thòn m̀-chhut lòi.
[15] Thi-si ngit, kì-têu tui Chhâm-sûn ke pû-ngiòng kóng: “Ngì oi yung-kie lau ngiâ ló-kûng chiông tap-on tá-tham chhut-lòi, na-mò, ngài-têu oi piong-fó sêu ngiâ-pâ chhiòn-kâ, lièn ngì ya sêu-thet. Ngì-têu chhiáng ngài-têu lòi he oi chhióng ngài-têu he-mò?”
[16] Só-yî, Chhâm-sûn ke pû-ngiòng chhai kì mien-chhièn kieu-tén kóng: “Ngì nâu ngài! M̀-he chṳn-kîn siak ngài! Ngì chhut liang-é pûn ngài ke hiông-chhîn, chúng-he m̀ lâu ngài kóng tap-on!” Chhâm-sûn en-kóng: “Ngài lièn chhṳ-kâ ke yà-ôi me mò lâu kì-têu kóng, ngài ngióng-pân cho-tet lâu ngì kóng nè?”
[17] Kiâ pû-ngiòng chhai chhit-ngit fûn-yîn ke yèn-si̍t khì-kiên, tak-ngit vi liá khien-sṳ kín-kieu kín-ngau. Thi-chhit ngit, Chhâm-sûn pûn kiâ pû-ngiòng chhàn-to mò-kat mò-sat, chhiu chiông tap-on lâu kì kóng, kì chhiu hi lâu kì ke hiông-chhîn kóng.
[18] Thi-chhit ngit, ngit-thèu hàn-màng lo̍k-sân yî-chhièn, sàng-tú ke ngìn hi-kien Chhâm-sûn, kóng: Hàn-yû má-ke pí phûng-thòng kha-thiàm? Hàn-yû má-ke pí sṳ̂-é kha-khiòng? Chhâm-sûn en-kóng: Na m̀-he yung ngài ke ngiù-mà lài-thièn, ngì-têu chhiu thòn m̀-chhut ngài ke liang-é!
[19] Song-chú ke Lìn khiòng-lie̍t lìm-to Chhâm-sûn, kì chhiu to Â-sṳ̍t-kî-lùn, chhṳ̀-thet sâm-sṳ̍p ke ngìn, chiông kì-têu ke lî-fu̍k chhióng-hi pûn ke-têu thòn-chhut liang-é ke ngìn. Sṳ-heu, kì fî-sòng fat-khién, chhiu chón kiâ-pâ vuk-hâ hi.
[20] Chhâm-sûn ke pû-ngiòng heu-lòi ka-pûn kì ke chhiâ-lòng, chhiu-he Chhâm-sûn chhin hó ke phèn-yû.